| Ole Stavrum | |
| Statsborgarskap | Noreg |
| Fødd | 22. mai 1940 (84 år) Kristiansund kommune |
| Idrett | fotball |
Ole Einar Stavrum (fødd 22. mai 1940) er ein tidlegare fotballspelar frå Kristiansund som vart seriemeister 1964 med Oslo-klubben Lyn. Han fekk tilnamnet «Dukkopp» grunna si evne til å vere på rett plass framom mål og så skåre. Også sønene Ole Erik og Arild Stavrum spelte fotball på høgste nivå i Noreg.
Stavrum spelte på Clausenengen FK til 1960. Sommaren 1960 flytta han til Oslo og byrja studere filologi. Året etter melde han seg inn i SFk Lyn, debuterte med å skåre dei to fyrste måla då Frigg vart slått 3–1 i Hovudserien den 2. august. Åra 1961–67 skåra han 82 mål på 96 kampar. Lyn vart seriemeister i 1964, ein sesong der Stavrum skåra 18 av lagets 39 mål og vart toppskårar i 1. divisjon. Han var med då Lyn tapte NM-finalen 1966 mot Fredrikstad FK med 2 mot 3, utlikna til 2–2 i andre omgang.
I juni 1967 flytta Stavrum heim til Kristiansund og byrja spele på Clausenengen, som då hadde rykka opp i 3. divisjon. Han var toppskårar i Møre-avdelinga både i 1970 og 1971. I 1971-sesongen stod han for 15 av lagets 26 nettkjenningar i serien og syrgde slik for at klubben rykte opp i 2. divisjon for aller fyrste gong. Han var spelande trenar til 1974, då det vart nedrykk. I 1975 var han aktiv i Nordlandet, frå 1976 trente han Kristiansund Fotballklubb.
Stavrum fekk sin landslagsdebut då Noreg vann 3 – 2 over Sveits på Brann stadion den 1. juli 1964, også rekkekamerat Harald Berg debuterte på landslaget då. Fram til august 1966 deltok Stavrum i 8 landskampar, skåra i 1965 mål mot Danmark på heimebane og mot Jugoslavia i Beograd, begge oppgjera enda uavgjort.