RH Bing

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Matemàtich.
RH Bing (sò nòm a l'era pròpe mach RH) a l'era nà dël 1914 a Oakwook, an Texas. A l'era fieul ëd Rupert Henry, un bidel che peui a l'ha fàit ël paisan.

Bing a l'avìa sinch agn cand sò pare a l'é mòrt e soa mare, na magistra, a l'ha dovù cudì da sola chiel e soa cita seur. Soa mare a l'ha mostraje a lese motobin prima ch'a andèissa a la scòla elementar. Finì ël liceo (n'ann prima përchè a l'avìa sautà na classa) a l'é anscrivusse al Southwest Texas State Teacher's College (ch'a sarà pì tard l'Università statal dël Texas a San Marcos) anté ch'a travajava a la mensa për podèj mantense.

Laureasse an matemàtica, a l'é vnù professor ëd liceo. Con ël but d'oten-e n'aument, Bing a l'ha ancaminà a travajé për oten-e un tìtol dë studi a l'università dël Texas, a Austin. Ambelelà a l'ha rancontrà l'arnomà topòlogh Robert L. Moore, ch'a l'ha acetalo tanme student ëd dotorà e a l'ha procuraje un pòst d'ansegnament. A l'é ambelelà che Bing a l'ha conossù Mary Blanche Hobbs, ch'a dventrà soa fomna.

La tesi ëd dotorà ëd Bing, che Moore a l'ha giudicà fiamenga, a l'é stàita publicà an sle Transactions of the American Mathematical Society. Mach un mèis apress esse dotorasse, a l'ha arzolvù l'ansidit problema ëd Kline.
Bing a l'ha arseivù l'oferta d'un pòst a l'università ëd Princeton, ma a l'ha arfudala e a l'ha pijà dël 1947 un pòst a l'università dël Wisconsin a Madison. Dël 1973 a l'ha acetà un pòst a l'università dël Texas, an ëdventand ël professor universitari pagà mej ëd tut lë stat.

Bing a l'é stàit elegiù mèmber ëd l'Academia dle siense merican-a e a l'é stàit pressident ëd l'Assossiassion dij matemàtich merican.

A l'é mòrt dël 1986.

A pòrto sò nòm

Teorema ëd Bing-Borsuk