| Silver Bells Song av Bing Crosby & Carol Richards med John Scott Trotter and His Orchestra | ||
| Utgjeve | Oktober 1950 | |
| Sjanger | Julesong | |
| Komponist | Jay Livingston, Ray Evans | |
| Tekstforfattar | Ray Evans, Jay Livingston | |
| Låtskrivar(ar) | Jay Livingston, Ray Evans | |
|---|---|---|
«Silver Bells» er ein populær julesong, skriven av Jay Livingston og Ray Evans.
«Silver Bells» vart først framført av Bob Hope og Marilyn Maxwell i filmen The Lemon Drop Kid, filma i juli og august 1950 og gjeven ut i mars 1951.[1] Den første innspelte versjonen var av Bing Crosby og Carol Richards med John Scott Trotter and His Orchestra, gjeven ut på Decca Records i oktober 1950.[2] Etter Crosby- og Richards-innspelinga vart populære, vart Hope og Maxwell henta attende seint i 1950-åra for å filme på ny ein meir utførleg produksjon av songen.[1]
«Silver Bells» hadde først tittelen «Tinkle Bells.» Ray Evans sa «Me tenkte aldri på at tinkle hadde fleire tydingar, før Jay kom heim og den første kona hans sa, 'Er de galne? Veit de ikkje kva tinkle tyder?'» Ordet er slang for urinering.[3]
Det har kome fleire soger om inspirasjonen til songen. Fleire magasin og intervju har sitert Jay Livingston på at inspirasjonen til songen kom frå bjøllene julenissane og folk frå Frelsesarmeen nytta på gatehjørna i New York City.[4][5][6] Men i eit intervju med Ray Evans til NPR sa han at songen var inspirert av ei bjølle som stod på kontoret dei delte.[7]
Songen gjekk inn på salslista i Storbritannia for første gongen i 2009, då ein duett med Sir Terry Wogan og Aled Jones vrt spelt inn for veldedige føremål. Singelen nådde 27. plassen.[8]