Altdamm (poolsch:Dąbie) is en Deel vun de Stadt Stettin in de poolsche Woiwodschop Westpommern. Dat höört to den Stadtbezirk Prawobrzeże. Altdamm weer bet 1948 een egene Stadt. De Stadtdeel liggt 8 km in'n Ossen vun de Stettiner Ooltstadt. Altdamm is dat wichtigste Subzentrum vun Stettin. Een groten Deel vun Altdamm höör al to Stettin, as Altdamm noch sülvstännig weer. In den Stadtdeel befinnt sick de Flaaghaven Stettin-Altdamm. Dat gifft ok een Bohnhoff Stettin-Altdamm mit Verbinnen nah Posen un Swienemünn. De Bahnhoff is een vun de gröttste in Stettin. Siet 2015 fahren in Altdamm Snellstratenbohnen: De Lienen 2 un 8. Dor gifft dat ok de Bussen 56, 64, 73, 77 un 79 un de Nachtbussen 522 un 533. De Autostrada A6 (Europastraat 28, Berlin–Stettin–Danzig löppt an den Rand vun de Stadt. Altdamm hett een groot Industrierebeet. In Altdamm is een Karkhoff mit de Fläck vun 10,22 ha. Dat gifft een Dekanaat Stettin-Altdamm, man inst harr Altdamm een evangeelsche Mehrheit. De meeste Fläck vun den Stadtdeel liggt in den Dammschen See. Friedrich Gilly (1772–1800), Professor an de Boakademie in Berlin un Carl Teike (1864–1922), Militäärmusiker un Komponist, weern ut Altdamm.
Dat slaawsche Dörp an't Münnen vun een Stroom worr 1121 utlöscht. 1176 worrn de Borg un de Stadt vun Düütsche boot. Dat gifft noch Ruinen dorvun. 1260 kreeg Altdamm dat Stadtrecht nah Meideborger Recht. In't 14. Jahrhundert weer de Stadt Liddmaat vun de Hanse un weer 1294 bi den Kamp gegen de Vitalienbröder dobi. In den Dartigjöhrigen Krieg warr Altdamm 1630 vun Sweden innehmen. 1676 bit 1679 höör de Stadt to Brannenborg. Preußen nehm Altdamm 1713 in. 1791 weren dor 250 Hüüs. 1834 kreeg Altdamm dat Recht, Jahr- un Wekenmärkt to hollen. Vun 1846 harr de Stadt een Isenbohnverbinnen, nah Stettin (9,5 km) un Stargard (25 km). 1882 kehm dat Verbinnen nah Greifenberg in Pommern dorto, de later nah Kolberg wieder mokt warr. Siet 1927 leeg op dat Rebeet vun Altdamm de Flaaghaven Stettin. 1939 worr Altdamm een Deel vun Stettin. Anfang 1945 worr Altdamm poolsch un wedder een eegen Stadt, im Powiat Gryfiński (Kreis Greifenhagen). Altdamm harr denn de Naams Dąb un Dąb Stary. Seit 1946 heet dat Dąbie. Siet 1948 höört Altdamm wedder to Stettin.