مظفر خان سدوزئی

مظفر خان سدوزئی
شاہی خاندان	درانی سلطنت
پیؤ	شجاع خان سدوزئی
جم	1757 قندہار
موت	جون 1818 ملتان

مظفر خان سدوزئی، اک افغانی سردار سی۔ اوہ افغان درانی سلطنت ولوں ملتان تے راج کر رہیا سی۔ اوہ 1757ء وچ قندہار وچ جمیا، درانی سلطنت دے شجاع خان دا وڈا پُت سی۔ اوہ چار بھائی تے اک بھین سن۔ اوہ سِول ایڈمنسٹریشن تے جنگ دے بارے وچ مہارت رکھدا سی۔ اوہنے چھوٹی عمر وچ ریاستی امور وچ حصہ لیا۔ اوہدی عمر 18 سال سی جد اوہدے باپ نے جنوری 1775ء وچ اوہنوں کابل جان لئی اک مشن دی قیادت کرن دی ہدایت کیتی۔ اوہدا مشن ناکام رہیا لیکن اوہنے افغان بادشاہ دی توجہ حاصل کرلئی۔ فروری 1775ء وچ ملتان دے محاصرے دے دوران اوہنے افغان دستے دی قیادت کیتی۔ اوہ اکتوبر 1775ء نوں اپنے باپ دا جانشین بنیا۔ مظفر خان سدوزئی 1780ء تک ملتان اُتے قبضہ نئیں کر سکیا۔ فیر اوہنوں افغانستان دے بادشاہ تیمور شاہ درانی نے ملتان دا حکمران مقرر کر دِتا۔

نواب بہاولپور دے تعاون نال 1818ء وچ رنجیت سنگھ نے اپنی فوج ملتان بھیجی۔ فوج دا کمانڈر مسر دیوان چند سی۔ اس فوجی کارروائی دا مقصد ملتان وچوں افغانی حکومت دا خاتمہ سی۔ 1818ء وچ کھڑک سنگھ تے ہندو کمانڈر مسر دیوان چند دے ہتھیاراں دے دستے نے ملتان دے ارد گرد محاصرہ کرلیا۔ مظفر خان نے ملتان شہر دے لوکاں نوں کہیا کہ اوہ ہندو تے سکھ فوجیاں دے خلاف جنگ لڑن لیکن مظفر خان دی ایہ حکمت عملی ناکام ہوگئی کیونکہ لوکاں نے غیر جانبدار رہنا پسند کیتا۔ اس جنگ وچ مسر دیوان چند دی فوج نوں کامیابی مِلی، مظفر خان سدوزئی اپنے پُتراں سمیت ہلاک ہوگیا تے جون 1818ء وچ ملتان اُتوں افغان درانی سلطنت دا خاتمہ ہوگیا۔

حوالے