Wessem

Wessem

Wessem (Limburgs: Wisheim of Wèssem) is ne kleine stad in de gemeente Maasgouw, in de Nederlaandse previnsie Limburg met ruum 2.200 inwonners. Zoas völle kleine plaetskes in Limburg hef Wessem ne laandeleke uutstroaling en ne rieke historie.

Geskiedenis

Wessem verkreg in 1150 steadeleke rechten dee uutendelek bunt umgezet noar stadsrechten. Wanneer Wessem noo stadsrechten verkreg is neet gans dudelek. Zi-j mochten al rap nen eigen munt sloan, dus wöd doar mangs vanuut egoan dat Wessem al rap stadsrechten had. De veurzichtege historici holdt veur 1329 an.

Wessem kent n rösteg verleaden, wa-j nog könt zeen an den vestingachtigen opbouw en de steadeleke uutstroaling van et olde centrum met n uutzunderlek net van ströate, verhard mit maaskeien. Een groot deel van de olde bebouwing is bewoard ebleaven. Bezeensweerdeg is et plein veur et veurmoalegen gemeentehuus, noo n bookholders-kantoor, woarop ze met maaskeien et gemeentewoapen van de veurmoalegen gemeente Wessem loat zeen.

Wessem was ne zelfstaandege gemeente tot de gemeenteleke herindealing van 1991, woardeur et tot de ni-je gemeente Heel ging beheuren, wat destieds n groot verzet van de plaatseleke bevolking gaf. Vanof 2007 mek et deel uut van de gemeente Maasgouw.

Wessem heurden bi-j et Oaverkwarteer of Opper-Gelre en was dus achter mekare Spaans en Oostenrieks (of Belgies). In de Franse tied heurden et ok bi-j et Belgiese departement van den Nedermaas.

Bezeensweerdeg

Wessem kent n tröpken bezeensweerdegheden, woaronder de St. Medarduskarke. Dizze gotiese karke wodden eurspronkelek ebouwd rundumme et joar 946. Noadat de karke in 1944 grotendeels verwoost wodden, wodden zee in 1948-1949 wier hersteld. Den toorn wodden in 1950-1951 wat meters meer noar et westen en iets hoger opni-j ebouwd.

Wat noordelek van de stad, an de oaverkante van et Kanaal Wessem-Nederweert, ligt Pol, n tröpken van 15 huze dat bi-j Wessem heurt.

OLS

In 2004 hef de schutteri-je van Wessem, St. Joris, et Old Limburgse Schuttersfeest in Opglabbekke ewonnen. As winnoar had et de ere um et OLS in 2005 in Wessem te organisieren.