Ethel Anderson

Ethel Anderson
Ħajja
Twelid Leamington Spa, 16 Marzu 1883
Nazzjonalità Awstralja
Mewt 4 Awwissu 1958
Edukazzjoni
Alma mater Kulleġġ ta' Downing
Lingwi Ingliż
Okkupazzjoni
Okkupazzjoni poeta
pittur
saġġist
kittieb

Ethel Campbell Louise Anderson (kunjomha xebba Mason; twieldet fis-16 ta' Marzu 1883 – mietet fl-4 ta' Awwissu 1958) kienet poeta, saġġista, rumanziera u pittriċi Awstraljana tal-bidu tas-seklu 12. Hi kienet tikkunsidra lilha nnifisha l-iktar bħala poeta, iżda issa hija apprezzata l-iktar għall-istejjer ironiċi u interessanti tagħha.[1] Anderson ġiet deskritta bħala "awtriċi, artista, kummentatriċi tal-arti u emissarja tal-Moderniżmu ta' livell għoli".[2]

Ħajja

[immodifika | immodifika s-sors]

Ethel Anderson twieldet f'Lillington, subborg ta' Leamington, f'Warwickshire, l-Ingilterra, u kellha ġenituri mwielda l-Awstralja: Cyrus Mason u Louise Campbell. Hija twieldet fis-16 ta' Marzu 1883.[3] Il-familja tagħha ftit wara reġgħet marret tgħix fl-Awstralja u hi trabbiet f'Sydney fil-proprjetà ta' nannuha, Rangamatty, qrib Picton, New South Wales. Hi ngħatat l-edukazzjoni tagħha d-dar u fl-Iskola tal-Grammatika tal-Bniet tal-Knisja tal-Ingilterra f'Sydney (issa magħrufa bħala SCEGGS Darlinghurst).[4]

Fit-8 ta' Ottubru 1904 hija żżewġet lill-Brigadier-Ġeneral Austin Thomas Anderson (1868-1949) f'Ahmednagar, Bombay fejn kienet akkumpanjatu fl-istazzjonament tiegħu. Fl-1907 kellhom lil binthom, Bethia.[5]

Fil-bidu tal-Ewwel Gwerra Dinjija, ir-raġel tagħha ġie stazzjonat fi Franza u Anderson marret tgħix f'Cambridge, l-Ingilterra, fejn studjat it-tpinġija fil-Kulleġġ ta' Downing u wriet ftit mix-xogħol tagħha.

Meta kienet tgħix l-Ingilterra (1914-1924), Edith Anderson ingħaqdet mal-Grupp ta' Cambridge u tħalltet ma' artisti bħal Sir William Rothenstein. Hi pittret l-affreski għall-knejjes Ingliżi u stabbiliet il-Klabb tal-Arti u tal-Artiġjanat għaż-Żgħażagħ ta' Worcestershire.[6]

Anderson iktar 'il quddiem marret tgħix f'Worcestershire flimkien ma' żewġha. Meta dan tal-aħħar irtira mill-armata fl-1924, il-familja marret tgħix f'Turramurra, New South Wales, l-Awstralja. Mill-1927 il-Brigadier-Ġeneral Anderson sar segretarju ta' diversi Gvernaturi Statali.

F'Sydney Ethel bdiet tappoġġa ferm lill-arti moderna u lill-pitturi Modernisti bħal Grace Cossington Smith, Dorrit Black, Roland Wakelin u Roy de Maistre, billi kitbet dwar ix-xogħlijiet tagħhom, ospitat wirjiet f'darha, organizzat wirjiet f'postijiet oħra u fetħet diversi wirjiet. Hija kitbet artikli dwar l-arti moderna u dwar l-artisti Modernisti f'diversi pubblikazzjonijiet Awstraljani. Wirja tax-xogħol ta' Roland Wakelin ġiet ospitata f'darha. Fl-1930 neħħiet l-għamara kollha minn darha biex tospita wirja tal-pitturi ta' Wakelin.

