Sjónvarp Føroya ([ˈʃœnvaɻp ˈfœɹja], kort SvF) is de eenzige Feernsehsenner op de Färöer.
SvF is as apentlich-rechtliche Anstalt inricht un schall all 48.000 Inwahners vun de Eilannen mit dat Feernsehprogramm op Färingsch versorgen.
Plaans för en egen Feernseh-Programm op de Färöer geev dat al vun de 1960er Johren af an. 1969 hett dat Løgting ’n Fond to’n Opbo vun ’n Feernsehsenner inricht. Aver eerst 1978 hebbt se ok en Gesett rutbröcht, mit dat 1981 Sjónvarp Føroya grünnt worrn is. 1983 hebbt se en Bowark in Tórshavn, dat vördem en Möbelhuus weer, to’n Feernsehstudio utboot un den 1. April 1984 hebbt se de eerste Testsendung utstrahlt. An’n 1. September hett SvF denn sienen regulären Bedrief opnahmen.
In’t Vörjohr 1985 hebbt de vördem blots free anstellten Mitarbeiders denn ok faste Anstellungen kregen. Vun 1990 af an hebbt se noch mehr Studios toköfft.
Na dat Rundfunkgesett vun de Färöer schall sekerstellt warrn, dat elkeen Börger Feernsehn kriegen kann. Överall in’t Land staht Funkmasten un Verstärkerstatschonen, dat ok de aflegeneren Öörd un Eilannen dat Programm kriegen köönt.
De Intendant vun’n SvF warrt vun’n Kulturminister vun de Färöer insett. Hüüt hett SvF üm un bi 50 Mitarbeiders. De Feernsehraat ut negen Mann, de ok vun’n Kulturminister insett warrt, wacht över de Anstalt. In den Raat sitt Vertreders vun Universität, Kark, Jöögdraat, Gewerkschaften, Arbeidnehmerverbund, Journalistenverbund, Musikschool, Schrieververband, Färöösch Sportbund, Rentnerverbund un Bedriefsraat vun SvF.
Dat färöösche Feernsehn hett de Plichten objektiv to berichten, de Menensfreeheit to wohren, de färöösche Kultur to vermiddeln un de färingsche Spraak to plegen (een Drüddel vun de Tiet schall Programm op Färingsch lopen).
Siet den 1. Januar 2005 billt SvF mit den Radiosenner Útvarp Føroya de Medienanstalt Kringvarp Føroya.
Dat Geld kriggt de Senner dör Feernsehgeböhren. Se dröfft aver ok Warf maken un nehmt Geld dör Gewinnspelen in.
1984 hett SvF allens tohoop 790 Stünnen Programm wiest. 143 Stünnen weren Egenprodukschonen op Färingsch. De Rest keem ut Däänmark (to’n Bispeel ok US-amerikaansche Filmen mit däänsche Ünnertitels).
Na den Rechenschaftsbericht för 2003 hett SvF in dat Johr allens tohoop 2.799 Stünnen Programm wiest. 741 Stünnen oder 27 Perzent weren op Färingsch. Dat is knapp weniger as dat forderte Drüddel färingsch Programm.