Bijayendrawarman adolah namo salah surang yuwaraja (rajo mudo/pangeran) dari Karajaan Malayupura, nan bakuaso pado abaik ka-14 di daerah Pasaman, Sumatera Barat.[1][2] Namo Bijayendrawarman disabuik dalam Batu basurek Lubuak Layang, nan ditamuan di Pancahan, Rao Salatan, Pasaman.[1] Dikatoan baso inyo mandirian sabuah stupa, di suatu tampek nan dinamoan Parwatapuri.[1][2]
Kok diliek sacaro paleografi, bantuak tulisan pado batu basurek tu sarupo jo tulisan lainnyo nan dikaluaan salamo pamarentahan Rajo Adityawarman.[1] Iko aratinyo ado duo yuwaraja di maso nan samo; iyolah Ananggawarman nan disabuik dalam Batu basurek Saruaso II,[3][4] sarato Bijayendrawarman nan kamungkinan adolah anak pulo dari Rajo Adityawarman.[1][5] Tampek kakuasoan Bijayendrawarman nan talatak di wilayah perbatasan karajaan (Pasaman), buliah jadi manunjuakan baso inyo adolah anak nan mudo, nan diangkek jadi panguaso untuak daerah tu.[1]
Kamungkinan nan lain adolah Bijayendrawarman baubuangan jo Akarendrawarman, iyolah panguaso karajaan sabalun Rajo Adityawarman.[1]