Musajik Jamik Taluak Bukittinggi

Musajik Jamik Taluak Bukittinggi pado Februari 2020

Musajik Jamik Taluak adolah salah satu masjid tuo di Indonesia nan talatak di Nagari Taluak IV Suku, Kecamatan Banuhampu, Kabupaten Agam, Sumatra Barat. Latak musajik iko dakek jo perbatasan Kota Bukittinggi, sahinggo disabuik juo sabagai Musajik Jamik Taluak Bukittinggi.

Pambangunan musajik iko diprakarsai dek Haji Abdul Majid pado taun 1860, nan pado mulonyo hanyo tabuek dari kayu baratok ijuak.[1] Musajik iko sempat mangalami babarapa karusakan agak parah akibaik gampo, sarupo kajadian taun 2007 nan mangakibaikan musajik iko rusak parah. Meski alah babarapo kali dilakukan parbaikan, kaaslian musajik iko masih tetap dipertahankan.

Arsitektur nan dimiliki musajik iko sacaro kasaluruahan dipangaruahi dek corak Minangkabau. Pangaruah Arab datang kamudian ditandoi jo dibangunnyo minaret kamudian disusul pambuekan fasad. Dengan arsitektur nan dimilikinyo, musajik iko manjadi salah satu musajik nan paliang banyak difoto salamo maso Pemerintahan Hindia Belanda, nan kini dikoleksi dek Tropenmuseum di Amsterdam, Belanda.

kiniko slain digunoan untuak aktivitas ibadah umat Islam, musajik iko digunoan pulo sabagai sarana pendidikan agamo bagi masyarakaik, bahkan alah manjadi salah satu daya tarik wisata terkenal baiak di Kabupaten Agam maupun di Kota Bukittinggi.

Musajik Jamik Taluak Bukittinggi kiniko barado dalam pengelolaan Balai Pelestarian Cagar Budaya (BPCB) Sumatera Barat.[2]

Arsitektur

[suntiang | suntiang sumber]

Bangunan utamo musajik iko, nan marupoan ruang salat, babantuak persegi baukuran 13 × 13 meter.[1] Di arah tenggaranyo, tadapek sarambi nan baguno sabagai tampek paraliahan dari lua k bagian dalam dengan panjang 13 meter dan lebar 3 meter. Sarambi tasabuik bukan marupoan teras mungko, sabab punyo dindiang jo babarapo jendela. Janjang masuak ka sarambi indak tadapek di bagian tengah fasad, malainkan di ujuang kida jo suok nan masiang-masiang punyo atok surang. Kasado atok, tamasuak atok ruang salat kecuali atok minaret, babantuak piramida barundak-undak, nan umum dimiliki musajik-musajik tuo di Nusantara. Hanyo bedanyo, dibuek dengan kamiringan nan jauah labiah tajam dan pamukaan nan cakuang; cocok untuak daerah baiklim tropis karano dapek labiah capek mangaliran aia hujan ka bawah.[1] Atok-atok tasabuik masiang-masiang berdenah bujur sangkar dan tadiri dari tigo tingkek. Di antaro satiok tingkek, tadapek lubang untuak masuaknyo cahayo atau ventilasi.[1]

Minaret

[suntiang | suntiang sumber]

Musajik iko dilengkapi jo sabuah minaret nan tagaki tapisah dari bangunan utamo, dek masyarakaik satampek disabuik juo jo "manaruh". Meski alum dikatahui pasti bilo dibangunnyo minaret tasabuik, di Minangkabau minaret dengan bantuak nan samo tacataik alah dipakanaan pado awa abaik ka-19 dek sajumlah reformis lslam nan dikana sabagai Kaum Padri.[3]

Minaret musajik iko tadiri dari tigo bagian, nan di dalamnyo tadapek janjang babantuk spiral. Dinding-dindingnyo dipanuahi hiasan bercorak Arabes dan Persia.[1] Di antaro satiok bagian tadapek balkon nan mangalialianginyo. Bagian pertamo yang marupoan bagian tabawah dihiasi dek hiasan bacorak Persia barupo plengkung patah mati. Bagian kaduo, bantuknyo samakin ka ateh samakin ketek dihiasi hiasan bacorak Arabes barupo kaligrafi. Bagian katigo atau bagian taateh, indak badindiang dengan atok babantuk kubah bawang, mirip jo atok minaret musajik-musajik kuno di India.[1]

Bangunan nan lain

[suntiang | suntiang sumber]
Gambar Musajik di awa abaik ka-20

Di dalam lingkungan musajik iko tadapek tigo kolam atau disabuik luhak dalam bahasa satampek nan baguno untuak maambiak wuduak, dan biasanyo di dalamnyo juo dipaliharo babagai jinih ikan air tawar. Tigo luhak musajik iko posisinyo barado di mungko, sampiang suok, jo balakang. Salain luhak, tadapek pulo bangunan beratapkan ijuk yang runcing layaknyo atok pado Rumah Gadang yang dimanfaatkan sabagai lumbuang.[1] Dengan demikian, kompleks musajik iko malambangkan eratnyo kaitan antaro agamo jo kehidupan sosial ekonomi masyarakaik satampek.[1]

Liek pulo

[suntiang | suntiang sumber]

Rujuakan

[suntiang | suntiang sumber]
  1. ↑ a b c d e f g h Balai Kajian dan Pengembangan Budaya Melayu.
  2. ↑ bpcbsumbar (2017-11-19). "Masjid Jami' Taluak". Balai Pelestarian Cagar Budaya Sumatera Barat (dalam bahasa Inggris). Diarsipkan dari versi asli tanggal 2019-09-06. Diakses tanggal 2019-10-07. 
  3. ↑ Nas, P. & De Vletter, Martien 2009, hlm. 68.
Daftar pustaka
  • "Masjid Jami Taluak Bukittinggi". Melayu Online. Balai Kajian dan Pengembangan Budaya Melayu. Diarsipkan dari versi asli tanggal 2017-06-25. Diakses tanggal 2012-07-28. 
  • Nas, P.; De Vletter, Martien (2009). Masa Lalu dalam Masa Kini: Arsitektur di Indonesia. Gramedia Pustaka Utama.