Chillhop (untspannen hiphop, ouk wal Lofi hiphop nöömd) is ne musiksoorte dee is afleided van hiphop. Et wördt kenmarked döär sik herhalende lange, warme jazz-akkoorden (meyst up ne elektriske piano of gitaar) en een swår drumritme. Et tempo van chillhop ligt rund de 80 BPM. Vöäle nummers hebbet ginne düdelik afbakende melodylyne. Döär mekander wördt der nit in esüngen of räpped, med uutsundering van nen enkelen flard up den achtergrund. Ouk sit der vake achtergrundgelüüd in van olde grammofoonplaten, reygen of kafeegelüden.
Et drumritme, de beat, is vake 'uutkleydet' töt enkel ne groute trumme, kleine trumme en hihat dee in veerkwartsmåte spöälet. De hihats wordet nit up strakke intervallen spöäld en ouk de kleine trumme (of rimklik) kümt vake net nen tik te vroo of te late. Dit gevt et een wat 'slordig' of 'achtelous' gevööl.
Döärdat chillhop een når verholding kort akkoordenverloup hevt (neet meyr as veer måten) wat sik steyds herhaalt en der niks düdeliks uutspringt, düt et fråi dröymerig en mangs melancholisk an.
Nöäst untspanning lüstert vöäle lüde der ouk når üm up te warken of studeren. Rechtstreyks ströymende chillhop-kanalen up YouTube trekket vöäle tohöyrders, med name under jungeren.[1]