ഇന്ത്യൻ ഭരണഘടനയുടെ ഏഴാം ഷെഡ്യൂളിൽ പ്രതിപാദിച്ചിരിക്കുന്ന 3 പട്ടികകളിൽ ഒന്നാണ് കൺകറന്റ് ലിസ്റ്റ് അഥവാ സമവർത്തി ലിസ്റ്റ് (Concurrent List). കേന്ദ്ര-സംസ്ഥാന സർക്കാരുകൾ ചേർന്ന് നിയമനിർമ്മാണം നടത്താൻ വ്യവസ്ഥ ചെയ്യുന്ന വിഷയങ്ങളുടെ ലിസ്റ്റാണ് സമവർത്തി ലിസ്റ്റ് അല്ലെങ്കിൽ കൺകറൻറ് ലിസ്റ്റ്.[1] നിലവിൽ 47 വിഷയങ്ങൾ ഈ ലിസ്റ്റിൻ കീഴിലുണ്ട്. പട്ടിക താഴെ കൊടുത്തിരിക്കുന്നു:
| നമ്പർ | വിഷയം |
|---|---|
| 1 | ക്രിമിനൽ നിയമങ്ങൾ, ഇന്ത്യൻ പീനൽ കോഡിൽ ഉള്ള എല്ലാ കാര്യങ്ങളും |
| 2 | ക്രിമിനൽ നടപടിക്രമം, കോഡ് ഓഫ് ക്രിമിനൽ പ്രൊസീജിയറിലുള്ള എല്ലാ കാര്യങ്ങളും |
| 3 | സംസ്ഥാനത്തിൻറെ സുരക്ഷക്കും ക്രമസമാധാനപാലനത്തിനും വേണ്ട കരുതൽ തടങ്കൽ നടപടികൾ |
| 4 | തടവുപുള്ളികളെ ഒരു സംസ്ഥാനത്തുനിന്ന് മറ്റു സംസ്ഥാനങ്ങൾക്ക് വിട്ട് നൽകൽ |
| 5 | വിവാഹവും വിവാഹമോചനവും; ശിശുക്കളും പ്രായപൂർത്തിയാകാത്തവരും; ദത്തെടുക്കൽ; ഇഷ്ടദാനവും പിൻതുടർച്ചാവകാശവും; കൂട്ടുകുടുംബവും ഭാഗംവെപ്പും |
| 6 | കൃഷിഭൂമിയൊഴികെയുള്ള സ്ഥലങ്ങളുടെ കൈമാറ്റം |
| 7 | കരാറുകൾ |
| 8 | ശിക്ഷാർഹമായ കുറ്റങ്ങൾ |
| 9 | പാപ്പരത്തം |
| 10 | ട്രസ്റ്റുകളും രക്ഷാധികാരികളും |
| 11 | ഔദ്യോഗിക ട്രസ്റ്റുകളുടെയും സാധാരണ ട്രസ്റ്റുകളുടെയും രക്ഷാധികാരികൾ |
| 11എ | ഹൈക്കോടതിയും സൂപ്രീംകോടതിയും ഒഴികെയുള്ള എല്ലാ കോടതികളുടെയും ഭരണഘടനാപരവും സംഘടനാപരവുമായ നിയന്ത്രണം |
| 12 | തെളിവുകളും സത്യവാങ്മൂലങ്ങളും; നിയമങ്ങൾ, പൊതു നടപടികൾ, രേഖകൾ, ജുഡീഷ്യൽ നടപടികൾ എന്നിവ അംഗീകരിക്കൽ |
| 13 | സിവിൽ നടപടിക്രമം, കോഡ് ഓഫ് സിവിൽ പ്രൊസീജിയറിലുള്ള എല്ലാ കാര്യങ്ങളും |
| 14 | കോടതിയലക്ഷ്യം, സുപ്രീംകോടതിയിലേത് ഒഴികെ |
| 15 | നാടോടികളും ദേശാടനഗോത്രങ്ങളും |
| 16 | ചിത്തഭ്രമവും മാനസിക വൈകല്യവും |
| 17 | മൃഗങ്ങൾക്കെതിരെയുള്ള ക്രൂരത തടയുക |
| 17എ | കാടുകൾ |
| 17ബി | വന്യമൃഗങ്ങളുടെയും പക്ഷികളുടെയും സംരക്ഷണം |
| 18 | ഭക്ഷ്യവസ്തുക്കളിലെ മായംചേർക്കൽ |
| 19 | മരുന്നുകളും വിഷങ്ങളും |
| 20 | സാമ്പത്തികാസൂത്രണവും സാമൂഹ്യാസൂത്രണവും |
| 20എ | കുടുംബാസൂത്രണവും ജനസംഖ്യാനിയന്ത്രണവും |
