Pullman
Pullman, corta per The Pullman Car Company, fundada par George Pullman, ia fabrica vagones de ferovia en la sentenio 19 - 20, en la "buma" de ferovias en la SUA. Pullman ia developa la vagon de letos, cual usa sua nom, a la desenio de 1880. Plu, Pullman ia pone los ance sur la plu de ferovias en la SUA, paiante la companias per junta sua vagones a sua trenes. Tra la developa rapida de produi en serie en la sentenio 19, e par prende controla de competores, la compania ia developa cuasi un monopolia de la produi e posese de vagones de letos. A la culmina en la sentenio 20 temprana, sua vagones ia casi sirca 26 milion persones per anio, e en efeto ia opera la "hotel la plu grande en la mundo".
Istoria
[edita | edita la fonte]Pos un note dorminte en sua seja en un viaja par tren de Buffalo a Westfield, New York, George Pullman ia es inspirada per desinia un vagon plu bon per pasajores cual conteni letos per dormi per tota pasajores. En la dia, la leto alta ia pote es pliada a supra. En la note, lo ia es pliada a su e la du sejas a su pliada sur lunlotra per furni un leto comfortante a su. An si esta ia es un casi alga sever par la normas de oji, lo ia es un boni grande de la orijinal. Cortinas ia furni privatia, e on ave saletas privata a cada fini de la vagon per omes e femes. La vagon prima ia es construida a la fabricerias de Chicago e Alton en Bloomington, Illinois en la primavera de 1859 con la permete de la presidente de acel compania Joel A. Matteson.
La laborores cual ia produi la vagones ia abita a la comensa en un comunia desiniada (un "vila de la compania") nomida Pullman, Chicago. La compania ia es ance conoseda per la greve sever de la laborores e xefes de la sindicato en 1894. En un basi economial, Pullman ia redui oras de labora e la salarias ma no la custa de luas, cual resulta en la greve. La laborores ia junta la American Railway Union ("sindicato de ferovias american"), gidada par Eugene V. Debs. La Brotherhood of Sleeping Car Porters ("la fratia de portores de vagones de letos"), fundada e organizada par A. Philip Randolph en 1925, ia es un de la fortes political la plu potiosa per african-americanes de la sentenio 20.
Pos la mori de George Pullman en 1897, Robert Todd Lincoln, la fio de Abraham Lincoln, ia deveni president de la compania. La compania ia clui sua fabriceria en la visinia Pullman en Chicago en 1955. Pullman ia compra la Standard Steel Car Company en 1930 en la Depresa Grande, e la compania de la junta deveni la Pullman Standard Car Manufacturing Company. La compania ia sesa produi pos la vagons Amtrak Superliner en 1982, e la resta de sua desinias ia es comprada en 1987 cuando lo ia es asorbada par Bombardier.
La nom
[edita | edita la fonte]Pullman ia institui sua compania en 1862 per construi vagones de letos lusosa cual ave tapetos, cortinas, seja tapetida, bibliotecas, tables per cartes, e un grado de servi nonparalelida. Rotas patentada dona un viaja plu cuieta e lisante ca la rotas de fero. Los es la produi la plu reconoseda par la nom "Pullman".
En la SUA, la parola "Pullman" ia es usada per refere a la vagones de letos construida e operada sur la plu de ferovias par Pullman de 1867 a desembre 1968. "Pullman" ance refere a la vagones de come en Europa cual ia es operada par la compania Pullman, a vagones-salones operada par a Compagnie Internasional des Wagons-Lits, e a los operada par la British Pullman Car Company.
La compania ia ance fabrica miles de trames e buses per usa en sites. Pos la Gera Mundal 2, cambias en transporta de autos e aviones ia resulta en un declina presipe de la fortunas de la compania.
La nometa "Pullman" ia es usada en alga sites european per la trames longa cual sembla la vagones de Pullman e cual ia es plu comfortosa ca sua presedentes. Alga de esta vagones ia core en Ciiv de 1907 e en Odessa de 1912. En la desenio de 1920, trames nomida "Pullmanwagen" en deutx ia core en Leipzig, Cologne, Frankfurt, e Zurich.
En 1963, la Mercedes-Benz 600, un auto lusosa ia es introduida, con un varia con un longia grande ia nomida la Pullman. Plu tarde, varias longa de sua S-Class ia es ance nomida Pullman.
En Elas, Italia, e America latina, "Pullman" pote refere a un bus lusosa.