| Filmdaten | |
|---|---|
| Plattdüütsch Titel: | — |
| Originaltitel: | The Star Packer |
| Düütsch Titel: | US Marshal John |
| Produkschoonsland: | USA |
| Johr vun’t Rutkamen: | 1934 |
| Läng: | 55 Minuten |
| Originalspraak: | Engelsch |
| Filmkru | |
| Speelbaas: | Robert N. Bradbury |
| Dreihbook: | Robert N. Bradbury |
| Produkschoon: | Paul Malvern |
| Musik: | Abe Meyer |
| Kamera: | Archie Stout |
| Snitt: | Charles R. Hunt |
| Dorstellers | |
| |
The Star Packer (op platt so veel as „De Steern-Packer“; dt. Titel: US Marshal John un annere) is de Titel vun en US-amerikaanschen Western ut dat Johr 1934 mit John Wayne in de Hööftrull. Speelbaas weer Robert N. Bradbury, de ok dat Dreihbook schreven hett. Dreiht weer de Film an verscheden Öörd in’n US-Bundsstaat Kalifornien as ok in de General Service Studios in Hollywood[1]. De Premiere weer an’n 30. Juli 1934 in de USA[2].
En Stadt warrt vun en Verbrekerbande terroriseert. Wokeen de Anföhrer is, weet keeneen, vunwegen dat he nich to faten to kriegen is. Dorüm warrt he ok „Schadden“ nöömt. Üm dat Drieven vun de Bande üm den Schadden en enn to setten, warrt jüst en ne’en Sheriff insett – twee annere sünd vörher al doodschaten worrn. To de sülven Tiet sünd eenige vun de legen Kerls jüst dorbi, de Kutsch to överfallen, vunwegen dat dor veel Geld to halen wesen schall. Man, John Travers is gauer wesen, de tosamen mit sien indiaanschen Fründ Yak ünnerwegens is un dat Geld schulen will.
Mit de Kutsch kommt de söte Anita Matlock in de Stadt, de dor en Unkel hett un de Hälft vun den sien Farm arvt hett. Kuum dat se ankamen is, warrt de ne’e Sheriff doodschaten. John springt vör em in, tomal ok anners nümms den Moot hett, dat mit de Verbrekers optonehmen. Tosamen mit Yak fangt he an natoforschen, un finnt ok gau en Spoor. Intwüschen versöcht Matt Matlock sien Nichte to övertügen, dat se ehrn Andeel an de Ranch verköpen schall, vunwegen de Gefohr in de Gegend.
Se kriggt aver vertellt, dat Matlock gor nich ehr Unkel is, man een vun de Verbrekers, de sien Platz innahmen hett, nadem ehr wohren Unkel vun de Bande an de Siet maakt worrn is. Aver ok John un sien Fründ kamt dorachter, wat in de Stadt lopen deit. John stellt sik denn as Marshal vun de US-Regeren rut, de opletzt de Lüüd in de Stadt in en Slacht gegen de Verbrekers föhren deit. As wedder Freden in de Stadt inkehrt is, heiraat he Anita un leevt mit ehr op de Ranch.
De Film höört to en Reeg vun B-Movies ut de Lone-Star-Reeg, de sik dordör uttekent, dat vele Elementen un Dreihöörd jümmer wedder mol vörkamt. Dat gellt ok för de Schauspelers sülvst. De Stunts sünd in den Film vun Yakima Canutt un Eddie Parker maakt worrn, de beide ok wichtige Rullen in den Film speelt.
De Film bargt en Reeg vun Logik- un Filmfehlers. To’n Bispeel reddt John Anita nich an de glieken Steed, woneem de mit den Wagen in’t Water fallen is. Ok de Geldtasch ut den Kutschenöverfall warrt vun John nienich dragen, liekers aver faken vun em bruukt.