Полонина — буйны лучины, котры покрывають плоскы горскы хребты понад границьов лѣса. Полонины бывають обычайно сполоченскым маетком, на них ся выпасають через лѣто стада, выгнаны горѣ на пашу з околичных сел.[1]
Флора полонины представлена переважно субалпсков ростинностьов: пестротов трав ай заростами яфин и яловця.[2] Рясность лучных трав на ланкастых берегах робить полонину файным пашковом.
Слово е славянского походжѣня. Праславянске *pol-nъ, звязане з pol-je — ровна земля, необроблена, безлѣса, повна дикоростучых, планых ростлин (аж оброблене поле е нива).[3]
Лексема *polnina означать у восточных и западных славян отвореное, незароснутое лѣсом, ровное мѣсто, обычайно лука або паствиско. А понеже слово *polnina росширене у восточных и западных славян переважно в горскых регионах, та оно означать горску луку, паствиско. В южнославянскых литературных языках розвив ся новый вызнам, и *polnina зачала означати просто горы. Але во вельох южнославянскых диалектах заховав ся старый вызнам.[4]