Fjærland

	Fjærland
	stad
	Inst i Fjærlandsfjorden
Land	Noreg
Fylke	Vestland
Kommune	Sogndal
Postnummer	6848 FJÆRLAND
Ferdselsårer	Fv5617
	; Fjærland; 61°24′08″N 6°44′19″E / 61.402222222222°N 6.7386111111111°E
	Wikimedia Commons: Fjærland

Fjærland er eit sokn og ei bygd i Sogndal kommune i Vestland fylke og ligg på begge sider av inste delen av Fjærlandsfjorden, som er ein arm av Sognefjorden.

Fjærland ligg ved foten av Jostedalsbreen, omgjeve av høge fjell, og hadde lenge ikkje anna samband med omverda enn med båt. Dette endra seg brått då Fjærland ferjekai og ferjesambandet Balestrand-Hella-Fjærland opna i 1974. Sidan kom dåverande Riksveg 625 i tunnel frå Jølster til bygda i 1986, og i 1994 kom ny Riksveg 5 frå Sogndal.

Jostedalsbreen nasjonalpark er lettast tilgjengeleg i Fjærland (Sogndal kommune), og i Jostedalen (Luster kommune), og breen er godt synleg frå Riksveg 5. Ein kan òg gå på guida breturar ved å kontakte bremuseet. Norsk bremuseum ligg ved fjordbotn, medan Mundal hotell og Fjærland kyrkje ligg kring to kilometer lenger ute på vestsida av fjorden, i Mundal. I Mundal har det sidan 1995 òg vore bokby.

Mange turistar kjem til Fjærland i sommarhalvåret for naturopplevingar, blant dei i mange år Walter Mondale, som hadde eit spesielt tilhøve til staden sidan besteforeldra hans kom frå bygdesenteret Mundal. Det var han som opna Fjærlandstunnelen. Mange cruisebåtar er innom Fjærland.

Ved folketeljinga i 2001 budde det 284 personar i Fjærland delområde. Dei var fordeld på 145 i Indre Fjærland grunnkrins, 128 i Mundal grunnkrins og 11 i Ytre Fjærland grunnkrins.^[1]

Kommunesoge

Ved skipinga av formannskapsdistrikta i 1838 høyrde Fjærland til Leikanger. I 1850 vart Leikanger deld i to og Fjærland høyrde frå då til den nyoppretta Balestrand kommune.^[2] Slik var det i 150 år til år 2000 då området etter ei folkerøysting vart overført til Sogndal kommune.^[3]

Fjærland kyrkjesokn

Fjærland er eit kyrkjesokn i Indre Sogn prosti. Det er ei kyrkje i soknet, Fjærland kyrkje frå 1861 i Mundal. Dagens kyrkje erstatta ei tømra kyrkje frå kring 1610. Før det stod det ei stavkyrkje frå 1100-talet på garden Bøyum fire kilometer nordom Mundal.^[4] Frå 1850 til 2000 høyrde soknet til Balestrand prestegjeld, og fram til 1861 heitte det Mundal sokn. Før 1850 høyrde Fjærland til Leikanger prestegjeld.^[5]

Kjelder

SSB: Kart som viser tettstader, delområde og grunnkrinsar i Sogndal kommune

Fotnotar

Bakgrunnsstoff

[1] SSB: «Folke- og boligtellingen 2001, kommune- og bydelshefter 1420 Sogndal» s. 51

[2] [http://www.ssb.no/emner/00/90/rapp_9913/rapp_9913.pdf Dag Juvkvam: «Historisk oversikt over endringer i kommune- og fylkesinndelingen», s. 53, på nettstaden til Statistisk sentralbyrå

[3] «Kommunehistoria i Sogndal» på NRK Sogn og Fjordane Fylkesleksikon

[4] «Fjærland kyrkje» på NRK Sogn og Fjordane

[5] Nettstaden digitalarkivet.no: Kart som viser avgrensinga av prestegjelda i Nordre Bergenhus amt i 1801, arkivert frå originalen 30. oktober 2007, henta 10. desember 2008

[1]

[2]

[3]

[4]

[5]