Tuanku Rao

Infobox orangTuanku Rao
Biografi
Lahia1790 Edit nilai pada Wikidata
Minangkabau Edit nilai pada Wikidata
Kamatian1833 Edit nilai pada Wikidata (42/43 tahun (id) terjemahkan)
Kalompok etnisUrang Minangkabau Edit nilai pada Wikidata
AgamoIslam Edit nilai pada Wikidata
Kagiatan
KarajoImam Edit nilai pada Wikidata

Tuanku Rao (laia, 1790 - wafaik, 1833 pado umua 43) adolah panglimo parang sarato tokoh Pidari takamuko. Baliau adolah salah surang panyeba Islam di Tanah Batak.

Asa usua

[suntiang | suntiang sumber]

Tuanku Rao laia dari pasangan Minangkabau nan barasa dari Rao, Pasaman, Sumatera Barat. Ayahnyo barasa dari Taruang-Taruang, Rao, sadangkan ibunyo dari Padang Mantinggi, Rao.[1]

Pado maso remaja Tuanku Rao mandalami ilmu agamo Islam di surau Tuanku Nan Tuo, Koto Tuo, Agam, lalu kudian malanjuik-annyo di Bonjol. Sasudah manyalasaian ilmu fiqihu al-Islam jo predikat thayyib jiddan (sangek mamuehan), baliau dianugarahi gala Fakih Muhammad.

Fakih Muhammad kudian manikah jo surang padusi bangsawan, putri Yang Dipatuan Rao. Karano mintuonyo bukan surang panganuik Wahabi, sarato indak basumangaik untuak manantang panjajahan Balando, mako pimpinan pamarentahan Rao diambiak aliah dek minantunyo, nan kudian bagala Tuanku Rao.[2]

Garakan Pidari

[suntiang | suntiang sumber]

Pado 1816, Tuanku Nan Barampek mangiriangi Fakih Muhammad pulang ka kampuang halamannyo untuak manyebaan hukum Islam. Di Rao, Yang Dipatuan Daulat Padang Nunang, nan punyo patalian darah jo Karajaan Pagaruyuang, indak ragu-ragu menyosialisasian hukum Islam tu kapado anak kamanakan.

Kudian basamo kamanakannyo, Bagindo Suman jo Kali Alam, baliau manyebaan ajaran Pidari ka Languang, Muaro Sitabu, Muaro Bangku, Koto Rajo, Silayang, sampai ka Rokan Hulu, Riau. Di wilayah Rokan baliau batamu jo kawan sapaguruannyo, Tuanku Tambusai. Basamo Tuanku Tambusai, baliau maislaman masyarakaik Padang Sidempuan, Kotanopan, Padang Lawas, Bakkara, sarato sajumlah pakampuangan di bibia Danau Toba.

Manantang Balando

[suntiang | suntiang sumber]

Tuanku Rao adolah salah surang panglimo Parang Pidari nan tangguah, jo gigiah malakuan palawanan kapado pamarentah kolonial Balando di wilayah Pasaman, Kotanopan, Padang Lawas, hinggo Padang Sidempuan. Sasudah pasukan Balando manakluak-an Matua jo Lubuak Sikapiang, pado bulan Oktober 1832 Rao bahasil ditakluak-an. Letnan Bevervoorden, surang kumandan pasukan Balando, manamui Tuanku Rao lalu mambujuaknyo supayo manyarah. Dalam patamuan tu, Tuanku Rao badalih ka pai haji sarato manyarahan baliak pimpinan pamarentahan Rao kapado mintuonyo, Yang Dipatuan Rao.[3]

Sasudah patamuan tu, Tuanku Rao manariak diri lalu basambunyi di dalam hutan. Namun sumangaik nan dibaoan Tuanku Tambusai nan baru pulang dari Makkah, manyumangaik-inyo untuak taruih bajuang malawan Balando. Untuak mamulusan panyebaran paham Pidari ka tanah Batak, Tuanku Rao malakuan panyarangan kapado patahanan Balando di Aia Bangih. Pado tanggal 29 Januari 1833, Tuanku Rao dihadang pasukan Balando. Palawanannyo dapek dipatahan, lalu baliau mandarito luko barek akibaik dihujani paluru. Kudian baliau dinaiak-an ka ateh kapa untuak diasiangan. Alun lamo barado di ateh kapa, Tuanku Rao manamui ajanyo. Diduga jenazahnyo dibuang ka lauik dek tantara Balando.[4]

Kontroversi

[suntiang | suntiang sumber]

Dalam buku Pongkinangolngolan Sinambela gala Tuanku Rao: Terror Agama Islam Mazhab Hambali di Tanah Batak, 1816-1833, Mangaradja Onggang Parlindungan manulih riwayat iduik Tuanku Rao sarato sajarah Parang Pidari.[5] Namun di dalam buku tu, banyak tadapek kajanggalan sarato fakta-fakta nan indak dapek ditarimo dek sajarawan. Diantaro panyatoan Parlindungan nan dinilai sasek adolah asa-usua Tuanku Rao nan disabuiknyo barasa dari suku Batak bamarga Sinambela, sarato marupoan surang kamanakan Sisingamangaraja X. Katidakakuratan lainnyo adolah manganai taun kamatian Tuanku Rao nan disabuik-annyo pado taun 1921.

Namun buku tu alah dibantah dek banyak ahli sijarah jo agamo Islam. Antaro lain adolah Hamka, malalui bukunyo Tuanku Rao : Antara Khayal dan Fakta. Dalam buku ko Hamka mambeberan kabohongan nan diungkapan Parlindungan, sakaligus maluruihan fakta manganai Tuanku Rao jo Parang Pidari. [6]

Rujuak-an

[suntiang | suntiang sumber]
  1. ↑ Marjohan, Mempertimbangkan Kepahlawanan Tuanku Rao, Padang Today, 2-4-2009
  2. ↑ Mohammad Said, Sisingamangaradja XII
  3. ↑ Muhammad Radjab, Perang Paderi di Sumatera Barat (1803-1838), Balai Pusataka, 1964
  4. ↑ Mohammad Said, Sisingamangaradja XII
  5. ↑ Mangaradja Onggang Parlindungan, Pongkinangolngolan Sinambela gelar Tuanku Rao: terror agama Islam mazhab Hambali di tanah Batak, 1816-1833, Tandjung Pengharapan, 1964
  6. ↑ Hamka, Tuanku Rao : Antara Khayal dan Fakta, Bulan Bintang, 1974
  Artikel batopik biografi tokoh Indonesia ko baru babantuak rancangan. Sanak dapek mambantu Wikipedia mangambangannyo.