Bolko Bullerdiek

Bolko Bullerdiek (Mbozi, Tanzania, 9 jannewaori 1939) is een Platduutse schriever en anjager van 't Platonderwies op Duutse schoelen.

Jeugd en opleiding

[bewark | bronkode bewarken]

Bullerdiek is in 1939 in Tanzania geboren op hernhutter-zendingspost Rungwe bij Tukuyu, waor zien va as vakman warkte.[1] Tanzania (Tanganyika) was doedertied een Britse kolonie waor nog veul Duutsers woonden uut de tied det de kolonie diel uutmaakte van Duuts-Oost-Afrika. In de Tweede Wereldoorlog wördden de va van Bullerdiek deur de Britten interneerd; later wördden de femilie uut Tanzania verdreven en mussen ze naor Duutslaand uutwieken. Zien va gunk vervolgens bij de Wehrmacht en sneuvelde in Noord-Afrika.

Bullerdiek gruide op in Bookholtbarg, tussen Oldenbörg en Bremen. Zien moeder onderhöld heurzölf en heur beide zeuns as neister. De Platduutse taal van zien moe kreeg Bullerdiek passief mit ("Plattdüütsch is de Spraak von mien Mudder, man nich mien Mudderspraak").

Hij wördden an de handelsschoele in Demost opeleid as industrieel koopman, een vak det hij knap vervelend vund. Vervolgens studeerden e veur schoelmeister in Hambörg. Daor gaf hij tien jaor les in literatuur, Duuts en poletiek an een handelsschoele. Daornao warkte hij 28 jaor an een onderwiezersopleiding, 't Landesinstitut für Lehrerbildung und Schulentwicklung. Hij hef schoelboeken eschreven veur onderricht in de Duutse taal.

Bullerdiek verdielt zien tied tussen Hambörg, zien veurnaamste woonplekke, en 't Sleeswiek-Holstiense Gunneby.

Platduuts wark

[bewark | bronkode bewarken]

Bullerdiek hef verscheiden Platduutse verhalenbundels op zien name. Ok drag e bij an publicaties veur 't onderwiezen van de Platduutse schrieverije, zoas de bloemlezing Schrievwark (2004) veur de Hambörger schoeljeugd. Hij hef 't Platonderwies op schoelen een fiks drokkien egeven, wat naor Hambörgs veurbield aovereneumen wördden in aandere dielstaoten van Duutslaand.[2] Hij is betrökken bij de veriening veur Platduutse taal en literatuur Quickborn. Wieder schref e columns veur dagbladen. Mangs trekt hij deropuut um Platduutse verhalen te vertellen.

Veur zien inzet veur de Platduutse taal en literatuur hef Bullerdiek verscheiden priezen ontvangen. In 1993 kreeg e de Freudenthal-Pries, ien van de bekendste Nedersaksische literatuurpriezen; twee jaor later kreeg e de Fritz-Reuter-Pries. Meermaols zat e bij de winnaars van de Vertell-doch-mal-wedstried van de omroep NDR, zoas in 2000 mit zien verhaal 'Vun'n Kurs af oder: Dat eerste Mal'.[3]

In 2016 kreeg e de Borsla-Pries[4] en in 2018, veur zien levenswark, de Platduutse literatuurpries van de stad Kappeln.[5]

Uutgaves

[bewark | bronkode bewarken]
  • Blangenbi - und doch weit weg. Lyrik in Gegenüberstellung Platt/Hoch (Quickborn-Verlag, Hambörg 1989)
  • Einmischungen. Anregungen zu einem produktiven Umgang mit Lyrik und Kurzprosa (1991)
  • Grimms Märchen - plattdüütsch vertellt (mit Hanna Jebe, Hans Heinrich Jebe, Lisa Lühmann en Gerda Rudolph, Quickborn-Verlag, Hambörg 1991)
  • Grimms weitere Märchen - plattdüütsch vertellt (mit Alfred Feldhaus, Hanna Jebe, Hans Heinrich Jebe, Lisa Lühmann, Waltraut Otte, Gerda Rudolph en Hayo Schütte, Quickborn-Verlag, Hambörg 1991)
  • Tohuus un annerwegens (Hinstörp-Verlag, Rostock 1991)
  • Windhaken (verhalen, Hinstörp-Verlag, Rostock 1994)
  • Distelblöden. Plattdüütsche Satiren & Glossen (Hinstörp-Verlag, Rostock 1995)
  • Koppheister. Plattdüütsch för Lütt un Groot (Quickborn-Verlag, Hambörg 2001)
  • Swartsuer. Ton Gräsen, Gruveln, Grienen. (spoekverhalen, mit Dirk Römmer, Hinstörp-Verlag, Rostock 2002)
  • Schrievwark. Plattdeutsche Literatur im Deutschunterricht Hamburger Schulen (as redacteur, mit twee cd's, Quickborn-Verlag, Hambörg 2004)
  • Buten is dat koolt. Geschichten ton Opwarmen (Quickborn-Verlag, Hambörg 2006)
  • Dat Verspreken (Plaggenhauer, 2007)
  • Vör dien egen Döör (Quickborn-Verlag, 2009)
  • Fundsoken. Geschichten von güstern un vondoog (Quickborn-Verlag, Hambörg, 2014)
  • Bullerdiek sien Buddelbreven: Vertellen un Gedichten (Quickborn-Verlag, Hambörg, 2018)

Bronnen

[bewark | bronkode bewarken]
Dit stok is eschreven in 't Zuudwest-Drèents.

Verwiezings

[bewark | bronkode bewarken]
  1. ↑ Klaus Fiedler (2016), Christentum und afrikanische Kultur: Konservative deutsche Missionare in Tanzania 1900 bis 1940, Mzuzu, Malawi: Luviri Press, blz. 225
  2. ↑ Niederdeutscher Literaturpreis der Stadt Kappeln. Van: kappeln.de. Bekeken op 20 meie 2021.
  3. ↑ "Vertell doch mal 2000": Preisträger ausgezeichnet. Van: presseportal.de. 28 meie 2000, bekeken op 20 meie 2021.
  4. ↑ Volker Holm: Borsla-Literaturpreis 2016. Van: kulturportal-herzogtum.de. Bekeken op 20 meie 2021.
  5. ↑ Niederdeutscher Literaturpreis der Stadt Kappeln. Van: kappeln.de. Bekeken op 20 meie 2021.