Hoogvliet

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Hoogvliet Gewaeze gemeinte in Nederlandj
Gevörmp	1315, 1816
Opgehaeve	1811, 1934
Opgegange in	Poortugaal, Rotterdam
Provincie	Holland, Zuid-Holland
Hoofplaats	Hoogvliet
Opperflaakde (bie opluffing)	7,65[1] km²
– daovan water:	0,40[1] km²
Inwoeners (kort veur opluffing)	1.227[2]
– deechde:	169,24[1]/km²
Lies van börgemeisters

Hoogvliet is 'n plaots in en e stadsdeil vaan de Nederlandse gemeinte Rotterdam. 't Ligk zier excentrisch, gans in 't zuidweste vaan de gemeinte, en weurt daorum neet tot de plaots Rotterdam gerekend. Veurheer waor Hoogvliet 'n agrarisch dörp, meh in 1934 woort 't, tegeliek mèt de naobergemeinte Pernis, aon Rotterdam touwgeveug. Nao d'n oorlog woort Hoogvliet drastisch oetgebouwd tot 't steideleke proporties kraog.

Historie

Hoogvliet hètde veurheer O(e)denvliet, nao Oede vaan Putten, de dochter vaan Nicolaas III vaan Putten, die dit gebeed es broedssjat mètkraog bij häören trouw mèt Wöllem IV vaan Horne. In 1326 duuk veur 't iers oonder dee naom op. Iewelaank bleef Hoogvliet 'n ambach, tot 't in 1811 bij Poortugaal woort geveug. Nao de Franse bezètting, in 1816 woort dit weer oongedoon gemaak en woort Hoogvliet 'n gemeinte, die de lèste decennia vaan zie bestoon häöre börgemeister deilde mèt Pernis. Dit bleef 't tot 1934, wie Hoogvliet tegeliek mèt Pernis door Rotterdam woort geannexeerd. Allewel tot 't snel greujend Rotterdam deze groond veur havegebeed meinde nujeg te höbbe, bleef Hoogvliet gooddeils gespaord. Pas nao d'n Twiede Wereldoorlog kaom hei verandering in: toen woort 't oersprunkelek diekdörp oetgebouwd tot 'n stad vaan tiendoezende inwoeners. In tegestèlling tot Pernis, boe veural inheimse dörpelinge woene, woort Hoogvliet 'n echte Rotterdamse veurstad.

Historische inwoenertalle

Hoogvliet greujde e groet deil vaan zie bestoon es zelfstendege gemeinte gestiedeg, meh kós roond 1900 'nen dudeleken trökval.

Jaor Aontal Greuj (gans Z-Holland) 1795 446[3] -- 1830 680[4] +52,5% 1840 714[5] +5,0% (+9,6%) 1849 799[6] +11,9% (+7,1%) 1859 855[7] +7,0% (+9,5%) 1869 961[8] +12,4% (+11,5%)

Jaor Aontal Greuj (gans Z-Holland) 1879 1.085[9] +26,9% (+16,8%) 1889 1.141[10] +5,2% (+18,2%) 1899 1.036[11] -9,2% (+20,5%) 1909 1.053[12] +1,6% (+21,5%) 1920 1.130[13] +7,3% (+20,7%) 1930 1.227[2] +8,6% (+16,6%)

Opmerkinge

• De polders Oud- en Nieuw-Engeland zien in de volkstèlling vaan 1795 apaart opgenome; ze hadde daan 26 inwoeners. Dit bringk de greuj tösse 1795 en 1830 op +44,1%.
• Genormaliseerd nao 'nen tied vaan tien jaor kump de greuj tösse 1795 en 1830 oet op 12,8% (zoonder d'n Oud- en Nieuw-Engelandse Polder) daan wel 11,0% (mèt de Engelandse Polders).

Rillatief oontwikkeling vaan 1830 tot 1971

(v₁₈₃₀=100)

Blauw: Provincie Zuid-Holland
Greun: Gemeinte Hoogvliet

Aonzien

Hoogvliet besteit of bestoont oet 'n aontal polders, boe-oonder d'n Oudelandse Polder, de Nieuw-Engelandse Polder en de Meeuwenplaat. De dörpsbebouwing waor geconcentreerd aon de westeleken diek vaan d'n Oudelandse Polder.^[14] Allewijl zien de polders (op get opebaar greun nao) compleet volgebouwd. Vaan de dörpsstraot is e deil bewoerd gebleve; hei kin me nog väöl aw hoezer vinde. 't Stök diek boe de kèrk aon stoont is wel aofgegrave; de kèrk zelf is evels gespaord gebleve. Hoogvliet kint gein rieksmonuminte,^[15] meh wel e paar gemeinteleke monuminte.^[16]

Bevolking

De bevolking bedreug intösse e väölvoud vaan wat 't zelfstendeg dörp oets heet gekind. In 2012 woende hei in totaol 34.065 lui.^[17]

