Maria Adelaide Sneider

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Matemàtica. Maria Adelaide Sneider a l'era nassùa a Asmara ai 6 dë dzèmber dël 1937. Ij sò a l'avìo tramudà an cola sità chèich agn prima, ma për via dj'aveniment ëd la guèra a l'han dovù chité l'Àfrica oriental për rintré an Italia che la fija l'era ancor cita. Dël 1954, finì jë studi secondari, la fija a l'é anscrivusse a la facoltà d'angegnerìa dl'Università ëd Roma, ma dòp ij prim doi agn a l'é passà al cors ëd làurea an Matemàtica. A l'ha prontà soa tesi a l'Anstitù nassional për j'aplicassion dël càlcol e a l'é laureasse dël 1958. Pen-a laureà a l'é andàita a travajé an na granda asienda ch'a fasìa cabalison. La cariera ant l'università Tutun soa aspirassion a restava l'arserca sientìfica e a l'ha mantnù dij contat ës-ciass con l'università, an fasendie j'esercitassion tanme assistenta volontaria. Dël 1968 a l'ha vagnà un concors për un pòst d'assistent an ròl a la càtedra d'Anàlisi matemàtica a Roma e a l'ha cangià 'd travaj. Dël 1970 a l'ha pijà ël lìber ansegnament an Anàlisi numérica. Dël 1972 a l'é stàita nominà professorëssa a Lece e a l'é restà ambelelà fin-a al 1974, cand a l'ha podù torné a Roma. Maria Adelaide Sneider a l'é mòrta a l'amprovista ant la neuit antra ij 30 d'avril e ël 1^m ëd maj 1989. Soe arserche matemàtiche Sò prim travaj amportant a l'é stàit na memòria, longa pì che sent pàgine, andoa a l'ha afrontà ël problema dël càlcol numérich rigoros (visadì për ecess e për difet) dla capassità eletrostàtica ëd na surfassa sarà condutris Σ, frontera d'un camp limità d'${\displaystyle \mathbb {R} ^{3}}$. Ës problema a consist ant ël cont ëd l'antëgral ${\displaystyle C={\frac {1}{4\pi }}\int _{\Sigma }{\frac {\partial u}{\partial \nu }}d\sigma }$, anté che u a l'é la fonsion armònica dël camp E fòra 'd Σ, ch'a val 1 ansima a Σ e as anula a l'infinì e ${\displaystyle {\frac {\partial u}{\partial \nu }}}$ a l'é la derivà normal d'u su Σ scond la normal anterna a Σ. Sneider a l'ha otnù l'aprossimassion 0,6543<C<0,666. Antant ch'a l'era professorëssa a Lece, Francesco Bertola, che a col temp a l'era titolar dla càtedra d'Astronomìa an cola università, a l'ha proponuje lë studi dl'equassion antegr-diferensial ${\displaystyle f(x)+ax{\frac {u'(x)}{u(x)}}+cx\int _{0}^{x}u(t)\varphi ({\frac {t}{x}})dt=0}$, anté che f a l'é na fonsion real ësmonùa, definìa ant l'antërval ${\displaystyle [0,x_{0}]}$, tal che f(0)=0 e ch'a sodisfa dj'ipòtesi ëd regolarità, φ a l'é na fonsion real continua an [0,1], a e c a son ëd costante assignà e u a l'é l'incògnita che ël problema fìsich (l'equassion a l'avìa soa adoss ant la dinàmica dle galassie) a ciama ch'a sia definìa ansima a tut l'antërval ${\displaystyle [0,x_{0}]}$ e sempe positiva. Sneider, an na memòria d'apopré sinquanta pàgine, a l'ha costruì na teorìa esaurienta ëd costa equassion, an dimostrand ëd teorema d'esistensa, unicità, dipendensa continua dai dàit e fabricand ëd procediment për ël cont ëd la fonsion incògnita u.

Aiuto per la lettura Ayuda para la lectura Help for Reading Rintré ant la Piòla Contaté j'Aministrator Lìber për Amprende Coression ortogràfica Tastadura piemontèisa Portaj e Proget Agiut pr'ij Contributor Travajòt sempi