ᱞᱟᱨᱚᱥ ᱳᱞᱥᱮᱱ ᱥᱠᱨᱮᱯᱥᱨᱩᱰ

ᱞᱟᱨᱚᱥ ᱳᱞᱥᱮᱱ ᱥᱠᱨᱮᱯᱥᱨᱩᱰ
Lars Olsen Skrefsrud
ᱞᱟᱨᱚᱥ ᱳᱞᱥᱮᱱ ᱥᱠᱨᱮᱯᱥᱨᱩᱰ ᱟᱜ ᱪᱤᱛᱟᱹᱨ
ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ  ᱟᱨ  ᱡᱟᱱᱟᱢ ᱴᱷᱟᱶᱯᱷᱮᱵᱽᱨᱩᱣᱟᱨᱤ ᱔, ᱑᱘᱔᱐(1840-02-04)
ᱯᱷᱟᱵᱮᱨᱜᱽ, ᱳᱯᱞᱮᱱᱰ, ᱱᱚᱨᱣᱮ
ᱜᱩᱨ᱑᱑ ᱰᱤᱥᱮᱢᱵᱚᱨ ᱑᱙᱑᱐ (᱗᱐ ᱵᱚᱭᱚᱥ)
ᱵᱮᱱᱟᱜᱟᱲᱤᱭᱟᱹ, ᱡᱷᱟᱨᱠᱷᱚᱸᱰ, ᱥᱤᱧᱚᱛ
ᱫᱤᱥᱚᱢᱤᱭᱟᱹᱱᱚᱨᱣᱮᱡᱤᱭᱟᱱ
ᱠᱟᱹᱢᱤᱢᱤᱥᱚᱱᱟᱨᱤ ᱟᱨ ᱯᱟᱹᱨᱥᱤ ᱜᱟᱹᱠᱷᱩᱲᱤᱭᱟᱹ
ᱧᱩᱢᱱᱟᱢᱵᱮᱱᱟᱜᱟᱲᱤᱭᱟᱹ ᱢᱤᱥᱚᱱ ᱨᱮᱱ ᱛᱷᱟᱯᱚᱱᱤᱭᱟᱹ
ᱧᱩᱢᱦᱟᱞᱟᱝ ᱠᱟᱹᱢᱤ
  • ᱦᱚᱲ ᱠᱚᱨᱮᱱ ᱢᱟᱨᱮ ᱦᱟᱯᱲᱟᱢ ᱠᱚ ᱨᱮᱭᱟᱜ ᱠᱟᱛᱷᱟ
  • ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱭᱟᱜ ᱢᱤᱫ ᱨᱚᱱᱚᱲ

ᱞᱟᱨᱚᱥ ᱳᱞᱥᱮᱱ ᱥᱠᱨᱮᱯᱥᱨᱩᱰ (᱔ ᱯᱷᱮᱵᱽᱨᱩᱣᱟᱨᱤ ᱑᱘᱔᱐ - ᱑᱑ ᱰᱤᱥᱮᱢᱵᱚᱨ ᱑᱙᱑᱐) , ᱮᱞ. ᱳ. ᱥᱠᱨᱮᱯᱥᱨᱩᱰ ᱧᱩᱛᱩᱢ ᱛᱮᱦᱚᱸᱭ ᱵᱟᱲᱟᱭᱚᱜᱼᱟ, ᱫᱚ ᱥᱤᱧᱚᱛ ᱫᱤᱥᱚᱢ ᱨᱮ ᱢᱤᱫ ᱱᱚᱨᱣᱮᱡᱤᱭᱟᱱ ᱞᱩᱛᱷᱟᱨᱱ ᱢᱤᱥᱚᱱᱟᱨᱤ ᱟᱨ ᱯᱟᱹᱨᱥᱤ ᱜᱟᱹᱠᱷᱩᱲᱤᱭᱟᱹᱭ ᱛᱟᱦᱮ ᱠᱟᱱᱟ᱾[᱑]

