Мобиком

Мобиком Корпораци ХХК
(Мобиком)
Хууль эрх зүйн хэлбэр	Үүрэн холбооны оператор
Үүсгэн байгуулагдсан	1996.03.18
Төв байр	MПМ оффис, ЮНЕСКО гудамж 28, Сүхбаатар дүүрэг, 1 хороо, Улаанбаатар, Монгол Улс
Удирдах хүмүүс	Күрүшима Кожи ; (Гүйцэтгэх захирал)
Цахим хуудас	www.mobicom.mn

Мобиком Корпораци ХХК (Mobicom Corporation LLC ) нь Монголын үүрэн холбооны тэргүүлэгч оператор компани юм. Өдгөө Монгол орон даяар 80 үйлчилгээний салбар, 8000 гаруй агент болон гэрээт борлуулагчдаараа дамжуулан 1,7 сая хэрэглэгчид харилцаа холбооны үйлчилгээг хүргэж байна. Түүнчлэн Apple, Samsung, Huawei, Honor, ZTE брэндийн гар утас болон дагалдах хэрэгслийн худалдаа, албан ёсны эрхтэй баталгаат засварын үйлчилгээг үзүүлдэг.

Эрхэм зорилго

Бид, Мобиком групп нь хамт олон, тэдний гэр бүлийн сайн сайхан болон оюунлаг сэтгэлгээний хөгжил дэвшлийг дэмжиж, хэрэглэгчид, түншүүдтэйгээ сэтгэлд хоногшсон дурсамжуудыг хамтдаа бүтээж, бизнесийн шинэлэг арга барилаар итгэл дүүрэн, тэгш нийгмийг цогцлоох үйлсийг манлайлна.

Алсын хараа

Бид тасралтгүй шинэчлэлээр хамтын үнэ цэнийг бүтээж, хүн бүрийн ИТГЭЛТ ХАМТРАГЧ байх болно.

Түүх

1996 оны 3-р сарын 18-нд Монголын Newcom Group, Японы Sumitomo, KDDI групп компаниуд Мобиком Корпорацийг хамтран үүсгэн байгуулж, Монголд үүрэн холбооны үйлчилгээг эхлүүлж байв. Үүсгэн байгуулагдсанаасаа хойш өнөөг хүртэл үйл ажиллагаагаа тасралтгүй тэлж, 1700 ажилтантай, 6 охин компанитай групп болон өргөжиж, үүрэн холбооноос гадна улс хоорондын холбоо, өндөр хурдны интернэт, цахим төлбөрийн шийдэл, сансрын холбоо, дата төв, ОТТ технологид суурилсан контент болон видео стриминг үйлчилгээ, сүлжээний дэд бүтэц, дижитал контент зэрэг харилцаа холбоо, мэдээллийн технологийн цогц үйлчилгээг байгууллага болон хувь хэрэглэгчдэд хүргэж байна.

Эхэн үе (1996 – 2001)

1996 онд GSM технологид суурилсан үүрэн холбооны үйлчилгээг KDDI корпораци, Ньюком групп болон Sumitomo корпорацийн хөрөнгө оруулалтаар Улаанбаатар хотод анхлан нэвтрүүлсэн. 1997 онд Дархан, Эрдэнэт хотод сүлжээгээ нэвтрүүлж, орон нутгийн анхны салбаруудаа нээж үйлчилгээ үзүүлж эхэлжээ. Мөн онд “Мобикарт” урдчилсан төлбөрт үйлчилгээг нэвтрүүлснээр хэрэглэгчийн тоо огцом өсөв.

Өсөлтийн он жилүүд (2001 – 2006)

2001 онд “Мобинет” интернэтийн үйлчилгээг хүргэж, байгууллагын хэрэглэгчийн зах зээл рүү үйл ажиллагаагаа тэлсэн бөгөөд 2002 онд Улаанбаатараас Баян-Өлгий, Өмнөговь хүртэл нийт 2160 км урттай тоон радио-релейний шугам байгуулж, баруун болон говийн аймгууд руу үйлчилгээгээ тэлэв. 2005 онд GPRS, MMS үйлчилгээнүүдийг нэвтрүүлснээр хэрэглэгчид гар утаснаасаа интернетэд холбогдох боломжтой болсон бөгөөд мөн үйлчилгээний нэгдсэн төв TEDY-г байгуулав.

