| Демофест | |
|---|---|
| Локација | Тврдина Кастел, Бања Лука, Босна и Херцеговина |
| Години активност | 2008-денес |
| Датум | Три дена во јули |
| Жанр | Рок, Панк, Метал, Хип-хоп, Реге |
| Портал | jelendemofest.org |
Демофест (цел назив: Јелен Демофест) е музички фестивал кој секоја година се одржува на тврдината Кастел во Бања Лука, град кој е втор по големина во Босна и Херцеговина. Фестивалот е основан во 2008. година, со идеја да се даде можност за развој на новите бендови и да се помогне во оживувањето на рок сцената на просторот на поранешна Југославија, а денес е еден од најголемите фестивали за демо бендови во југоисточна Европа и еден од најголемите бесплатни фестивали во тој регион.
Демофест содржи натпреварувачки и ревијален дел. Учеството во натпреварувачката програма е отворено за сите авторски демо бендови кои свират рок, панк, поп, метал, хип-хоп или реге жанр, а потекнуваат од Босна и Херцеговина, Македонија, Словенија, Црна Гора, Хрватска и Србија. Во ревијалната програма на фестивалот учествуваат регионални и светски музички ѕвезди, а некои од најпознатите имиња кои настапите се Guano Apes, Kosheen, Gentleman, Stereo MCs, Kelis, Fun Lovin' Criminals, Кирил Џајковски, Dubioza Kolektiv, S.A.R.S., Psihomodo Pop, Partibrejkers и други. На Јелен Демофест настапиле и неколку македонски бендови меѓу кои и Визија, Smoke Shakers, Dead shot, Brooka, Dan Rice и други.
Во периодот од 2008 до 2015 година, за учество на фестивалот се пријавиле преку 3.000 демо бендови, а во ревијалната програма настапиле 61 изведувач. Влезот на сите фестивалски содржини е бесплатен, а во последните неколку години секое издание на фестивалот привлекува преку 40.000 посетители.[1]
Демофест во 2013 година е внесен на списокот на UNESCO, како проект од посебно значење за поврзување и развој на културите во земјите во Европа.[2]