Il ragazzo della via Gluck (la cansù)

Il ragazzo della via Gluck l’è öna cansù del Fevrér del 1966 cantada dal Adriano Celentano. La cansù l’éra stacia presentada al Festival di Sanremo e ‘l Celentano l’éra stacc eliminàt söbet a la prima sira, ma pò la cansù l’à endìt tat e l’è dientada öna di sò cansù piö famuse.

L’è egida fò come 45 gir, ol B side l’éra Chi era lui; i paròle i è del Luciano Beretta e del Miki Del Prete, la müşega del Adriano Celentano.

Ol Giorgio Gaber n’à facc öna cover söbet in de l’istès an e pò l’à scricc in rispòsta a la cansù del Celentano, per grignà, öna sò cansù che l’à ciamàt La risposta al ragazzo della via Gluck.

In del 1967 la cansù l’è dientada la prima tracia de ün album che l’ s’è cimamàt pròpe Il ragazzo della via Gluck.

La cansù l’è ‘mpó autobiogràfega e la cónta sö 'l dispiasèr de ü s-cèt che l’ gh’à de lasà la sò bröta cà de periferéa ‘n mès a i pracc per indà a stà ‘n sità, ‘ndóe la cà l’è bèla, ma se respira cemènt e l’ se domanda, şamò ‘n del 1966, perché i l’la móca piö de fà sö di cà.

Se pènsa che chèl is-cèt l’ sìes pròpe ‘l Celentano che l’istàa de cà a l’Ortiga a la pereferéa de Milà apröf a binare del tré: de fati la cansù la dis “e sentirò l’amico treno che/fischia così.... ua ua”.

Chèla cansù ché la endìt piö de ü miliù de còpie e l'è stacia 'n tèsta a la hit parade 'nsèma a Nessuno mi può giudicare de la Caterina Caselli.