Зах зээлийн өөрчлөлт, өрсөлдөөн (2006-2011)

2006 онд Мобиком Корпораци залуучуудад зориулсан “Be…” брэндийг зах зээлд хамгийн анх нэвтрүүллээ. 2009 онд хэрэглэгчийн тоо 1,000,000 хүрч зах зээлд байр сууриа баталгаажуулан, компанийнхаа үнэ цэнийг нэмэгдүүлэхээр брэндийн шинэчлэл хийжээ. 2011 онд Чанарын удирдлагын тогтолцооны ISO 9001 болон мэдээллийн аюулгүй байдлын ISO 27001 стандартуудыг амжилттай нэвтрүүлэв.

Бүтээмжээ нэмэгдүүлсэн он жилүүд (2011-2016)

2012 онд Ажлын байрны эрүүл ахуй, аюулгүй байдлын ISO 45001 стандартыг нэвтрүүлэв. Apple компанийн бүтээгдэхүүнийг борлуулах албан ёсны эрхийг 2014 онд анхлан авснаар тус брэндийн гар утас, дагалдах хэрэгслийг монголчуудад санал болгож эхэлсэн. 2016 онд дараа үеийн хөдөлгөөнт холбооны 4G LTE үйлчилгээг зах зээлд нэвтрүүлэв.

Тэлэлтийн он жилүүд (2016-2021)

2018 онд интернэтийн транзит үйлчилгээг эхлүүлснээс гадна олон улсын TIER III ангиллын дата төвийг байгууллаа. Үндэсний төлбөрийн шийдэл “Monpay” брэндийг 2020 онд зах зээлд нэвтрүүлж, финтекийн салбарт үйл ажиллагаа тэлсэн. Мөн VOO үйлчилгээг гаргаснаар ТВ-ийн зах зээлд эзлэх байр сууриа бэхжүүлэв.

Дижитал шилжилтийн он жилүүд (2021-)

Мобиком групп нь сүүлийн үеийн дэвшилтэт технологид суурилсан харилцаа холбоо, санхүү, контент, мэдээ зэрэг үйлчилгээг үзүүлж, хэрэглэгчид, түншүүдийнхээ хамтаар нийгэмдээ үнэ цэнэ бүтээсээр байна. 2021 ICT экспо дээр 5G сүлжээг анх удаа асаасан. Мөн Эрхэм зорилго, Алсын хараа, Үнэт зүйлсийг шинээр тодорхойлж, брэндийн шинэчлэл хийсэн. Хэрэглэгчдэдээ хүргэж байгаа бүтээгдхүүн үйлчилгээнийхээ чанарыг сайжруулахаар Agile багуудыг 2023 оноос байгуулан, орчин үеийн арга барилаар ажиллаж эхэлсэн. 2024 онд Улаанбаатар, Эрдэнэтийн тодорхой байршилд Мобикомын хэрэглэгчид дараа үеийн 5G сүлжээний радио давтамжийн туршилтыг хийсэн.

Бүтээгдэхүүн, үйлчилгээ

Мобайл үйлчилгээ

Интернэт үйлчилгээ

Олон улсын үйлчилгээ

Чанарын стандарт

Мобиком Корпораци нь 2011 онд Чанарын удирдлагын тогтолцооны ISO 9001:2008 стандарт, 2012 онд Мэдээллийн аюулгүй байдлын удирдлагын тогтолцооны ISO 27001:2005 стандартыг хэрэгжүүлэн нэвтрүүлсэн. Олон улсын стандартчиллын байгууллагаас (ISO) Мобиком Корпорацид Олон улсын чанарын менежментийн сертификатыг дахин олгов. Мобиком Корпорацийн ISO 9001:2008 гэрчилгээ 2014 оны 6 дугаар сарын 26-ны өдрөөс эхлэн дахин 3 жилийн хугацаатайгаар сунгагдаж байна.

Мобиком Корпораци нь 2024 оны 8-р сард Мэдээллийн Аюулгүй Байдлын Менежментийн Тогтолцооны олон улсын шинэчлэгдсэн ISO 27001:2022 стандартыг нэвтрүүлж, Герман улсад төвтэй DOS компаниас магадлан итгэмжлэгдсэн гэрчилгээгээ хүлээн авсан. Мэдээллийн аюулгүй байдлын олон улсын ISO/IEC 27001:2022 стандартыг нэвтрүүлсэн.

