Mèstre de Cabestany
Lo Mèstre de Cabestany es un escalpraire de la segonda mitat del sègle XII. Es pas identificat precisament, mas es conegut per l'estil particularament original de sas òbras que s'encontran mai que mai dins de glèisas o d'edificis religioses en Lengadòc, Catalonha, Navarra e Toscana, es a dire practicament al long dels dos camins principals de peregrinatge de l'epòca, Roma e Sant Jaume de Compostèla.
Son origina demòra desconeguda e benlèu qu'èra un artista itinerant que se desplaçava de talhièr en talhièr. Foguèt nomenat Mèstre de Cabestany, pr'amor qu'una de sas òbras màgers es lo timpan de la glèisa del vilatge de Cabestany situat a 4 km de Perpinhan. L'originalitat de son estil lo despartís de totes los artistas de son epòca, lo tipe fisic dels seus personatges es gaireben una signatura: d'uèlhs globilhós, d'aurelhas grandas escartadas, un nas trencant un còs rabassut amb de mans fòrça alongadas.Tot aquò ne'n fa de personatges que pòdon aver un aspècte siá suau, siá esglasiant.
Sas òbras
[modificar | Modificar lo còdi]- Lo lindal e lo timpan de la glèisa d'Errondo en Navarra (que se trapa ara als Estats Units).
- Lo portal del Monastèri de Sant Pere de Rodes en Catalonha (qu'un tròç se trapa al Musèu Marés a Barcelona).
- Lo timpan de la glèisa de Cabestany e lo portal de la glèisa del Voló en Rosselhon.
- Un ancian portal a La Grassa dins Aude.
- Los capitèls de l'absida a Sant Pàpol dins Aude.
- Lo sarcofag de Sant Ilari dins Aude.
- Los capitèls de Riu Menerbés dins Aude.
- Los leons de l'abadiala de Sant Antimo a Montalcino en Toscana.
- Un capitèl a Habacuc
- Un supòrt de senhador a Sant Giovanni in Sugana prèp de Florença.
NB: A Sant Esteban de Basal sud d'Olot e a Sant Pere de Galligans prèp de Girona, de capitèls son fòrça pròches del seu estil mas li son pas atribuits dirèctament.