Seev (Stroom)
| Seev | |
|---|---|
| Laag | Neddersassen |
| Stroomsystem | Elv |
| Läng | 49 km |
| Afströömrebeed | 471 km² |
| Born | bi Wehlen (op 67 m över NN) |
| Münn | bi Wuhlenborg in de Elv (op 2 m över NN) |
| Water je Sekunn | 5,1 m³/s |
| linke Blangenströöm | Steenbeek, Seevkanaal |
| rechte Blangenströöm | Rehmbeek, Weseler Beek, Smale Au, Ashuser Möhlenbeek |
| schippbor | - |
| Seen | - |
 | |
De Seev is en linken Blangenstroom von de Elv in Neddersassen un is 49 Kilometer lang.[1]
Ehren Born hett de Seev in’n Süden von Wehlen, dicht bi de Grenz na’n Landkreis Heidkreis in dat Naturschuulrebeed Lümbörger Heid. Von dor flütt se groff na Noorden an Inzmöhlen un Handörp langs. Bi Wörm dreiht se na Noordoosten un flütt na Holm. Dor gifft dat en Stauwehr för de ole Holmer Möhl un fröher en Saagwark. Denn geiht dat an Schierhoorn, Thälsdörp, Weih, Lüll un Wiedenhoff langs un denn dör den Oort Jesborg dör. Twüschen Heidwinkel un Marxen kummt von rechts de Smale Au. Denn geiht dat an Bendsdörp, Ramßel un Harmsdörp vörbi na Host. In Host gifft dat de Hoster Möhl. Dor flütt de Seev bi Hittfeld, Karoxbossel un Jehrden ünner de A 7, A 39 un twee Maal ünner de A 1 dör.
Bi Maschen flütt se ünner de Schenen von’n Rangeerbahnhoff Maschen dör. Von Mäkelfeld her is de Seev hier mit’n Seevkanaal verbunnen. De Seevkanaal schall Köhlwater na de Horborger Phönix-Warken bringen. De Beek flütt nu an Hössen langs, dör dat Naturschuulrebeed Ünner Seevdaal, nimmt den Ashuser Möhlenbeek op un münnt denn een Kilometer wieder bi Wuhlenborg un Over (Seevenhusen) in de Elv (Elvkilometer 604,9). An de Münn liggt dat Seev-Sparrwark.
De Seev hett de Watergöödklass II: beten belast. Blots de Ashuser Möhlenbeek hett de Göödklass II-III: kritisch belast[2][3].
De Gemeen Seevdaal is na de Seev nöömt.
Footnoten
[ännern | Bornkood ännern]- ↑ Michael Bergemann: Gesamtliste der Fließgewässer im Elbeeinzugsgebiet. 2012
- ↑ Gewässergüte Seeve-Süd
- ↑ Gewässergüte Seeve-Nord
Weblenken
[ännern | Bornkood ännern]
- Seev-Radweg (hoochdüütsch)
Koordinaten:53° 25′ N, 10° 6′ O