Lucio Cecili Giocond

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Lucio Cecili Giocond (Lucius Coecilius Jucundus) a sarìa nàit a la fin dël regn d'August, dël 14, o al prinsipi ëd col ëd Tiberi, ch'a l'ha suceduje. A sarìa ël fieul ëd në s-ciav afrancà dventà banché.

Lucio Giocond a l'ha fàit ël banché ëdcò chiel. Dël 1875 dle taulëtte, ch'a mzuro dai 10 ai 15 centim ëd larghëssa, a son ëstàite trovà ant le ruin-e ëd soa fiamenga ca ëd Pompei. Sa ca a l'avìa vàire stansie piturà, n'andor (atrium), stansia sentral con fontan-a e vasca d'eva); un tablinum, anté ch'as arseivìo ij client e ch'a servìa ëdcò da stansia d'archivi; na sala da disné (triclinium); un santuari e un giardin.

L'atività ëd banché

Le taulëtte a testimònio an sl'atività d'argentarius ëd monsù Giocond. Ij sò client a j'ero ëd condission sossiaj motobin varià: gent modesta, s-ciav afrancà, ma ëdcò dij mèmber ëd l'àuta socetà dla sità.
Na taulëtta an anforma dla vèndita d'un mul për 50 sesters, fàita da 'n monsù March Nico, në s-ciav afrancà, a n'àutr afrancà, March Euprat. N'àutra a massion-a l'aquist ëd na pastura për 2675 sesters, vendùa da Modest e Vibio Second. N'àutra ancor a trata ëd n'ancant, për ël qual Giocond a l'ha antissipà 38079 sesters a March Lero, për na comission ëd 2% dël total.
Ansima a tute le taulëtte a son arportà ij nòm dij testimòni dl'operassion.

Lucio Giocond a fasìa ëdcò d'operassion con la sità ëd Pompei, a partissipava a l'arvèndita dë s-ciav (coma coj catà a l'ancant dal senturion Publio Alfen) e a fasìa dij viage d'afé, 'me testimonià da soa presensa a Nocera, an Umbria. A cujìa ëdcò dle taje coloniaj.

An soa ca a l'é 'dcò stàit artrovà un bust an màrmol dël banché, al di d'ancheuj goernà a Nàpoli.
Lucio Giocond a sarìa mòrt durant l'erussion dël Vesuvi ch'a l'ha crasà Pompei dlë 79, opura ant ël 62 dagià che la daitassion dle taulëtte as fërma a col ann-là, cand a-i é staje un taramòt ch'a l'ha frapà la sità.