Michel Giacometti (Ajácio, Córsega, 8 de Janeiro de 1929 - Faro, 24 de Nobembre de 1990) fui un etnomusicólogo corso que fizo amportantes recuolhas etno-musicales an Pertual.
Giacometti antressou-se pula música popular pertuesa passado bejitar l Museu de l Home an Paris. Bieno bibir para Pertual an 1959 quando soubo que tenie tuberculose.
Acaba por se fixar an Bergáncia. Fundou ls Arquibos Sonoros Pertueses (Arquivos Sonoros Portugueses) an 1960. Percorriu l paíç nas décadas seguintes, até 1982, tenendo grabado cantores i músicas tradecionales que l pobo cantaba ne l sou die a die.
Cun Fernando Lopes Graça lhançou la "Antologie de la Música Regional Pertuesa" (an pertués: "Antologia da Música Regional Portuguesa"), ls coincidos discos de sarapilheira, eiditados pula Arquivos Sonoros Portugueses an cinco belumes.
A partir de 1970 apersentou na RTP, durante trés anhos, l porgrama "Pobo que Canta" (pert: "Povo que Canta"), rializado por Alfredo Tropa.
An 1981 fui eiditado, pul Círculo de Leitores, l "Cancioneiro Popular Pertués" (pert: "Cancioneiro Popular Português") que cuntou cula colaboraçon de Fernando Lopes Graça.
An 1987 fui einaugurado an Setúbal l Museu de l Trabalho. L museu tubo amportante colaboraçon de Giacometti na eilaboraçon de la sposiçon "L Trabalho faç l Home" (pert: "O Trabalho faz o Homem").
Morriu an Faro ne l die 24 de Nobembre de 1990. Stá sepultado na pequeinha aldé de Peroguarda (Ferreira de l Alenteijo) ne l cunceilho de Beija.
An 1991, l Museu de l Trabalho de Setúbal, cun ua basta coleçon de strumientos agrícolas i oubjetos de l die a die recolhidos por Giacometti, passou a chamar-se "Museu do Trabalho Michel Giacometti". La reabertura fui an 18 de Maio de 1995. L sou spólio ancontra-se tamien noutros museus, cumo l Museu Munecipal de Ferreira de l Alenteijo, l Museu de la Música Pertuesa (Casa Verdades de Faria, ne l Monte Storil) i inda l Museu Nacional de Etnologie.
L decumentairo "Polifonias - Pace é Saluta, Michel Giacometti" fui rializado an 1997 por Pierre-Marie Goulet.
An 2004 fui lhançado l lhibro "Michel Giacometti - camino pa un museu", aquando dua sposiçon ourganizada pula Cámara Munecipal de Cascais.
An 2005 rializou-se na Córsega, ne l Festibal Cantares de Mulhieres i Strumientos de l Mundo, ua houmenaige a Michel Giacometti, que cuntou cula partecipaçon de nomes cumo Amélia Muge, Gaiteiros de Lisboa i Mafalda Arnauth. Tamien houbo la sposiçon "L Campo i l Canto" (pert: "O Campo e o Canto") cun retratos de António Cunha i la projeçon de dous filmes de Pierre-Marie Goulet.
La RTP porduziu ua nuoba série de porgramas "Pobo que canta". Ne l redadeiro eipisódio houbo ua houmenaige al etnólogo corso.
50 anhos passado la chegada la Pertual i 80 anhos subre l nacimiento de Michel Giacometti, rializa-se an Coimbra l "Reancuontro cun Giacometti" (pert: "Reencontro com Giacometti") - Ciclo de Comemoraçones que decorre antre Janeiro i Outubre de 2009. L'ourganizaçon deste ciclo de comemoraçones ye de la respunsablidade de l Setor Anteletual de Coimbra de l Partido Quemunista Pertués.
L purmeiro belume chama-se "Cantos i danças de Pertual". Ls seguintes dízen respeito al "Minho", "Trás ls Montes", "Beiras" i un redadeiro belume dedicado al "Alenteijo i Algarbe".
Ls "discos de serapilheira" fúrun eiditados an pequeinhas tiraiges.
Ls discos de la Antologie fúrun eiditados an Fráncia pula eiditora chant du Mond. Seleçon de ls discos 1, 2 i 3 an Bisages du Pertual/Le Chant du Monde LDX A 43. An 1998 fúrun reeiditados an CD pula Strauss i an 2008 pula Numérica, siempre na eitiqueta Pertual Sonido.
"custituiu un sfergante marcante na ambestigaçon, perserbaçon i dibulgaçon de las tradiçones musicales " Mário Viera de Carvalho / Lusa