ജി.വി. അയ്യർ

ഇംഗ്ലീഷ് വിലാസം

https://ml.wikipedia.org/wiki/G._V._Iyer

ഗണപതി വെങ്കട്ടരാമ അയ്യർ
ಗಣಪತಿ ವೆಂಕಟರಮಣ ಅಯ್ಯರ್
ജനനം	(1917-09-03)3 സെപ്റ്റംബർ 1917 നഞ്ചനാഗുഡ്, മൈസൂർ സാമ്രാജ്യം, ബ്രിട്ടീഷ് ഇന്ത്യ
മരണം	21 ഡിസംബർ 2003(2003-12-21) (പ്രായം 86) മുംബൈ, മഹാരാഷ്ട്ര
ദേശീയത	ഭാരതീയൻ
മറ്റ് പേരുകൾ	ജി.വി. അയ്യർ കന്നട ഭീഷ്മർ
തൊഴിൽ(s)	നടൻ, ചലച്ചിത്രസംവിധായകൻ, തിരക്കഥാകൃത്ത്
അറിയപ്പെടുന്നത്	സംസ്കൃതചലച്ചിത്രങ്ങൾ സംവിധാനം ചെയ്തു.
പ്രധാന കൃതി	ആദി ശങ്കരാചാര്യ (1983) ഭഗവദ് ഗീത (1993) സ്വാമി വിവേകാനന്ദ (1998)

പ്രശസ്ത ഇന്ത്യൻ ചലച്ചിത്ര നടനും സംവിധായകനുമാണ് ജി.വി. അയ്യർ എന്ന പേരിൽ പ്രസിദ്ധനായ ഗണപതി വെങ്കട്ടരാമ അയ്യർ (കന്നട : ಕನ್ನಡ - ಗಣಪತಿ ವೆಂಕಟರಮಣ ಅಯ್ಯರ್ ; 1917 സെപ്റ്റംബർ 3 - 2003 ഡിസംബർ 21). ഇദ്ദേഹത്തിന്റെ മാതൃഭാഷ തമിഴ് ആയിരുന്നിട്ടും "കന്നട ഭീഷ്മർ" എന്ന അപരനാമത്തിലാണ് അറിയപ്പെട്ടിരുന്നത്.^[1] സംസ്കൃത ചലച്ചിത്രങ്ങൾ സംവിധാനം ചെയ്തതിലൂടെ പ്രശസ്തനായി. ഇദ്ദേഹം സംവിധാനം ചെയ്ത ആദി ശങ്കരാചാര്യ (സംസ്കൃതം) എന്ന ചലച്ചിത്രത്തിന് 1983-ലെ മികച്ച ചലച്ചിത്രം, തിരക്കഥ, ഛായാഗ്രഹണം, ഓഡിയോഗ്രഫി എന്നീ ഇനങ്ങളിൽ നാല് ദേശീയപുരസ്കാരങ്ങൾ ലഭിച്ചിരുന്നു.^[2][3] രണ്ടാമത്തെ സംസ്കൃതചലച്ചിത്രമായ ഭഗവദ് ഗീത (1993) ഏറെ ശ്രദ്ധിക്കപ്പെടുകയും ആ വർഷത്തെ മികച്ച ചലച്ചിത്രത്തിനുള്ള ദേശീയപുരസ്കാരം നേടുകയും ചെയ്തിരുന്നു.

ജനനം

1917-ൽ കർണാടകയിലെ മൈസൂരു ജില്ലയിലെ നഞ്ചനാഗുഡിലാണ് ജി.വി. അയ്യരുടെ ജനനം.

സിനിമാ ജീവിതം

എട്ടാമത്തെ വയസ്സിൽ തന്നെ ചലച്ചിത്രരംഗത്ത് എത്തിച്ചേർന്നു.^[4] രാധാ രാമന എന്ന ചിത്രത്തിലാണ് ആദ്യമായി അഭിനയിച്ചത്. പിന്നീട് മഹാകവി കാളിദാസ, സൗധാരി, ഹേമവതി, ഹരി ഭക്ത, ബേദാര കണ്ണപ്പ എന്നീ ചിത്രങ്ങളിലും അഭിനയിച്ചു. വൈകാതെ തന്നെ സംവിധാനരംഗത്തേക്കും എത്തിച്ചേർന്നു. മംഗലംപള്ളി ബാലമുരളികൃഷ്ണ, ബി.വി. കാരന്ത്, ടി.ജി.ലിംഗപ്പ എന്നിവർ സംഗീതസംവിധാനം നിർവ്വഹിച്ച ഹംസഗീതേ എന്ന ചിത്രം സംവിധാനം ചെയ്തതിലൂടെ അയ്യർ പ്രശസ്തനായി. കന്നട ഭാഷയിലുള്ള നിരവധി ചലച്ചിത്രങ്ങൾക്കു തിരക്കഥയെഴുതി സംവിധാനം ചെയ്തു.

