Македонски Авиотранспорт

Македонски Авиотранспорт
MAT Macedonian Airlines

IATA ICAO Ознака IN MAK MAKAVIO
Основан	16 јануари 1994
Почнал со работа	23 јуни 1994
Престанал со работа	1 септември 2009
Работни бази	Аеродром „Александар Велики“, Скопје Аеродром „Св. Апостол Павле“, Охрид
Летала	16 (вкупно)
Одредишта	16 (вкупно)
Седиште	Скопје
Раководство	Златко Петровски (претседател)

Македонски Авиотранспорт (на англиски: Macedonian Airlines), скратено МАТ, била македонска авиокомпанија и еден од двата национални авиопревозници кои ги имала Македонија, со седиште во тогашниот Аеродром „Александар Велики“ во Скопје. Основана е во 1994 година. Компанијата летала на одредишта во Европа. Во текот на своето постоење користела вкупно 16 летала. Престанала со работа во 2009 година.

Историја

Авионот Боинг 737-200 на МАТ во Цирих, декември 1994 г.

Компанијата МАТ била основана на 16 јануари 1994 година, но својот прв лет го извела на 23 јуни истата година од аеродромот во Скопје до Аеродромот Клотен во Цирих, Швајцарија со леталото Боинг 737-200. Статусот на национален авиопревозник компанијата го добила во 2000 година по договор со македонската Влада и истиот требал да важи за наредните 10 години.

Во периодот од 2008 па сè до нејзиното распуштање во септември 2009 година, компанијата бележи неколку негативни настани. Во декември 2008 година ѝ е забранет влез во воздушниот простор на Германија и Италија поради неплатени давачки во периодот од 1999 до 2005 година. Со тоа таа ги губи одредиштата до Берлин, Диселдорф, Хамбург и Рим.

Грција исто така ѝ забранила влез на МАТ во нејзиниот воздушен простор, но поради политички причини околу спорот за името Македонија. Ова сепак било решено до одреден степен со договор во 2009 година, кога на авиопревозниците од двете земји им било дозволено да влегуваат во воздушните простори, но според истиот македонските авиопревозници не можеле да слетуваат на аеродромите во Грција.

Во 2009 година раководството на МАТ отпуштило дури 70 од вкупно 180 вработени. Во март истата година српскиот национален авиопревозник Јат Ервејс ги соопштил за своите намери да ги преземе поголемиот дел од акциите на МАТ. Компанијата го губи својот Сертификат за авиотранспорт и на првиот ден од месец септември 2009 година престанува со работа.

Одредишта

Во текот на своето постоење, Македонски Авиотранспорт имал летови до вкупно 16 одредишта. Тој летал меѓу домашните аеродроми „Александар Велики“ во Скопје и „Св. Апостол Павле“ во Охрид, како и низ уште 14 аеродроми во Европа. Одредиштата до аеродромите Берлин-Шенефелд, Диселдорф и Хамбург во Германија и аеродромот „Леонардо да Винчи-Фјумичино“ во Рим, Италија биле прекинати во декември 2008 година поради неплатените давачки.

Список на одредиштата

Ова се сите одредишта кои ги нудила компанијата во текот на своето постоење. Аеродромите на списокот се подредени според азбучен ред.

• Аеродром „Александар Велики“, Скопје
• Аеродром Амстердам, Холандија
• Аеродром Анталија, Турција
• Аеродром Берлин-Шенефелд, Берлин, Германија
• Аеродром Виена, Австрија
• Аеродром „Винченцо Белини“, Катанија, Италија
• Аеродром Гетеборг Лендветер, Гетеборг, Шведска
• Аеродром Диселдорф, Германија
• Аеродром Истанбул Ататурк, Истанбул, Турција
• Аеродром Копенхаген, Данска
• Аеродром Леонардо да Винчи-Фјумичино, Рим, Италија
• Аеродром Палма де Мајорка, Шпанија
• Аеродром „Св. Апостол Павле“, Охрид
• Аеродром Хамбург, Германија
• Аеродром Цирих, Швајцарија
• Аеродром „Шарл де Гол“, Париз, Франција

Флота

• 
  Боинг 737-200, три летала
• 
  Боинг 737-300, четири летала
• 
  Боинг 737-500, две летала
• 
  Даглас DC-9, три летала
• 
  Јаковлев Јак-42, едно летало
• 
  Канадер CRJ-900, едно летало
• 
  Туполев Ту-154, едно летало

Поврзано

• Палер Македонија
• Јат Ервејс

Надворешни врски

• Македонски Авиотранспорт на Ризницата ^?
• (англиски) Македонски Авиотранспорт на rzjets.
• (англиски) Македонски Авиотранспорт на Planespotters.