De Pi-Puppiden sünd en Meteorstroom vun’n Süüdhimmel, de vun Middeleuropa ut nich to beobachten is. De Radiant liggt in’t Steernbild Achtersteven (Lat.: Puppis) bi ruchweg 7h 20m Rektaszension un -45° Deklinatschoon. De Stroom is jeed Johr vun’n 15. bit to’n 28. April to sehn un hett sien Maximum an’n 24. April.
De Aktivität vun de Pi-Puppiden is normalerweis teemlich lütt. Man in verleden Tieden sünd högere Meteortallen beobacht worrn, to’n Bispeel in de Johren 1977 un 1982, as de ZHR för en korte Tiet bi 40 Meteoren in de Stünn leeg. In disse Johren leeg de Mudderkörper 26P/Grigg-Skjellerup in sien Perihel, dat to de Tiet noch binnen de Eerdbahn leeg. Intwüschen is de Komeet dör de Gravitatschoon vun den Planet Jupiter op en ne’e Ümloopbahn lenkt worrn, sodat sien Perihel nu buten de Eerdbahn liggt. Wo aktiv de Meteorstroom bi tokamen Periheldörgäng vun den Komeet warrt, is nich seker.