| Filmdaten | |
|---|---|
| Plattdüütsch Titel: | — |
| Originaltitel: | Comedian Harmonists |
| Düütsch Titel: | Comedian Harmonists |
| Produkschoonsland: | Öösterriek, Düütschland |
| Johr vun’t Rutkamen: | 1997 |
| Läng: | 126 Minuten |
| Originalspraak: | Düütsch |
| Öllersfreegaav in Düütschland: | FSK 6 |
| Filmkru | |
| Speelbaas: | Joseph Vilsmaier |
| Dreihbook: | Jürgen Büscher Klaus Richter Jürgen Egger |
| Produkschoon: | Hanno Huth Reinhard Klooss Danny Krausz |
| Musik: | Harald Kloser Pasadena Roof Orchestra |
| Kamera: | Joseph Vilsmaier |
| Snitt: | Peter R. Adam |
| Dorstellers | |
| |
Comedian Harmonists is de Titel vun en öösterrieksch-düütsch Filmdrama ut dat Johr 1997, bi dat Joseph Vilsmaier Speelbaas weer. De Film befaat sik mit de histoorschen Musikgrupp Comedian Harmonists.
De Inholt vun den Film befaat sik mit dat Entstahn un de Loopbahn vun de histoorschen Singgrupp Comedian Harmonists, wobi de Film sik aver ok eenige küsntlerische Freeheiten bi de Dorstellen nimmt.
De Arrangeur Harry Frommermann hett keen Arbeit un söcht in’t Johr 1927 över’n Annonce in en Dagblatt Singers, mit de tohopen he en Singerensemble na dat Vörbild vun de US-amerikaansch „Barbershop“-Grupp The Revelers tosamenstellen will.De Bass Robert Biberti nimmt op de Annonce hen Kuntakt op un bringt Frommermann mit de wieteren Singers vun de lateren Grupp tohopen. De künstlerischen Anspröök vun Frommermann sien Arrangements sünd bannig hooch, un so hebbt de Singers eerst mehrere Maanden harde Provenarbeit vör sik, bi de dat ok mol Striet gifft. As se mit dat eerste Vörspreken bi en Agent op de Nees fallt, sütt dat meist so ut, as wenn de Grupp uteneen fallt, man opletzt finnt se jemehrn egenen Stil un warrt dorophen to een vun de spoodrieksten Musikgruppen in Düütschland.
Aver dat Glück, dat sik mit den gauen Spood mit de Grupp instellt, is nich vun Duer. As 1933 de Natschonalsozialisten in Düütschland de macht an sik rieten doot, kriegt Frommermann un siene Kollegen Roman Cykowski un Erich A. Collin Arger, vun wegen dat se all Jöden sünd. De Nazis fangt gau an Druck op de Singers to maken. Dorto kummt, dat sik Frommermann un Biberti üm de glieke Deern, de brösige Studentsche Erna, rieten doot. Erich dorgegen heiraat Mary, de wegen em to’n jöödschen Gloven konverteert, ofschoonst se vun’t Utsehn de perfekte arische Fro dorstellt.
As se in Nürnbarg en Konzert geevt, warrt se wies, dat se bit to de Tiet vun de Gööd vun een vun de dullsten Antisemiten vun de Nazis, Julius Streicher (Rutgever vun „Der Stürmer“) profiteert hebbt. Man, se künnt un wüllt em dorför keen Honig üm’n Boort smeren, un so is dat Enn vun de Grupp beslaten.
As de Comedian Harmonists denn en Inladung för en Optritt in de USA kriegt, stellt sik för eenige Liddmaten vun de Grupp de Fraag, dor in’t Utland to blieven, üm de politische Entwickeln in Düütschland ut’n Weg to gahn. Man vör allen Bibeti will sien Heimat nich eenfach opgeven – nich toletzt ok wegen sien olelen Mudder, de ut Düütschland nienich weggahn de. Butendem ünnerschätzt eenige jümmer noch de Gefohr, de vun de Nazis utgeiht, un nehmt de Situatschoon nich eernst noog.
De Grupp kehrt also torüch na Düütschland, mööt dor aver den hören, dat jem wietere Optreden verboden worrn sünd. Se hebbt Verlööf, noch en letzt Konzert to geven un warrt an’t Enn över de Maten vun de Tohörers fiert. De jöödschen Liddmaten mööt dorna tosehn, dat se ut Düütschland weggaht.
De Dreiharbeiten hebbt in’n Sommer 1997 in Wien, Bad Fischau-Brunn, Prag, München un Berlin stattfunnen. De Produkschoon weer vun verschedene Firmen dragen, wobi de Wiener Dor Film as Hööftproduzent optreden is. Wietere Bedeeligte weern de düütschen Filmsellschoppen Perathon Film, Iduna Film, Bavaria Film, Senator Film un Televersal Film (kiek ok bi Koprodukschoonsafkamen Öösterriek – Düütschland)
En Filmfehler is bi den Optritt op de USS Saratoga passeert. Dor warrt kort na’nanner twee ünnerscheedliche Faten vun de US-amerikaansche Flagg inblennt. Een Utsnitt is ogenschienlich Material ut en Archiv, bi dat nich markt worrn is, dat de Anorden un de Tall vun de Steerns anners is as to de Tiet vun den Optritt.
De Film weer tosamen 14 mol för naamhafte Filmpriesen vörslahn. Dorvun hett he ölven wunnen: