آکادمیکِ شکاکون یا آکادمیک شک-شکی‌ئون (انگلیسی جه: Academic skepticism) اتا فلسفی مکتب بیه که حدود 266 پ‌م وشون سر-کله پیدا بیّه. اولین کَش، آرسسیلائوس که پیش از این افلاطون آکادمی دله درس دائه، باته که شک هاکردن اتا اصل هسته که افلاطونی فلسفه دله ونه قبول داشتن و اینتی باعث بیّه که افلاطون و پیرهونی ِعقاید پشو بخرده و هئی ره نزدیک بینه.[۱]ولی زمونی که آرسِسیلائوس بمرده په، آکادمیکِ شکاکیت و پیرهونیسم میونه بهم بخرده.[۲] این گدر شکاکون همون افلاطونِ آکادمی دله دئینه و وشونِ اتا جیر-گروه حیساب یَمونه. آکادمیک شکاکون گتنه که ونه حقیقتِ وجود داشتن جه شک هاکردن و دکّل میّن نی‌یه که آدمی‌زاد بتونه حقیقت ره دَر بَوِره.[۳] وشون افلاطون ِفایدون کتاب جه اتا جمله ره عَلِم هاکردنه و باتنه که افلاطون هم همین باور ره داشته.[۴] این بنویشته گته که سقراط اتا گپ-گفت دله گنه فانی آدمون نتونّه دانش ره دست پیدا هاکنن.[۵] شکاکونی که پیرهونِ دار-دسته بینه، خاستنه این باور سر هرستن تا آتاراکسی ره اثبات هاکنن ولی آکادمیِ شکاکون خاستنه این باور جه استدلال بیارن که جبر – که رواقیون باور داشتنه – ره نقد هاکنن.[۳]