Heijplaat

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Ligking vaan de Heijplaat in de gemeinte Rotterdam

De Heijplaat is 'n stadswiek vaan de Nederlandse stad Rotterdam. Ze vèlt oonder 't stadsdeil Charlois. 't Is vaan oersprunk 'n kolonie gebouwd veur de havewèrkers, en ouch noe nog ligk ze ingeklemp tösse allemaol haves. de Heijplaat umvat 41 hectaar groond en kint zoe'n 1500 inwoeners.

Ligking

[bewirk | brón bewèrke]

De Heijplaat vörmp 'n exclaaf vaan 't stadsdeil Charlois, umtot 't midde in havegebeed ligk en de haves bij geinei stadsdeil hure. De wiek ligk westelek vaan de Waalhaven en oostelek vaan de Eemhaven. Door 't grave vaan die haves is 't gebeed op 'n landtong koume te ligke; 't is euver land allein bereikbaar via de Waalhavenweg nao 't zuie. In 't noorde ligk de Nuie Maos; sjuins tegeneuver de Maos ligk 't centrum vaan Schiedam. Me kint mèt de boet (de Waterbös) nao Delfshaven, Katendrecht en wijer oostelek (veur beveurbeeld fietsers is dit de snelste verbinding nao 't centrum vaan Rotterdam). Pernis ligk hiemelsbreid twie kilometer westelek vaan de Heijplaat, meh me um 't te bereike moot me 'n väölvoud vaan deen aofstand reize.

Historie

[bewirk | brón bewèrke]

De Heijplaat waor vaanajds 'n zandplaot, die door de iewe heer waor ingepolderd en aon 't eiland IJsselmonde waor vasgemaak. De polder en 't gehuch De Heij vele oonder de gemeinte Charlois.[1]

Roond 1900 begós de have vaan Rotterdam ziech hendeg oet te breie aon de zuidkant vaan de Maos. Ganse dörper woorte gesloop en polders vergrave veur haves en arbeierswieke. In 1902 vestegde ziech tösse twie nui haves de Rotterdamsche Droogdok Maatschappij (RDM). Dees maotsjappij wouw hei e dörp veur häör arbeiers realisere; daoveur woort in 1914 de NV Bouwmaatschappij Heyplaat opgerich. In de twinteg kaom e gans tuindörp mèt kèrke, winkele, ruim hoezer en väöl greun veerdeg. Nog mie levendegheid kraog de wiek wie hei in de jaore daarteg 't quarantainecentrum kaom. Dit complex woort ouch gebruuk veur d'n opvaank vaan juudse vlöchtelinge oet Duitsland en Oosteriek.

Nao d'n oorlog kierde 't tij veur de Heijplaat. 't Quarantainecentrum waor neet mie nujeg, en mèt de koms vaan de metro in 1968 woort de veerdeens ouch euverbojeg. 't Veer had ummer nao de Heijplaat gevare; de metro naom 'nen aandere weeg. De RDM oonderheel de veerdeens daonao tot 1983 zelf. In 1996 woort de Maotsjappij opgeluf. Mèt dit isolemint en 't verdwijne vaan de oondersteunende industrie leek de wiek tot verval veurbestump. Inderdaod woorte roond 2010 versjèllende leegstoonde hoezer aofgebroke. 't Aontal winkele nump gestiedeg aof. E deil vaan de wiek steit evels oonder besjerming es rieksmonumint.

In 2008 woort, mèt de geneumde Waterbösverbinding, de veerdeens herstèld. Me hoop de wiek mèt exposities en aander artistieke manifestaties aontrèkkelek te make. Veur versjèllende besjermde, meh leegstoonde gebouwe moot me nog 'n functie vinde.

[bewirk | brón bewèrke]

Rifferenties

[bewirk | brón bewèrke]
  1. ↑ Kaart vaan Charlois oet de Gemeinteatlas vaan Kuijper (1867)
Rotterdam: Sjtadsdeile, opgelufde gemeintes en dörpsgemeinsjappe

Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg)