Gherdëina Ronda Express
| Articul per Ladin Gherdëina | 
|
L Gherdëina Ronda Express (inuem adurvà sun la ferata: Valgardena Ronda Express) ie na furnadoia sun scines te Gherdëina. La ferata va sun una na scina tres n tunel che culeghea Ruacia cun la stazion a val de Col Raiser japé de la valeda de Ncisles, tramedoi lueges tl chemun de Sëlva daujin al cunfin cun Santa Cristina. La arjonj na velozità de 36 km/h y fej n deslivel de 142 metri cun na pendënza de 11,5 %. La ie bona de traspurté nfin a 2000 persones a l'ëura.
Storia
[mudé | muda l codesc]L Gherdëina Ronda Express ie unì frabicà per miuré l culegamënt cui schi de la Gherdëina Ronda, na raida da fé cui schi che culeghea Urtijëi cun Sëlva y passa tra l'auter per Secëda y Ciampinëi. L tòch tres l luech de Santa Cristina univa dant fat puscibl cun na curiera che purtova i schiadëures. Per via dl numer aut de schiadëures che cresciova da ann a ann deventova la curiera na soluzion manco atrativa, nce per via che la ne fova na soluzion nia drë cumota per i passajieres, suënz strënc te na pitla curiera. Per ti vester a chësc problem an tëut la dezijion de frabiché n tunel per culeghé Ruacia y la stazion de Col Raiser.