കന്നട, സംസ്കൃതം എന്നീ ഭാഷകളിൽ പ്രാവീണ്യം നേടിയിരുന്ന അയ്യർ തന്റെ ആദ്യത്തെ സംസ്കൃത ചിത്രമായ ആദി ശങ്കരാചാര്യ 1983-ൽ പൂർത്തിയാക്കി. എട്ടാം നൂറ്റാണ്ടിൽ ജീവിച്ചിരുന്ന പ്രശസ്ത തത്ത്വചിന്തകൻ ശങ്കരാചാര്യരുടെ കഥ പറഞ്ഞ ചിത്രം നാലു ദേശീയപുരസ്കാരങ്ങൾ സ്വന്തമാക്കിയിരുന്നു. അതിനുശേഷം 1993-ൽ നിർമ്മിച്ച ഭഗവദ് ഗീത എന്ന സംസ്കൃതചലച്ചിത്രവും ദേശീയപുരസ്കാരം നേടിയിരുന്നു.^[5] ബൊഗോട്ട ഫിലിം ഫെസ്റ്റിവെല്ലിൽ മികച്ച ചലച്ചിത്രത്തിനുള്ള നാമനിർദ്ദേശപ്പട്ടികയിൽ ഈ ചിത്രവും ഉണ്ടായിരുന്നു.

1998-ൽ ഇദ്ദേഹം സംവിധാനം ചെയ്ത് പുറത്തിറങ്ങിയ സ്വാമി വിവേകാനന്ദ എന്ന ചലച്ചിത്രത്തിൽ മിഥുൻ ചക്രവർത്തി, ഹേമാ മാലിനി, സർവദമൻ ബാനർജി എന്നീ പ്രശസ്ത ചലച്ചിത്രതാരങ്ങൾ അഭിനയിച്ചിരുന്നു. ലോക പ്രശസ്ത തത്ത്വചിന്തകനായ സ്വാമി വിവേകാനന്ദന്റെ ജീവിതം വരച്ചുകാട്ടിയ ചിത്രം സാമ്പത്തിക വിജയം നേടിയിരുന്നില്ല.

ഹൈന്ദവ ഇതിഹാസമായ രാമായണത്തെ ആസ്പദമാക്കി ഒരു ചിത്രം നിർമ്മിക്കുവാൻ അദ്ദേഹം തീരുമാനിച്ചിരുന്നെങ്കിലും 2003 ഡിസംബർ 21-ന് സംഭവിച്ച അപ്രതീക്ഷിത മരണത്തോടെ പദ്ധതി പൂർത്തിയാക്കുവാൻ കഴിഞ്ഞില്ല. 87-ആം വയസ്സിൽ ബെംഗളൂരുവിൽ വച്ചായിരുന്നു അന്ത്യം.^[1][6]

