Атентат на Леонида Брежнева

Леонид Брежнев в року 1973

Атентат на Леонида Брежнева учинив 22. януара 1969^[1] дезертер зоз Совѣтской Армии Виктор Ильин, острѣлявшый колону авт, в котрой мав быти совѣтскый лидер з козмонавтами. Хоть Брежнев не утерпѣв зранѣня, кулѣ забили шофера и легко ранили даколькох козмонавтох. Атентатник быв влапленый на мѣстѣ чину, а на всякы медийны вѣсти о том атентатѣ быв на вельо рокы покладеный строгый заказ.

Оголошена стрѣча козмонавтох

16. януара 1969 совѣтскы козмонавты Владимир Шаталов, Борис Волынов, Алексей Елисеев и Евгений Хрунов первый раз успѣшно споили в козмосѣ два апараты и створили перву во свѣтѣ орбиталну козмичну станицю. На 22. януара 1969 в Москвѣ в Кремлю мала ся одбыти велика славность, де новы Герои СССР мали достати державны вызнаменаня. Колону авт з козмонавтами перед Кремльом з великов честьов стрѣчали зобраны ряды людей и оддѣлы милиции.

Атентатник

Виктор Иванович Ильин родив ся в Ленинградѣ в року 1947. Закончив науку в промысловцѣ в року 1968, а такой по штудиях быв мобилизованый до войска^[2] в шаржи лайтнанта.^[3] Ильин не таив ся, же го мерзило нежадане поволаня до войска и быв знепокоеный совѣтсков инвазиов до Чехословакии.

21. януара 1969 Ильин украв двѣ пиштолѣ и набои ку ним и дезертовав з военской единкы. Вылетѣв до Москвы и подарило ся му прилетѣти, хоть на тот час уже в единцѣ увидѣли, што ся стало и сповѣстили безпеку. В Москвѣ пришов ку свому шовгору, котрый служив в милиции, и повѣв му, же пришов увидѣти козмонавтох. Од шовгора украв милицийну униформу^[4] и став меджи двома оддѣлами милиции, котры ся не познавали, и так каждый думав, же он е з другого оддѣла.

Атентат

22. януара 1969 в 2 год. 15 мин., коли колона авт переходила воротами Кремля, Ильин, держачи по пиштоли в каждой руцѣ, зачав пальбу по другому авту в колонѣ. Позднѣйше он признав ся, же подля его знатя, в другом автѣ звык ся везти Брежнев. Але на тот раз мав пех, в той лимузинѣ были лем козмонавты зоз скоршых мисий: Алексей Леонов, Валентина Терешкова, Георгий Береговой и Андриан Николаев.^[1]

Ильиновы кулѣ засягли авто четыринадцять разы,^[4] забивши шофера,^[2] Илью Жаркова, скорше як охранцѣ зразили атентатника моторков. Иншы пасажеры авта зостали недоткнуты, або лем легко ранены.^[2] Ильин быв арештованый, а церемония вызнаменаня одбыла ся, як было плановано, лем ся мало опозднила.^[4]

Наслѣдкы

Ильин быв довго выслухованый безпеков. Наконець быв вызнаный психично хворым и быв умѣщеный в самотцѣ Казанского психиатричного шпиталя, де перебыв до року 1988.^[3] В року 1988 мати Ильина выпросила, жебы го перемѣстили до Ленинградского психиатричного шпиталя, а по пару роках быв выпущеный на волю.^[5]

Референции

1. Gunman Attacks Car in Kremlin, 2 Wounded. // The New York Times, 24 January 1969. Одчитане 26.09.2014 ‹Dateline: Moscow, 23 January› The Soviet Union disclosed today that a man fired several shots yesterday...
2. Zubok, Vladislav M. (2009). Zhivago's Children: The Last Russian Intelligentsia. Cambridge: Harvard University Press. pp. 297. ISBN 0-674-03344-2. https://books.google.com/books?id=j8rxUKEXVHYC&lpg=PA297&ots=rYhcO4vSXB&dq=%22viktor%20ilyin%22%20%2Bbrezhnev&pg=PA297#v=onepage&q&f=false. 
3. Albats, Yevgenia (1995). KGB: State Within a State. London: I.B. Tauris. pp. 191. ISBN 1-85043-995-8. https://books.google.com/books?id=zeYEhcHWjEUC&lpg=PA191&ots=Gs2cVN2_D8&dq=%22viktor%20ilyin%22%20%2Bbrezhnev&pg=PP1#v=onepage&q&f=false. 
4. French, Francis; Burgess, Colin (2007). In the Shadow of the Moon: A Challenging Journey to Tranquility, 1965–1969. Lincoln, NE: University of Nebraska Press. pp. 277–278. ISBN 0-8032-1128-7. https://books.google.com/books?id=y_16I8NzSjEC&lpg=PA277&ots=lHLvx-QdPB&dq=%22viktor%20ilyin%22%20%2Bbrezhnev&pg=PP1#v=onepage&q&f=false. 
5. Александр Железняков: Выстрелы у Боровицких ворот. Одчитано 20.01.2019.

Тоты даны суть часточно або цалком основаны на перекладї статї Attempted assassination of Leonid Brezhnev на анґліцькій Вікіпедії.