Alfred Eder (* 28. Dezember 1953 in Piesendorf) is en öösterrieksch Biathlontrainer un ehmalger Biathlet. As aktiv Sportler harr Eder en knapp 20-jährige Karriere. He hett an söss Olympisch Winterspelen deelnommen un hörrt dormit to de Rekorddeelnehmern an Winterspelen. Mit twee Bronzemedaillen bi Weltmeesterschapen is Eder de spoodriekst öösterrieksch Biathlet vun sien aktiv Tiet.
Alfred Eder is för den Heeressportverein Saalfelden antreeden. De Sportsuldat fung Midden vun de 1970er Johren mit den Biathlonsport an un nehm all 1976 in Antholz eerstmals an Biathlon-Weltmeesterschapen deel un keem in' Sprint up Platz 29. Een Week later is he bi dat Eenzelrennen vun de Olympisch Winterspelen 1976 in Innsbruck upstellt wurrn un keem dorbi up Platz 21 as ok mit Franz-Josef Weber, Klaus Farbmacher un Josef Hones up Platz vun dat Staffelrennen. Bi den Biathlon-Weltmeesterschapen 1977 in Vingrom keemen de Ränge 41 in' Eenzel un 35 in' Sprint dorto. 1978 wurr he in Hochfilzen 13. vun dat Eenzel, 11. vun den Sprint un mit Josef Koll, Siegfried Dockner un Franz-Josef Weber keem he mit de Staffel up den 5. Platz. Sie bit dorhen best Ergevnis bi Weltmeesterschapen reck he 1979 in Ruhpolding mit Platz 10 in' Einzel, Rang 8 in' Sprint un mit Platz 6 mit de Staffel. 1980 nehm he to'n tweeten Mal an Olympisch Spelen deel, wo he 24. vun dat Eenzel, 23. vun den Sprint un mit Rudolf Horn, Weber un Koll Platz 8 in dat Staffelrennen wurr.
In Lahti reck Eder bi de Biathlon-Weltmeesterschapen 1981 mit Rang 19 in' Eenzel, 14 in' Sprint un 10 mit de Staffel weer Top-20-Resultate. Nahdem de Öösterrieker 1982 in Minsk blots in' Eenzel an den Start gung un dor 22. wurr, nehm he in dat Johr dorup an besünners spoodriek Weltmeesterschapen deel. In Antholz wurr he in' Eenzel 12 un 7. mit de Staffel, he wunn aber in dat Sprintrennen achter Eirik Kvalfoss un Peter Angerer de Bronzemedaille, wat togliek de eerste öösterrieksch Biathlonmedaille in de Weltmeesterschapshistorie weer.
Weniger spoodriek verleepen de Olympisch Winterspelen 1984 in Sarajevo. In dat Eenzel keem he blots up Rang 34 un in' Sprint up Rang 22. Tosommen mit Horn, Walter Hörl un Franz Schuler reck he, weer as vör veer Johren as Startlöper insett, mit de Staffel den 8. Platz. Sien spoodriekste Saison in' Biathlon-Weltcup wurr de Saison 1984/85. So wunn he in Antholz en Sprint un wurr tweet in' Eenzel. In de Gesamtwertung vun de Saison wurr Eder Veert in den Weltcup. Bi de Weltmeesterschapen 1985 in Ruhpolding verpass Eder as Veertplatzeerter vun den Sprint gegen Johann Passler den nochmaligen Gewinn vun en Medaille. In' Eenzel keem he up Platz 21 un mit de Staffel up Platz 10. En tweet Bronzemedaille wunn he 1986 in Oslo achter Waleri Medwedzew und André Sehmisch in' Eenzel un leep in' Sprint up Platz 10 un in dat Staffelrennen up Platz 7. In Lake Placid keemen 1987 twee 29. Plätze in' Eenzel un Sprint dorto.
Bi sien veert Olympisch Winterspelen 1988 in Calgary verpass Eder mit Anton Lengauer-Stockner, Bruno Hofstätter un Schuler as Slusslöper in dat Staffelrennen up Rang veer um knapp 26 Sekunnen en Medaille, hett aber de mitfavoriseert Staffeln vun de DDR un Norwegen up de folgen Ränge verwiest. In' Eenzel wurr he todem 26. un in' Sprint 40. Bi de Weltmeesterschapen 1989 in Feistritz an der Drau reck he, mittlerwiel 35 Johr olt, letztmals mit Platz 9 in' Eenzel en Top-Ten-Platzeeren, wurr 20. in' Sprint un mit de mannschap keem he up Platz 7. Nah mittleren Resultaten bi de nächst Weltmeesterschapen nehm he in Albertville an sien fievt Olympisch Spelen deel un keem dor up Platz 30 in' Eenzel un in' Sprint reck dat blots to Rang 53. Twee Johr later nehm Eder in Lillehammer letztmals un to'n sössten Mal an Olympisch Spelen deel. De 40-Johrige weer de öldst Öösterrieker bi de Spelen. In sien eenzig Rennen, dat Eenzel, reck he mit den 10. Platz nochmal en bannig good Platzeeren. Letzt internatschonale Meesterschap wurrn de Biathlon-Weltmeesterschapen 1995 in Canmore, wo he weer blots in' Eenzel an den Start gung un up Platz 50 lannen dee. Nah de Saison 1994/1995 hett he sien Loopbahn afslooten.
Natschonal wunn Eder 1983, 1985, 1987, 1988 un 1992 de Titel in' Eenzel, 1984, 1987, 1989 un 1990 in' Sprint. Dorto keemen wiedere Medaillen in Eenzel, Sprint un Staffelwettbewarf. Nah sien aktiv Loopbahn wurr Eder Trainer, wo he ünner annern as Vereenstrainer bi den HSV Saalfelden Tobias un Julian Eberhard traineeren dee. Siet den 2000er Johren weer he ok Natschonaltrainer vun Öösterriek un dormit an den Upswung vun de öösterrieksch Biathleten stark bedeeligt. To de spoodriek Athleten vun de Tiet hörrt ok sien Söhn Simon Eder.
Af 2014 sull Eder Trainer vun de wittrussisch Damenmannschap wurrn un dormit de Nahfolge vun Klaus Siebert antreeden, de to dat Enn' vun de Saison 2013/14 sien Tosommenarbeit mit den wittrussischen Verband ut gesundheitlich Grünnen künnigt harr. In' April 2014 wurr denn aber de Witrusse Fjodar Swobada, de siet 2011 as Assistenztrainer mit Siebert arbeit harr, för dissen Posten nömmt.[1][2] Siet September 2014 is Eder aber as Cheftrainer vun de wittrussisch Fruen offiziell bestätigt.