एभरेष्ट प्रिमियर लिग २०७४ नेपाली घरेलु क्रिकेट प्रतियोगिता एभरेष्ट प्रिमियर लिगको दोस्रो संस्करण थियो। यसको प्रायोजक टिभिएस भएका कारण यसको नाम टिभिएस एभरेष्ट प्रिमियर लिग राखिएको थियो। यो नेपालमा व्यावसायिक पुरुष घरेलु ट्वान्टी–२० क्रिकेट प्रतियोगिता थियो। यो प्रतियोगिता २०७४ पुष ३ देखि २०७४ पुष १५ सम्म आयोजना गरिएको थियो। [२]प्रतियोगितामा ६ टोलीहरूले प्रतिस्पर्धा गरेका थिए र तिनीहरूको नाम नेपालका प्रमुख सहरहरूमा आधारित थियो।
प्रतियोगिता अवधिभर विराटनगर वारियर्स अपराजित रहेको थियो। फाइनलमा भैरहवा ग्लाडियटर्सलाई १ रनले पराजित गरेपछि टोली विजेता बनेको थियो। बाबर हयात सर्वाधिक रन बनाउने र प्रतियोगिताको सर्वाधिक छक्का प्रहार गर्ने खेलाडी बनेका थिए। भैरहवा ग्लाडियटर्सका लागि केही खेलमा राम्रो प्रदर्शन गरेकोमा रोहितकुमार पौडेल सर्वाधिक मूल्यवान खेलाडीका रुपमा पुरस्कृत भएका थिए। प्रतियोगितामा इसरारुल्लाह र वसन्त रेग्मीले १२ विकेट लिएका थिए।
इपिएल प्रालिले २०७४ साउन १५ मा काठमाडौँको दरबारमार्ग स्थित एभरेष्ट प्रिमियर लिगको दोस्रो संस्करणको घोषणा गरेको थियो। एभरेष्ट प्रिमियर लिगका संस्थापक आमिर अख्तरले प्रतियोगिताको विजेतालाई २ लाख १० हजार रुपैयाँ पुरस्कार राशिको खुलासा गरेका थिए। उनले भाग लिने टोलीको नाम सहरहरूमा आधारित हुने घोषणा पनि गरेका थिए। प्रतियोगिताको लोगो नेपाली राष्ट्रिय टोलीका पूर्व कप्तान पारस खड्का र मुख्य प्रशिक्षक जगत टमाटाले समारोहमा अनावरण गरेका थिए।
दिपेन्द्र सिंह ऐरी, शक्ति गौचन, सोमपाल कामी, पारस खड्का, ज्ञानेन्द्र मल्ल र शरद भेसावकरलाई प्रत्येक टिमले छनोट अघि नै प्रमुख खेलाडीका रूपमा नामित गरेका थिए। प्रत्येक टोलीले १ लाख रुपैयाँ खर्च गर्न पाउने व्यवस्था मिलाइएको थियो। लिलामी २०७४ कात्तिक १७ मा सम्पन्न भएको थियो र ६० खेलाडी (प्रत्येक टोलीलाई १०) को रूपमा वर्गीकरण गरिएको थियो। सर्वाधिक रु.१,७५,००० बोली रहेको लिलामीमा बिनोद भण्डारी, करण केसी, सन्दीप लामिछाने र आरिफ शेख महँगा खेलाडीको रूपमा रहेका थिए।[३]
प्रत्येक टोलीमा १५ जना खेलाडीहरू थिए। प्रत्येक टोलीले १० खेलाडीलाई लिलामी मार्फत खरिद गरेका थिए। आ-आफ्नो सहरका प्रत्येक टोलीले आफ्नो टोलीमा एक युवा खेलाडी प्राप्त गर्नका लागि प्रतिभाको खोजी गरेका थिए। त्यसैगरी टोलीमा कम्तिमा तीन जना विदेशी खेलाडी आ–आफ्नो पक्षमा परेका थिए।
नेपाल