Тогтвортой хөгжлийн зорилго ба нийгмийн хариуцлага^{[permanent dead link]}

Мобиком Корпораци ХХК нь үүсгэн байгуулагдсан цагаасаа нийгэмдээ үлэмж өгөөж өгөх, үлгэр дуурайлал үзүүлэх, урт хугацаанд үнэ цэн бүтээх төслүүдийг хэрэгжүүлсээр ирсэн. Тухайлбал, хүүхэд хамгаалал, эрүүл мэнд, боловсрол, хөгжлийн бэрхшээлтэй иргэд, байгаль хамгаалал зэрэг тогтвортой хөгжлийн төсөл хөтөлбөрүүдэд 27 тэрбум төгрөгийг (7.89 сая ам.доллар) зарцуулжээ. Тэр дундаа хүүхдийг эрүүл, аюулгүй орчинд суралцах, чанартай боловсрол эзэмших, тэгш хөгжих боломжоор хангахад онцгойлон анхаарч ажилладаг.

"Үдийн цай" жишиг төсөл

"Үдийн цай" жишиг төслийг анх 2006 онд Улаанбаатар хотын захын дүүргийн 12 сургуулийн 1, 2 дугаар ангийн 3,334 сурагчийг хамруулан хэрэгжүүлсэн. Энэ төсөл хэрэгжсэнээр сурагчдын хичээл таслалт, хоцролт 100 хувь арилж, мөн тэдний өвчлөлт эрс буурсан төдийгүй хичээлийн идэвх, оролцооны хувь нэмэгдсэн гэсэн дүгнэлт гарчээ. Төслийн хэрэгжилт үр дүн нийгэм, олон нийтийн дэмжлэг талархлыг хүлээж, тухайн үеийн Засгийн газар, БСШУЯ 2007 оны хичээлийн жилээс эхлэн орон даяар бага, дунд ангийн сурагчдад "Үдийн цай" хөтөлбөрийг хэрэгжүүлэх шийдвэрийг гаргасан байна.

Хүүхдийн Тусламжийн Утас 108 төсөл

Уг төслийг Дэлхийн Зөн Монгол ОУБ-тай хамтран санаачилж, Засгийн газрын хэрэгжүүлэгч агентлаг Хүүхдийн төлөө үндэсний газрын дэмжлэгтэйгээр 2014 оны 6-р сарын 1-нээс эхлэн 3 ээлжээр 24 цагийн турш хүүхэд залуус, тэдний эцэг эх, багш сурган хүмүүжүүлэгчдэд сэтгэл зүй, сургалт, лавлах үйлчилгээ, яаралтай тусламж гэх мэт олон төрлийн үйлчилгээг тасралтгүй хүргэдэг болсон байна. Монгол орны аль ч өнцгөөс ямар ч утаснаас хүүхдүүд огт үнэ төлбөргүйгээр 108 дугаарт залган тусламж хүсэх боломжтой болсон байна.

Ариун цэвэр, эрүүл ахуйн байгууламж төсөл

2014 оны 12-р сард алслагдмал аймгуудын ерөнхий боловсролын сургуулиудын ариун цэвэр, эрүүл ахуйн байгууламжуудыг сайжруулах зорилгоор Говь-Алтай, Ховд аймгуудын нийт 6 сумд уг төслийг хэрэгжүүлсэн. Ингэснээр нийт сургуулийн насны 3800 хүүхдэд цэвэр усны хангамжтай, халуун хүйтэн устай, бохирын шугамд холбосон, цахилгаан халаалттай ариун цэврийн байгууламжуудыг ашиглах боломжтой болсон юм.

“Хүүхэд бүрд цэвэр” ус төсөл

Ерөнхий боловсролын сургуулийн сурагчид, багш, ажилтнуудын эрүүл мэндийг дэмжихээр энэхүү төслийг хэрэгжүүлж, Улаанбаатар, орон нутгийн 110 сургуульд ус цэвэршүүлэгч байршуулсан. Үүний дүнд орон даяар 200,000 хүүхэд эрүүл ахуйн шаардлага хангасан ундны усыг хүссэн үедээ хэрэглэж боломжтой боллоо.

"SMART EDUCATION 1-4" төсөл

Цар тахлын үед сурагчдад цахимаар суралцах боломжийг олгох зорилгоор Мобиком Корпораци ХХК-иас санаачлан хэрэгжүүлсэн “Smart Education” төсөл дөрвөн жил үргэлжилж, 2024 оны байдлаар нийт 14 сургуулийн 27,000 сурагчид хүрч, боловсролын хүртээмжийг нэмэгдүүлэхэд хувь нэмрээ оруулсаар байна.

