Cordel Hyde

Cordel Lesmore Hyde (* 1973) is en Politiker ut Belize (PUP).

Leven

[ännern | Bornkood ännern]

Hyde is 1973 as tweten Söhn von Claudette Coleman-Courtney un Evan X Hyde (* 30. April 1947), Rutgever von dat Bladd Amandala, boren.[1] He weer op dat Wesley College un dat St. John’s College.[2] He hett op dat Le Moyne College in Syracuse, New York, studeert un dat 1994 mit en Bachelor in Engelsche Kommunikatschoon afslaten.[1] Na dat Studium hett he as Journalist in dat Familienünnernehmen Kremandala arbeidt.

Politik

[ännern | Bornkood ännern]

He is na dat Enn von sien Studium in’n Mai 1994 in de Politik gahn un hett sik in de People’s United Party (PUP) engascheert.[1]

Bi de Parlamentswahl in Belize 1998 weer he Kannedaat för de PUP in’n Wahlkreis Lake Independence un hett de Wahl mit 68,90 % von de Stimmen gegen Hubert Elrington von de UDP wunnen. Bi de Wahlen 2003 (61,31 % von de Stimmen gegen Anthony Leslie, UDP) un 2008 (53,68 % gegen Vandley Rupert Jenkins, UDP) hett he in’n sülven Wahlkreis wedder wunnen.

Dormit weer he von 1998 bet 2012 Afornten von dat Repräsentantenhuus von Belize. He weer in düsse Tied ünner Premierminister Said Musa toeerst von 1998 af an Minister för Bildung un Sport (Kabinett Musa I). An’n 15. Oktober 2001 hett he tosätzlich dat Themenfeld Junge Lüüd in sien Ministerportfolio opnahmen, nadem Mark Espat dat afgeven müss.[3]

2003 is he in dat Kabinett Musa II Minister för Huusbo worrn. Tosätzlich hett he an’n 5. Januar 2004 von Juan Vildo Marin dat Amt as Minister för Verkehr övernahmen.

In’n August 2004 keem dat to ene Regerungskries, as rutkamen is, dat Finanzminister Ralph Fonseca Geller ut’n Soziaalversekerungsfonds bruukt hett, üm Kredite von private Ünnernehmens aftosekern.[4] Hyde un söss annere Ministers hebbt Musa opfeddert, Fonseca ut dat Kabinett ruttosmieten.[4] As Musa dat nich daan hett, wullen de söven Ministers (de Grupp is von de Medien in Belize „G7“ döfft worrn) all gemeensaam jemehr Ämter afgeven.[4] Musa kunn den Rüggtridd afwennen un Hyde is Minister bleven. An’n 29. Dezember 2004 hett Hyde denn aver in en Naklapp to de Regerungskries siene beiden Ministerien afgeven. Huusbo hett Servulo Baeza övernahmen un Verkehr Jose Coye.

An’n 3. November 2005 hett Hyde von Juan Vildo Marin dat Ministerium för Verdeffenderen övernahmen, von Sylvia Flores dat Ministerium för Huusbo un von Francis Fonseca dat Ministerium för Junge Lüüd un Sport.

An’n 22. Mai 2007 hett he dör en Kunflikt mit’n Premierminister all siene Ministerposten afgeven.[5] Nadem de PUP de Wahl 2008 verloren hett, weer he in de Oppositschoon.

Kort vör de Wahl 2012 is bi sien Söhn Khalid Kreeft faststellt worrn.[1] Dorüm is Hyde bi de Wahl 2012 nich wedder antreden.[1] Sien Söhn is in’t Butenland behannelt worrn, aver teihn Maand later in en Öller von 18 storven.[1] Nadem Hyde na Belize trüggkeem, hett he toeerst in dat Familienünnernehmen Kremandala arbeidt.[1]

Bi de Wahl 2015 hett Hyde den Wahlkreis Lake Independence mit 71,52 % von de Stimmen gegen Mark Anthony King von de UDP trüggwunnen. Bi de Wahl 2020 weer he in’n sülven Wahlkreis Kannedaat för de PUP. He hett 89,41 % von de Stimmen kregen un kunn sik dormit gegen Dianne Finnegan von de UDP dörsetten.

Dormit is he siet 2015 en tweet Maal Afornten von dat Repräsentantenhuus. 2015 bet 2020 seet he in de Oppositschoon. Siet 2020 hett de PUP de Regeren övernahmen un Premierminister Johnny Briceño hett Hyde as Minister för Natürliche Ressourcen un Viez-Premierminister beropen. In düsse Ämter is he an’n 16. November 2020 insworen worrn.[6]

Footnoten

[ännern | Bornkood ännern]
  1. ↑ a b c d e f g Indrag to Hyde op pup.org.bz
  2. ↑ The Jesuits and Kremandala, Amandala an’n 31. Oktober 2008
  3. ↑ Cabinet shuffle promotes Price, Samuels, Shoman, Channel 5 Belize an’n 15. Oktober 2001
  4. ↑ a b c Seven GOB ministers resign!, San Pedro Sun an’n 19. August 2004
  5. ↑ Deputy Prime Minister John Briceno Resigns, Eamon Courtenay Joins Him, 7 News Belize an’n 4. Juni 2007
  6. ↑ P.U.P. Area Representatives Sworn In as Cabinet Ministers, Channel 5 Belize an’n 16. November 2020
Viez-Premierministers von Belize

1981–1984: C. L. B. Rogers | 1984–1989: Curl Thompson | 1989–1993: Florencio Marin Sr. | 1993–1998: Dean Barrow | 1998–2007: Johnny Briceño | 2007–2008: Juan Vildo Marin | 2008–2016: Gaspar Vega | 2016–2020: Patrick Faber | 2020: Hugo Patt | 2020–: Cordel Hyde