ചിത്രങ്ങൾ

സംവിധാനം, തിരക്കഥ, നിർമ്മാണം

വർഷം	ചലച്ചിത്രം	Credited as			ഭാഷ	കുറിപ്പുകൾ
		സംവിധായകൻ	തിരക്കഥാകൃത്ത്	നിർമ്മാതാവ്
1954	ബേദാര കണ്ണപ്പ	N	Y	Y	കന്നട
1960	രണധീര കാന്തീർവ	N	Y	Y	കന്നട
1962	ഭൂദാന	Y	Y	Y	കന്നട
1962	Thai Karulu	Y	N	N	കന്നട
1962	തായിൻ കരുണ	Y	N	N	കന്നട
1962	ഗാലി ഗോപുര	N	Y	N	കന്നട	ഗാനരചന മാത്രം
1963	Bangari	Y	Y	Y	കന്നട
1963	Saaku Magalu	N	Y	N	കന്നട	സംഭാഷണം മാത്രം
1963	ലോയർ മഗളു	Y	Y	Y	കന്നട
1964	പോസ്റ്റ് മാസ്റ്റർ	Y	Y	Y	കന്നട
1966	കിലാഡി രംഗ	Y	Y	Y	കന്നട
1967	രാജശേഖര	Y	Y	Y	കന്നട
1967	ഗംഗേ ഗൗരി	N	Y	N	കന്നട	സംഭാഷണം മാത്രം
1968	മൈസൂർ തങ്ക	Y	Y	N	കന്നട
1968	നാനേ ഭാഗ്യവതി	Y	N	N	കന്നട
1969	ചൗക്കട ദീപ	Y	N	N	കന്നട
1969	വിചിത്ര സംസാര	Y	N	N	കന്നട
1975	ആഖ്രി ഗീത്	Y	N	N	കന്നട
1975	ഹംസഗീതേ	Y	Y	Y	കന്നട
1976	Nalegalannu Maduvavaru	Y	N	N	കന്നട
1977	Kudre Motte	Y	N	N	കന്നട
1983	ആദി ശങ്കരാചാര്യ	Y	Y	N	സംസ്കൃതം	തിരക്കഥ മാത്രം
1986	മാധവാചാര്യ	Y	Y	N	കന്നട
1989	രാമാനുജാചാര്യ	Y	N	N	തമിഴ്
1989	വാൾ പോസ്റ്റർ	Y	N	N	കന്നട
1993	ഭഗവദ് ഗീത: സോങ്ങ് ഓഫ് ദെ ലോർഡ്	Y	Y	N	സംസ്കൃതം
1998	സ്വാമി വിവേകാനന്ദ	Y	Y	N	കന്നട

അഭിനയ ജീവിതം

• രാധാ രാമന (1943)
• ബേദാര കണ്ണപ്പ (1954)
• സോദരി (1955)
• ഭക്ത മല്ലികാർജ്ജുന (1955)
• Sadarame (1956)
• ജഗജ്യോതി ബസ്വേശ്വര (1959)
• രണധീര കാന്തീർവ (1960)
• Kantheredu Nodu (1961)
• വംശ വൃക്ഷ (1971)
• ഹേമവതി (1977)

കലാകോവിദ പുരസ്കാരം. വിശ്വസംസ്കൃതപ്രതിഷ്ഠാനം കേരളാ. സംസ്കൃതഭാരതി

• 1983: ദേശീയ ചലച്ചിത്രപുരസ്കാരം
  • മികച്ച ചലച്ചിത്രം: ആദി ശങ്കരാചാര്യ
  • മികച്ച തിരക്കഥ: ആദി ശങ്കരാചാര്യ
• 1993: ദേശീയ ചലച്ചിത്രപുരസ്കാരം
  • മികച്ച ചലച്ചിത്രം: ഭഗവദ് ഗീത^[7][8]
• 1993: ഭഗവദ് ഗീത – ബൊഗോട്ട ഫിലിം ഫെസ്റ്റിവെല്ലിൽ മികച്ച ചലച്ചിത്രത്തിനുള്ള നാമനിർദ്ദേശം.^[9]

അവലംബം

1. "G.V. Iyer". jointscene.
2. "31st National Film Awards". India International Film Festival. Archived from the original on 2013-11-12.
3. "31st National Film Awards (PDF)" (PDF). Directorate of Film Festivals. Archived from the original (PDF) on 2012-04-24.
4. "GV Iyer Movies Collectors Set". Retrieved 2012 March 9. {{cite web}}: Check date values in: |accessdate= (help)
5. "National Film Awards, India,". IMDb. Retrieved 2012 March 9. {{cite web}}: Check date values in: |accessdate= (help)
6. "G.V.Iyer Is No More". Archived from the original on 2009-10-05. Retrieved 2012 March 9. {{cite web}}: Check date values in: |accessdate= (help)
7. "40th National Film Awards". India International Film Festival. Retrieved 2012 March 2. {{cite web}}: Check date values in: |accessdate= (help)
8. "40th National Film Awards (PDF)" (PDF). Directorate of Film Festivals. Retrieved 2012 March 2. {{cite web}}: Check date values in: |accessdate= (help)
9. "G.V. Iyer Awards". whosdatedwho.com. Retrieved 2012 March 9. {{cite web}}: Check date values in: |accessdate= (help)

പുറംകണ്ണികൾ

• ഇന്റർനെറ്റ് മൂവി ഡാറ്റാബേസിൽ നിന്ന് ജി.വി. അയ്യർ