“Smart Education 1 & 2” төсөл нь 2021, 2022 онд буюу цар тахлын үеэр сурагчдын онлайнаар суралцах боломжийг нь дэмжихээр хэрэгжсэн. Гэрэл цахилгаангүй, интернэтгүйн улмаас хүүхдүүд цахим хичээлээс хоцрогдох эрсдэлээс сэргийлэн зорилтот бүлгийн хүүхдүүд гар утас, нэг жилийн дата эрх бэлэглэснээр энэхүү төсөл эхэлсэн. Төсөлд орон даяар 21 аймаг 9 дүүргийн нийт 3320 хүүхэд төсөлд хамрагдсан.

2023 оноос төсөл өргөжиж, дижитал танхимын консепт руу шилжсэн бөгөөд орон нутаг, Улаанбаатарын 8 сургуулийг сонгож, өндөр хурдны интернэт, зөөврийн компьютер, дижитал самбар, VR төхөөрөмж, интерактив хичээл бүхий иж бүрэн дижитал танхим тохижуулсан.

Одоо Монгол орны өнцөг булан бүрд 27,000 сурагч дижитал ангид хичээллэж байна.

“Smart Education” төслийн хүрээнд дижитал танхим байгуулснаар сурагчдын байгалийн ухааны хичээлийн үнэлгээ өмнөх онтой харьцуулахад 24%-иар өсжээ.

Байгальд ээлтэй шийдлүүд

Ногоон, тогтвортой ирээдүйн төлөө хувь нэмрээ оруулах, тэр дундаа хүлэмжийн хийн ялгарлыг бууруулах зорилгоор Мобиком групп 2017 оноос эхлэн эрчим хүчний хэмнэлтийн үйл ажиллагааг шат дараатай хэрэгжүүлж ирсэн. Энэ чиглэлд байгальд ээлтэй, дэвшилтэт техник, технологийг үйл ажиллагаандаа нэвтрүүлснээр чамгүй ахиц дэвшилд хүрээд буй. Тухайлбал, нарны цахилгаан үүсгүүртэй 8-22 кВт чадал бүхий бие даасан 220 байршлын бааз станцын эрчим хүчийг нарны эх үүсвэрээр хангаж байна. Мөн цахилгаан болон нарны эрчим хүчний хосолсон шийдлээр 6 байршлын бааз станцын эрчим хүчний хэрэглээг зохицуулж байгаа юм. Түүнчлэн 10 кВт-ын нарны цахилгаан үүсгүүртэй нэг дата төв, 18.6 кВт-ын нарны цахилгаан үүсгүүртэй бас нэг дата төвийг ашиглалтад оруулсан. Үүнээс гадна цахилгаан эрчим хүчний оргил ачааллын хэрэглээг бууруулах, мөн зөөврийн болон пассив барилгын технологи зэрэг инновацад тулгуурласан шийдлүүдийг нэвтрүүлсээр байна. Эдгээр арга хэмжээний үр дүнд Мобиком групп нийт 4.86 ГВт.ц эрчим хүч хэмнэж, 3368 тонн нүүрсхүчлийн хийн ялгарлыг бууруулжээ. Энэ нь жилд 1000 гаруй автомашиныг замын хөдөлгөөнөөс хассантай тэнцэх хэмжээний эерэг нөлөө үзүүлсэн гэсэн үг юм. Цаашид Мобиком групп 2050 он гэхэд үйл ажиллагаанаасаа ялгаруулж буй хүлэмжийн хийн 0 хэмжээнд хүргэх зорилт тавиад буй.

