Calypso Rose

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Calypso Rose
Calypso Rose
Informashon básiko
Nasementu 27 di aprel 1940
Tobago
Obra
Género musikal kalipso
Ofishi musiko, compositor di cancion
Wèpsait ofisial
(en) AllMusic-profil
(en) Discogs-profil
(en) IMDb-profil
(en) Last.fm-profil
(en) MusicBrainz-profil
[Editá Wikidata] · [Manual]

Calypso Rose, nòmber artístiko di McCartha Linda Monica Sandy-Lewis (☆ 27 di aprel 1940 na Bethel, Tobago) ta un kantante i kompositor di kalipso di Trinidad i Tobago.[1] E tabata e promé muhé pa bira un strea di kalipso, género musikal den kual hende hòmber tabata dominá na Trinidad. Ku frekuensia e letra di su kantikanan tabata trata temanan sosial, manera rasismo i seksismo. E tin numeroso premio riba su nòmber i ta wòrdu konsiderá Mama di Kalipso.

Biografia

[editá | editá fuente]

Rose a nase den un famia grandi di 13 yu na Tobago, un di e islanan konstituyente di Trinidad i Tobago. Ku nuebe aña el a bai biba serka un tanta na e isla di Trinidad.[2] For di edat di 15 aña e tabata skirbi kantika. Inisio di su karera komo kantante di kalipso tabata na 1957, inisialmente bou di e nómber artístiko "Crusoe Kid", pero e ta kambia esaki pa "Calypso Rose". Na edat di 24 aña kaba e tabata kantante profesional.[3] Rose a kompone mas ku 1000 kantika i a graba mas ku 20 album diskero.[4]

Su promé título den kanto el a logra na Islanan Birgen, saliendo ganadó di e kompetensia den tantu kategoria kalipso komo road march. Na 1966 el a skirbi e kantika "Fire in Meh Wire", ku a bira un hit internashonal, inkluso na Karibe Hulandes, i ku a wòrdu tradusí den ocho diferente idioma. E tabata e promé kalipso ku a forma parti di karnaval di Trinidad pa dos aña sigui.[5]

Calypso Rose na 2016.

Di 1972 pa 1976 el a sali ganadó di e título 'Calypso Queen'. Ku e komposishon "Gimme more tempo" e ta bira e promé muhé pa gana e título nashonal di road march na 1977. Un aña despues e ta wòrdu koroná dos bes; komo 'Calypso Queen' i 'Calypso King' ("Her Majesty" i "I Thank Thee"). Dor di su influensia riba e género di kalipso e tabata nesesario pa kambia e título maksimo di "Calypso King" pa "Calypso Monarch".[3] E mesun aña el a sali ganadó di road march ("Soca Jam") i ta dura te 1999 pa e siguiente hende muhé logra e título aki.

Calypso Rose na 2016 durante e Festival du Bout du Monde na Fransia.

Meimei di dékada 1970 Rose a muda pa New York. Aki el a sigui pa presenta den shownan ku artistanan famoso di Merka manera Michael Jackson, Harry Belafonte, i Roberta Flack. Durante su karera Rose e hasi gira na diferente parti di mundu, por ehempel Belize, Chile, paisnan skandinaviko i afrikano. Na 2017 gobièrnu trinitario a otorg'e un pasaporte diplomátiko komo rekonosementu di a risibí e premio franses riba nivel di grammy, 'Victoire de la Musique', pa su album "Far From Home".

Calypso Rose ta aparesé den diferente dokumentario, manera "Calypso at Dirty Jim's", “One Hand Don't Clap” i "Calypso Rose, Lioness in the Jungle". Su bida i karera mes tabata e enfoke di varios pelíkula: “Bacchanal Time” (1979), “Women in Calypso” (1990), “Calypso Dreams” (2004) i “Calypso Rose – Lioness of the Jungle” (2011).

Diskografia

[editá | editá fuente]
  • 1969: Queen Of The Calypso World
  • 1970: Calypso Queen Of The World
  • 1972: Sexy Hot Pants
  • 1977: Her Majesty Calypso Rose
  • 1977: Action is Tight
  • 1978: Mass Fever
  • 1979: We Rocking For Carnival
  • 1980: Ah Cant Wait
  • 1981: Mass in California
  • 1983: Rose Goes Soca Unlimited
  • 1984: Trouble
  • 1985: Pan in Town
  • 1986: Stepping Out
  • 1987: On Top Of The World
  • 1987: Leh We Punta
  • 1989: Soca Explosion
  • 1990: Soul On Fire
  • 1992: Rosie Doh Hurt Dem
  • 1993: Breaking The Sound Barrier
  • 1993: Soca Diva
  • 2008: Calypso Rose
  • 2016: Far from Home
  • 2018: So Calypso!
[editá | editá fuente]

Wèpsait ofisial