L'Estaca
L'Estaca a l'è on cant de resistenza catalan del 1968 scritt del Lluís Llach. Scritta in catalan, a l'è però deventada famosa in tutta la Spagna 'me cant de resistenza al franchism e l'è stada voltada in tanc alter lengov. Vuna di sò traduzion, Mury, a l'è deventaa l'inn del sindacaa Solidarność e, in general, de la revoluzion in Polonia contra el totalitarism comunista, e 'na version in arab a l'éra cantada in di event de la revoluzion tunisina del 2011. La version originala a l'è stada cantada in la resistenza popolara a favor del referendum per l'autodeterminazion de la Catalogna del 2017 insemma a l'inn nazional Els Segadors.
Test
[Modifega | modifica 'l sorgent]El test el parla de ona ciciarada arent a on porton in tra el personagg principal e 'l sò nono Siset, e 'l ghe domanda se 'l ved nò el pal a che hinn tucc ligaa e lu el ghe respond che l'unica soluzion a l'è de giontàss e de lavorà tucc insemma per s'ceppàll e guadagnà la libertà.
Traduzion
[Modifega | modifica 'l sorgent]A l'è stada voltada in d'un fracch de lengov, in frances a gh'è Le Pieu del Marc Robine e L'Estaque del Marc Ogeret. El catalan-basch Gorka Knörr Borràs l'ha daa foeura una version in basch ciamada Agure zaharra ("el vegg veggent").
In del 1995, per i 50 agn de la liberazion d'Italia, el grupp italian de lengua occitana Lou Dalfin el canta la soa version in occitan ciamada Lo Pal.
In del 2015 el grupp cors I Chjami Aghjalesi e la cantanta Jenifer Bartoli hann cantaa la version corsa Catena.
In lombard, a gh'è ol Pal, in dialett bergamasch cantada de la band F.B.A. e la Pertega dei Lombard Street.