Шагнал

2001-2004 онуудад “Оны шилдэг аж ахуйн нэгж” өргөмжлөл
2002 оны “Үндэсний шилдэг брэнд” шагнал
2003 оны “Үйлчилгээний шилдэг байгууллага” өргөмжлөл
2004 оны “Итгэмжлэгдсэн үйлчилгээний байгууллага” шагнал
2004 оны “Мэдээлэл харилцааны салбарт шинэ технологи амжилттай нэвтрүүлсэн байгууллага” өргөмжлөл
2005 оны “Зах зээлд манлайлагч байгууллага” шагнал
2006 оны “Нийгмийн хариуцлагыг хэрэгжүүлэгч шилдэг байгууллага” шагнал
2010 оны “Компанийн нийгмийн хариуцлагыг хэрэгжүүлэгч тэргүүний аж ахуйн нэгж” шагнал
2010 оны “Ази, номхон далайн орнуудын худалдаа, аж үйлдвэрийн танхимуудын холбооны Алтан шагнал”
2011 оны “Шилдэг компанийн засаглалтай байгууллага”
2011 онд ISO 9001 2008 сертификат гардан авсан
2011 онд “Бизнесийн амжилтын гэрчилгээ” гардан авсан
2011 оны Монгол Улсын 4 дэх “ТОП Татвар төлөгч”
2011 оны Монгол Улсын “ТОП 150 Аж ахуйн нэгж”-ийн жагсаалтад 5 дугаар байр
2013 оны Монгол Улсын “ТОП 150 Аж ахуйн нэгж”-ийн жагсаалтад 12 дугаар байр
2012-2013 онуудад Нийгмийн даатгалын ерөнхий газрын “Шилдэг нийгмийн даатгалын шимтгэл төлөгч байгууллага”
2013 онд Дэлхийн эдийн засгийн форум байгууллагын “Авлигын эсрэг түншлэлийн санаачилга”-д элсэн орсон
2014 оны “АйСиТи Экспо”-гийн “Шилдэг шинийг санаачлагч байгууллага”
2014 онд ISO 9001 2008 сертификатыг дахин баталгаажуулсан
2015 онд "Онцлох 10 Энтрепренер"
2015 онд Нийгмийн эрүүл мэндийн хүрээлэнгийн "Эрүүл мэндийн дэмжигч байгууллага"
2015 оны "Шилдэг маркетингтай байгууллага"-аар шалгарсан
2016 онд Онцлох Энтрепренерийн Тэргүүн байрт шалгарсан
2016 онд "Хүүхдийн Төлөө Сайн Үйлс" медалиар шагнуулсан
2017 онд Монгол Улсын “ТОП 10 Аж ахуйн нэгж”-ийн нэгээр шалгарсан
2017 онд Нийслэлийн оны шилдэг нийгмийн даатгал төлөгч
2017 онд Монгол Улсын ТОП 5 татвар төлөгч, "Шилдэг ажил олгогч" шалгарсан
2017 онд ICT EXPO 2017 үзэсгэлэнгийн шилдэг үйлчилгээгээр МЕССЭЖ ЗЭЭЛ шалгарсан
2017 онд Онцлох Энтрепренер шалгаруулалтын Гранпри шагнал
2018 онд Монгол Улсын “ТОП 100 Аж ахуйн нэгж”-ийн нэгээр шалгарсан
2018 онд "ТОП 10 Энтрепренер"
2018 онд ICT EXPO 2018 үзэсгэлэнгийн "Шилдэг технологи"
2018 онд "Боловсролын салбарын найдвартай түнш"
2019 онд "Хамгийн олон НӨАТ-ын баримт олгосон байгууллага"
2019 онд Мобикомын засвар үйлчилгээ Төв Азийн шилдгээр тодорлоо
2019 онд Forbes Awards 2019 наадмын "Нийгмийн хариуцлагатай компани"
2019 онд Чингэлтэй дүүргийн "ТОП татвар төлөгч"
2019 онд Монгол Улсын "ТОП 100 Аж ахуй нэгж"-ийн нэгээр шалгарсан
2019 онд ICT EXPO 2019 үзэсгэлэнгийн "ШИЛДГИЙН ШИЛДЭГ ОРОЛЦОГЧ"-оор шалгарсан
2019 онд "Алтан Од 2019" наадмын "Шилдэг бүтээгдэхүүн үйлчилгээтэй ББСБ"-аар Мобифинанс ББСБ шалгарсан
2019 онд Монгол Улсын "ТОП 10 Энтрепренер"-ийн нэгээр шалгарсан
2020 онд "ТОП 100 Аж ахуй нэгж"-ийн нэгээр шалгарсан
2020 онд "Алтан Сарнай 2020" наадмын ХҮРТЭЭМЖТЭЙ НИЙГЭМ төрөлд "Хүүхэд бүрд цэвэр ус" төсөл шилдгээр шалгарсан
2021 онд "ТОП 100 Аж ахуй нэгж"-ийн нэгээр шалгарсан
2022 онд "ТОП 100 Аж ахуй нэгж"-ийн 9 дүгээрт эрэмбэлэгдсэн
2023 онд “Оны шилдэг аж ахуйн нэгж”, “Компанийн нийгмийн хариуцлгыг хэрэгжүүлэгч энтрепренер”-ээр тодорсон
2024 онд “ТОП-100 аж ахуйн нэгж”-ийн 14 дүгээрт эрэмбэлэгдэн харилцаа холбооны салбартаа тэргүүлсэн

Гадаад холбоос

Мобикомын албан ёсны сайт
Харилцаа Холбооны Зохицуулах Хороо