Cité internationale des arts

Een Atelier an der Cité.
D'Haaptgebai am Marais.

D'Cité internationale des arts ass eng Kënschtlerresidenz zu Paräis, déi Konschtschafenden aus der ganzer Welt eng zäitlech begrenzt Aarbechts- a Wunnméiglechkeet bitt. Si huet als Zil, de kënschtlereschen Austausch ze fërderen an e kreatiivt Ëmfeld fir Kënschtler aus allen Disziplinnen ze schafen.

Geschicht an Organisatioun

[änneren | Quelltext änneren]

D'Cité internationale des arts gouf op Initiativ vun enger Rei kulturellen Organisatioune mat der Ënnerstëtzung vun der Stad Paräis an dem franséische Staat gegrënnt an huet 1965 hir Dieren opgemaach. D'Residenz huet zwee Gebaier: eent am Quartier Le Marais (op N° 18, rue de l'Hôtel de Ville) an eent op Montmartre (op N° 24, rue Norvins). Zesummen hu se iwwer méi wéi 300 Atelieren a Wunnraim.[1]

D'Cité gëtt vun enger Stëftung verwalt a schafft mat villen nationalen an internationale Partnerinstitutiounen zesummen, déi Boursë fir den Openthalt verdeelen. Zu Lëtzebuerg mécht de Kulturministère all Joer en Appell un national Kënschtler, déi eng Kandidatur kënnen areechen, fir den Openthalt an der Cité internationale des arts finanzéiert ze kréien.[2]

De Residenzprogramm riicht sech u professionell Kënschtler, Museker, Schrëftsteller an aner kulturschafend Leit aus aller Welt. D'Openthaltsdauer variéiert tëscht zwéin an zwielef Méint.[1] D'Auswiel geschitt op Kandidatur, mat engem Prozess, dee kënschtleresch Exzellenz an d'Noutwennegkeet vum Openthalt zu Paräis berécksiichtegt.

D'Cité internationale des arts huet sech als bedeitenden Zentrum fir den internationale Kulturaustausch etabléiert. Vill renomméiert Kënschtler hunn do gelieft a geschafft. Mat Evenementer, Ausstellungen a Concerten dréit d'Institutioun donieft zur kultureller Diversitéit vu Paräis bäi. All Joer residéieren iwwer 1.000 franséisch an auslännesch Kënschtler aus méi wéi 50 Länner an der Cité.[3]

Um Spaweck

[änneren | Quelltext änneren]

Referenzen

[Quelltext änneren]
  1. ↑ 1,0 1,1 (fr)Cité internationale des arts. Centre national des arts plastiques (13.10.2022). Gekuckt de(n) 05.02.2025.
  2. ↑ Lëscht vun de lëtzebuergesche Kënschtler an der Cité internationale des arts am Lëtzebuerger Konschtlexikon
  3. ↑ (fr)La cité internationale des Arts. Paris Promeneurs. Gekuckt de(n) 05.02.2025.