F'Turramurra, Ethel Anderson stabbiliet l-Unjoni tal-Pitturi tal-Affreski ta' Turramurra fl-1927. Ġiet mistoqsija mir-rettur tal-Knisja ta' San Ġakbu ta' Sydney tgħin iżżejjen il-Kappella tat-Tfal u hi ddisinjat skema ta' affreski għaliha li twettqet mill-grupp ta' artisti tagħha fl-1929.[7]

Fis-16 ta' Marzu 1932, fetħet il-wirja inawgurali taċ-Ċentru tal-Arti Moderna stabbilit minn Dorrit Black f'Margaret Street, Sydney, biex tgħallem u tippromwovi l-ideat Kubisti li Black kienet tgħallmet matul il-vjaġġ ta' studju tagħha fi Franza. Anderson kitbet ukoll dwar ix-xogħol ta' artisti kontemporanji għal rivisti bħal Art in Australia u Home, filwaqt li l-poeżiji u l-istejjer tagħha ġew ippubblikati f'The Spectator, Punch, Cornhill Magazine, The Atlantic Monthly, The Sydney Morning Herald u The Bulletin. Il-poeżija tagħha kienet influwenzata mill-għarfien li kellha dwar il-letteratura Franċiża u x-xogħol tal-Moderniżmu, bi sperimentazzjoni formali u metrika konsiderevoli. Il-poeżija tagħha The Song of Hagar saret mużika permezz ta' John Antill.

Il-mewt tar-raġel tagħha fl-1949 kienet tfisser li kellha ssostni lilha nnifisha, u hija għamlet dan permezz tal-kitba tagħha, u kkonvertiet l-ewwel rumanz tagħha At Parramatta f'sensiela f'The Bulletin. Hija mietet fl-4 ta' Awwissu 1958 f'Sydney.

Xogħlijiet

[immodifika | immodifika s-sors]

Poeżija

  • Squatter's Luck and Other Poems (1942)
  • Sunday At Yarralumla: A Symphony (1947)
  • The Song of Hagar to the Patriarch Abraham (1957)

Nonfizzjoni

  • Adventures In Appleshire (1944)
  • Timeless Garden (1945)
  • Joy of Youth: The Letters of Patrick Hore-Ruthven (1950, ed.)

Fizzjoni

  • Indian Tales (1948)
  • At Parramatta (1956)
  • The Little Ghosts (1959)
  • The Best of Ethel Anderson (1973, ed. minn J. D. Pringle)

Pittura

  • Affreski fil-Kappella tat-Tfal tal-Knisja ta' San Ġakbu, Sydney (flimkien ma' oħrajn)

Biblijografija

[immodifika | immodifika s-sors]
  • Adelaide, Debra (1986) Australian Women Writers: A Bibliographic Guide, Londra, Pandora.
  • Foott, Bethia, Ethel and the Governors' General, a biography of Ethel Anderson (1883-1958) and Brigadier-General A.T. Anderson (1868-1949), Rainforest, NSW.
  • E. Morris Miller & Frederick T. Macartney (1956), Australian Literature, Angus and Robertson, Sydney, p. 37.
  • Speer, Anne (1994) Ethel Anderson: pioneer supporter of Sydney's Post-Impressionists.
  • William H. Wilde, Joy Hooton & Barry Andrews (1986) The Oxford Companion to Australian Literature, OUP, Melbourne, p. 25.

Referenzi

[immodifika | immodifika s-sors]
  1. ^ Adelaide, Debra (1988). Australian women writers: a bibliographic guide. Australian literary heritage. Londra; Sydney: Pandora. ISBN 978-0-86358-148-9.
  2. ^ Harding, Lesley; Cramer, Sue (2010). Cubism & Australian Art. Carlton, Victoria: The Miegunyah Press. p. 75. ISBN 978-0-522-85673-6.
  3. ^ Rutledge, Martha (1993). "Anderson, Ethel Campbell Louise (1883–1958)". Australian Dictionary of Biography. Vol. 13. National Centre of Biography, Australian National University. ISSN 1833-7538.
  4. ^ Australian Verse: An Illustrated Treasury, editjat minn Beatrice Davis, https://search.sl.nsw.gov.au/permalink/f/1ocrdrt/ADLIB110055838 Library of New South Wales Press], 1996.
  5. ^ "Ethel Anderson, b. 1883". National Portrait Gallery people. Miġbur 2023-08-04.
  6. ^ "Ethel Anderson :: biography at :: at Design and Art Australia Online". www.daao.org.au. Miġbur 2023-08-04.
  7. ^ Speer, Anne. (1994). Anne Speer - Ethel Anderson: Pioneer Supporter of Sydney's Post-Impressionists, 1994. State Library of New South Wales. MLMSS 5951.