Numer complessiv del Richardson

Quest articol chì l'è scrivuu in lombard, grafia milanesa.

El Number complessiv del Richardson o BRN (da la lengua inglesa Bulk Richardson Number)^[1] in meteorologia a l’è el rappòrt senza unitaa de misura intra la turborenza tèrmica de l’atmosfera (o ben la spinta convettiva rappresentada travèrs l’indès CAPE) e la turborenza cinética caosàda da la fòrbes del vent. L’è doperàa per mostrà la stabilitàa dinàmica de l’atmosfera e la formazion de la turborenza.

L'indes BRN l’è dopràa despèss in meteorologia grazie a la disponibilitàa di dati di radio-sondagg e di prevision meteorològich numérich che supplissen ai misuràd de vent e temperadura in di precis pont in del spazzi.^[2]

Formola

${\displaystyle BRN={\frac {(g/T_{v})\Delta \theta _{v}\Delta z}{(\Delta U)^{2}+(\Delta V)^{2}}}}$

indoe g a l’è l’accelerazion de gravità, T_v a l’è la temperadura virtual assoluda, Δθ_v a l’è la differenza de temperadura potenzial virtual travèrse el stratt de spessór Δz (altezza vertical de sòlit tra 500m e 6km), e ΔU and ΔV hinn i variazion di component orizzontal del vent in del’istèss stratt.^[1]

El BRN el pò anca vèss scrivùu in funzion del’ìndes CAPE e de la fòrbes del vent infra 0 e 6 km de altezza chichinscì:^[3]

${\displaystyle BRN={\frac {CAPE}{(0,6\Delta w_{500m-6km})^{2}}}}$

indoe Δw 500m-6 km a l’è el vettor de la fòrbes del vent infra 500m e 6 km de altézza,

Valor critich e interpretazion

• Di valór alt (50-100) designen ambient instabil e/o cont ona bassa fòrbes del vent.

Quèj valor chì hinn opportùn per el svilupp de temporaj a cellula multipla. ^[4]

• Di valór bass (0-50) designen ona instabilitàa débol e/o ona fòrta fòrbes del vent;

De sòlit di valor infra 10 e 50 designen condizion giust per el svilupp de temporaj a super-cèllula.Di valor de BRN comprés intra 35 e 50 mètten in cunt el svilupp de tutt e du i tipi de temporaj: a cèllula multipla e a super-cèllula.^[3]Di valor pussée bass de 10 designen 'na bassa possibilità de fòrt temporaj ^{[5] [4]} El 75% di super-cèllul el se sviluppa in condizion de BRN<17 ^[3], ma l'è anca vèra che el 50% di temporaj el se sviluppa con BRN<20.

Donca a gh'è ancasi de dì, tuttamanch, che 'l BRN in deperlù l'è no assée de prevedè che tipo de temporal el se svilupparà, ma gh'è de considerà di alter ìndes de valutà de comè che la troposfera l'è in complèss dispòsta ai mòti girànt.^[3]

Riferiment

1. Bulk richardson number. AMS Glossary. American Meteorological Society. Recuveraa el 2015-12-29.
2. Stull, Roland. An Introduction to Boundary Layer Meteorology. 101 Philip Drive, Norwell, MA 02061, USA: Kluwer Academic Publishers, 177–180. ISBN 978-90-277-2769-5. 
3. Gabriele Formentini (2009). Temporali e Tornado. Alpha Test, 133-134. ISBN 978-88-483-0992-9. 
4. Glossary (EN-US). NOAA National Weather Service. Recuveraa el 2015-12-29.
5. http://www.fenomenitemporaleschi.it/radiosondaggio.htm