Etnische samestèlling

Hoogvliet heet 'n diverse bevolking, meh is witter es Rotterdam gemiddeld. In 2012 waor 66% vaan de bevolking otochtoon, 9% westers allochtoon en 25% neet-westers allochtoon, daovaan 1%pt. Marokkaans, 6%pt. Antilliaans, 9%pt. Surinaams, 3%pt. Turks en 6%pt. vaan aander aofkoms. Hoogvliet-Noord is allochtoonder es Hoogvliet-Zuid.^[17]

Dialek

Vaanaajds weurt in Hoogvliet 't Wes-IJsselmonds gesproke, 'n awwerwèts Hollands dialek wat me ouch sprik in Pernis, Poortugaal en Rhoon (allewel tot dat dialek oosteleken invlood heet). Dit dialek is inger verwant aon de tongvalle vaan Voorne-Putten es aon die vaan Oost-IJsselmonde.^[18] Of 't nog weurt gesproke is de vraog; de inheimse bevolking vaan Hoogvliet is zwoer in de minderheid.

Verkier

Noordelek vaan Hoogvliet löp d'n A 15. De Rotterdamse stadsweeg s102 geit dweers door 't stadsdeil heer en kump via Poortugaal en Rhoon oetindelek in Charlois (Rotterdam-Zuid) oet. De s102 hiet Groene Kruisweg en löp van'e rand van Den Briel/Brielle langes Spijkenisse dweers door 't stadsdiel noar Charlois.

Hoogvliet weurt sinds 2002 aongedoon door de metro vaan Rotterdam, en wel door lijn C (vreuger de Calandlijn) en lijn D. Lijn C begint in Capelle aan den IJssel en geit via 't Rotterdams stadscentrum nao Spijkenisse. Lijn D begint bij statie Rotterdam Centraol en geit via 't centrum en Rotterdam-Zuid oetindelek ouch nao Spijkenisse. In 't stadsdeil Hoogvliet zien drei staties: Tussenwater, Hoogvliet en Zalmplaat.

Politiek

Hoogvliet waor, es stadsdeil, tot 2014 ein vaan de deilgemeintes vaan Rotterdam. Naodeen heet me de deilgemeinteraode gereduceerd tot gebeedscommissies, boe ouch veur kin weure gestump.

Partij	2006	2010	2014
Leefbaar Rotterdam	-	5	4
Nieuw Hoogvliet	-	2	4
PvdA	7	4	2
BBH	-	-	2
CDA	2	2	1
VVD	1	1	-
Initiatiefgroep Boomgaardshoek en Platen	9	5	-
Totaol	19	19	13

In 2006 vörmde PvdA en IBP hei same 'n coalitie, in 2010 bestoont 't colleesj oet Leefbaar Rotterdam, Nieuw Hoogvliet en PvdA.

Waope

De gemeinte Hoogvliet is noets e waope verliend. De gemeinte vroog in 1817 wel um e waope, wat ziech zoe liet umsjrieve:

In keel (roed) drei sjèldsjes, gezat 2-1, vaan goud, belaoje mèt vief zèspuntege stare vaan lazuur (blauw), gezat 2-1-2.

Dit waope is gebaseerd op 't waope vaan de aw hierlekheid Poortugaal (en daomèt oetindelek op 't waope vaan Portugal). 't Is neet bekind boeveur d'n Hoege Raod vaan Adel 't neet heet verliend.^[19]

Bronne

Dit artikel is deil gebaseerd op 't corresponderend Nederlandstaoleg artikel, en wel in dees versie.

Rifferenties

1. Volkstèlling 1930 - Oppervlaakde en diechheid
2. Volkstèlling 1930
3. Volkstèlling 1795 - Holland
4. Volkstèlling 1830
5. Volkstèlling 1840 - Zuid-Holland
6. Volkstèlling 1849 - Zuid-Holland
7. Volkstèlling 1859
8. Volkstèlling 1869
9. Volkstèlling 1879 - Zuid-Holland
10. Volkstèlling 1889 - Zuid-Holland
11. Volkstèlling 1899 - Zuid-Holland
12. Volkstèlling 1909 - Diechheid vaan de bevolking
13. Volkstèlling 1920
14. Hoogvliet ind jaore 1860, in de Gemeinteatlas vaan Kuijper
15. Rieksmonuminte in 't Middegebeed vaan Hoogvliet. N.B.: Ouch zeuke op de aander poscodes lievert niks op.
16. Gemeinteleke monuminte in Rotterdam
17. CBS Statline - Inwoeners en allochtone in Hoogvliet
18. HET DIALECT VAN CHARLOIS (1):DE DIALECTEN VAN HET EILAND IJSSELMONDE
19. Heraldrywiki - Hoogvliet

Extern links

• Website vaan 't stadsdeil

Rotterdam: Sjtadsdeile, opgelufde gemeintes en dörpsgemeinsjappe
Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg)