Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
't Limburgs Dagblad ies 'n gezèt die versjient in Nederlands Limburg. De gezèt besjteit saer 26 oktober 1918 es opvolger van de Nieuwe Limburger courier. 't Limburgs dagblad neumde zich toen 'n katholiek dagblaad veur de miensjtreek.
In 1936 woort door 't Limburgs dagblad 't provinciaal nuujsblaad, De Limburger dat in 1921 veur 't ièrsj van de peersj rolde in Zittert euvergenómme.
In 1946 ginge de drie Limburgse gezètter: 't Limburgs Dagblad, De Maas- en Roerbode (Remung) en 't Dagblad van Noord-Limburg (Venlo) 'n redactioneel samewèrkingsverbónd aan ónder de naam Limburgia pers.
Vanaaf 1972 waor ze 'n ónderdeil van 't Telegraafconcern. 't Limburgs Dagblad vörmp same mèt Dagblad de Limburger saer 2001 de Mediagroep Limburg. De Telegraaf haet in 2006 de Mediagroep Limburg verkoch aan de Britse investeringsmaatsjappie Mecom. De gezètter maoge van de Nederlandse Mededingingsautoriteit neet fusere.
In 2004 houw de gezèt 'n oplaag van 62.382 exemplare. De hoofredactie van 't Limburgs Dagblad ies gevestig in Zittert. 't Limburgs Dagblad versjient in versjillende edities veur Noord-Limburg, Miedde-Limburg, de Westelike Miensjtreek, Parksjtad Limburg en Mestreech-Heuvelland.
In vreuger jaore woort 't Limburgs Dagblad in de volksmónd de gezèt van Heerle geneump en Dagblad de Limburger waor de gezèt van Mesjtreech. Zoa ies ouch dudelik woa de meiste abonnees van dees 2 gezètter woonde.
De veurluiper van 't Limburgs Dagblad waor De Limburger Courier. 't Ièrsjte nummer van dees gezèt versjeen op 3 april 1847. Tot 1870 woort 't nuujs bekans gans in 't Duutsj gebrach.
In 1901 verhuusde de gezèt nao Mestreech um vanaaf dan in gans Limburg te versjiene. 'n Jaor later (1902) kaom in Heerle (es nuuj gezèt) um de twiè daag De nieuwe Limburger koerier oet.
In 1947 woort 't De Limburger koerier verbao um te versjiene, vanwege collaboratie in de oorlog.
20 Jaor lank maog gein blaad versjiene ónder de naam De Limburger koerier.