| 21 | വാണിജ്യ വ്യവസായ കുത്തകകൾ, കമ്പനികൾ, ട്രസ്റ്റുകൾ |
| 22 | ട്രേഡ് യൂണിയനുകൾ; വ്യാവസായിക തൊഴിൽ തർക്കങ്ങൾ |
| 23 | സാമൂഹികസുരക്ഷ; തൊഴിലും തൊഴിലില്ലായ്മയും |
| 24 | തൊഴിൽ സാഹചര്യങ്ങൾ, പ്രൊവിഡന്റ് ഫണ്ടുകൾ, തൊഴിലാളികളുടെ നഷ്ടപരിഹാരം, വാർദ്ധക്യകാല പെൻഷനുകൾ, പ്രസവകാല ആനുകൂല്യങ്ങൾ എന്നിവ ഉൾപ്പെടെയുള്ള തൊഴിൽ ക്ഷേമം |
| 25 | വിദ്യാഭ്യാസം; ഉന്നതവിദ്യാഭ്യാസം, മെഡിക്കൽ വിദ്യാഭ്യാസം, സാങ്കേതികവിദ്യാഭ്യാസം |
| 26 | മെഡിക്കൽ നിയമരംഗങ്ങളിലെ ഉദ്യോഗങ്ങൾ |
| 27 | ദുരിതാശ്വാസവും പുനരധിവാസവും |
| 28 | ചാരിറ്റബൾ സ്ഥാപനങ്ങൾ, മതസ്ഥാപനങ്ങൾ അവയുടെ സമഭാവനകൾ |
| 29 | മനുഷ്യർ, മൃഗങ്ങൾ, ചെടികൾ എന്നിവയെ ബാധിക്കുന്ന സാംക്രമികമായ രോഗങ്ങളോ കീടങ്ങളോ |
| 30 | ജനനവും മരണവും രജിസ്റ്റർ ചെയ്യുന്നത് ഉൾപ്പെടെയുള്ള പ്രധാനപ്പെട്ട സ്ഥിതിവിവരക്കണക്കുകൾ |
| 31 | പ്രധാനപ്പെട്ടതൊഴികെയുള്ള തുറമുഖങ്ങൾ |
| 32 | ഉൾനാടൻ ജലപാതകളിലെ മത്സ്യബന്ധനവും സഞ്ചാരവും |
| 33 | ഭക്ഷ്യവസ്തുക്കൾ, കാലിത്തീറ്റകൾ, അസംസ്കൃത പരുത്തി, ചണം എന്നിവയുടെ ഉത്പാദനവും വിതരണവും വ്യാപാരവും |
| 33എ | മാനദണ്ഡങ്ങൾ സ്ഥാപിക്കുന്നതൊഴികെ അളവുതൂക്കങ്ങൾ |
| 34 | വിലനിയനിയന്ത്രണം |
| 35 | യന്ത്രവൽകൃത വാഹനങ്ങളും അത്തരം വാഹനങ്ങളുടെ നികുതിയും |
| 36 | നിർമ്മാണശാലകൾ |
| 37 | ബോയിലറുകൾ |
| 38 | വൈദ്യുതി |
| 39 | പത്രങ്ങൾ, പുസ്തകങ്ങൾ, പ്രിൻറിങ്ങ് പ്രസ്സുകൾ |
| 40 | ദേശീയപ്രാധാന്യമില്ലാത്ത പുരാവസ്തുക്കൾ, പ്രദേശങ്ങൾ |
| 41 | സ്ഥലമേറ്റെടുപ്പ് |
| 42 | വസ്തുവകകളുടെ ഏറ്റെടുപ്പും കൈവശപ്പെടുത്തലും |
| 43 | പൊതുതാൽപര്യപ്രകാരമോ നികുതിയിനത്തിലോ ഉള്ള തിരിച്ചുപിടിക്കലുകൾ |
| 44 | ജുഡീഷ്യൽ സ്റ്റാമ്പുകൾ വഴി ശേഖരിച്ച ഫീസ് ഒഴികെയുള്ള സ്റ്റാമ്പ് ഡ്യൂട്ടികൾ |
| 45 | ലിസ്റ്റ് II അല്ലെങ്കിൽ ലിസ്റ്റ് III ൽ വ്യക്തമാക്കിയിട്ടുള്ള ഏതെങ്കിലും കാര്യങ്ങൾക്കാവശ്യമായ അന്വേഷണങ്ങൾക്കും സ്ഥിതിവിവരക്കണക്കുകൾക്കും |
| 46 | സുപ്രീംകോടതി ഒഴികെയുള്ള കോടതികൾക്ക് ഈ ലിസ്റ്റിൽ പെടുന്ന വിഷയത്തിന്മേലുള്ള അധികാരങ്ങൾ |
| 47 | കോടതികളിൽ കെട്ടുന്ന ഫീസൊഴികെ ഈ ലിസ്റ്റിൽ പെടുന്ന വിഷയത്തിന്മേലുള്ള എല്ലാ ഫീസുകളും |