ᱡᱤᱭᱚᱱ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱠᱨᱮᱯᱥᱨᱩᱰ ᱫᱚ ᱔ ᱯᱷᱮᱵᱽᱨᱩᱣᱟᱨᱤ ᱑᱘᱔᱐ ᱥᱮᱨᱢᱟ ᱨᱮ ᱱᱚᱨᱣᱮ ᱫᱤᱥᱚᱢ ᱨᱮᱭᱟᱜ ᱳᱯᱞᱮᱱᱰ ᱨᱮ ᱢᱮᱱᱟᱜ ᱯᱷᱟᱵᱮᱨᱜᱽ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱱᱩᱭᱟᱜ ᱡᱤᱭᱚᱱ ᱨᱮᱫᱚ ᱟᱹᱰᱤ ᱞᱮᱠᱟᱱ ᱟᱬᱜᱚ ᱨᱟᱠᱟᱵ ᱦᱩᱭ ᱟᱠᱟᱱᱟ᱾ ᱵᱟᱲᱟᱭ ᱟᱠᱟᱱᱟ ᱢᱤᱫ ᱵᱮᱼᱵᱟᱹᱲᱤᱡ ᱠᱟᱹᱢᱤ ᱠᱷᱟᱹᱛᱤᱨ ᱯᱮ ᱥᱮᱨᱢᱟ ᱞᱟᱹᱜᱤᱫ ᱡᱤᱦᱚᱞ ᱛᱮ ᱪᱟᱞᱟᱜ ᱦᱩᱭ ᱞᱮᱱ ᱛᱟᱭᱟ᱾ ᱡᱤᱦᱚᱞ ᱨᱮ ᱛᱟᱦᱮᱱ ᱡᱚᱠᱷᱮᱡ ᱜᱮ ᱩᱱᱤ ᱫᱚ ᱵᱟᱭᱵᱮᱞ ᱯᱟᱲᱦᱟᱣ ᱟᱨ ᱯᱟᱹᱨᱥᱤ ᱪᱟᱨᱪᱟ ᱮ ᱮᱦᱚᱵ ᱞᱮᱫᱟ᱾ ᱡᱤᱦᱚᱞ ᱠᱷᱚᱱ ᱚᱰᱚᱜ ᱠᱟᱛᱮ, ᱩᱱᱤ ᱫᱚ ᱡᱟᱨᱢᱟᱱᱤ ᱨᱮᱭᱟᱜ ᱨᱟᱡᱽᱜᱟᱲ ᱵᱟᱨᱞᱤᱱ ᱨᱮ ᱢᱮᱱᱟᱜ ᱢᱤᱫ ᱢᱤᱥᱚᱱᱟᱨᱤ ᱥᱠᱩᱞ ᱨᱮ ᱯᱟᱲᱦᱟᱜ ᱞᱟᱹᱜᱤᱫ ᱮ ᱪᱟᱞᱟᱣ ᱞᱮᱱᱟ᱾ ᱯᱟᱲᱦᱟᱣ ᱥᱟᱹᱛ ᱠᱟᱛᱮ ᱚᱸᱰᱮ ᱠᱷᱚᱱ ᱜᱮ ᱩᱱᱤ ᱫᱚ ᱥᱤᱧᱚᱛ ᱛᱮᱭ ᱦᱮᱡ ᱞᱮᱱᱟ᱾[᱒]

ᱩᱱᱚᱠᱛᱚ ᱵᱤᱦᱟᱨ ᱯᱚᱱᱚᱛ ᱨᱮᱭᱟᱜ ᱥᱟᱱᱛᱟᱞ ᱯᱟᱨᱜᱟᱱᱟ ᱡᱤᱞᱞᱟᱹ ᱨᱮᱭᱟᱜ ᱵᱮᱱᱟᱜᱟᱲᱤᱭᱟᱹ ᱨᱮ ᱑᱘᱖᱗ ᱥᱮᱨᱢᱟ ᱨᱮᱭᱟᱜ ᱒᱖ ᱥᱮᱯᱴᱮᱢᱵᱚᱨ ᱨᱮ "ᱵᱮᱱᱟᱜᱟᱲᱤᱭᱟᱹ ᱢᱤᱥᱚᱱ" ᱮ ᱛᱷᱟᱯᱚᱱ ᱞᱮᱫᱟ᱾ ᱱᱚᱣᱟ ᱢᱤᱥᱚᱱ ᱨᱮᱭᱟᱜ ᱛᱷᱟᱯᱚᱱ ᱥᱟᱶᱛᱮ ᱟᱨᱦᱚᱸ ᱵᱟᱨ ᱦᱚᱲ ᱡᱚᱯᱲᱟᱣ ᱠᱤᱱ ᱛᱟᱦᱮ ᱠᱟᱱᱟ, ᱩᱱᱠᱤᱱ ᱫᱚ ᱡᱚᱱᱥᱚᱱ ᱥᱟᱦᱮᱵᱽ ᱟᱨ ᱦᱟᱱᱥ ᱯᱤᱴᱟᱨ ᱵᱚᱨᱮᱥᱚᱱ (ᱯᱟᱯᱟ ᱥᱟᱦᱮᱵᱽ)᱾ ᱥᱠᱨᱮᱯᱥᱨᱩᱰ ᱦᱤᱱᱫᱤ, ᱵᱟᱝᱞᱟ, ᱥᱚᱸᱥᱠᱨᱤᱛ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ ᱮ ᱥᱮᱬᱟ ᱞᱮᱫᱟ᱾ ᱩᱱᱤ ᱨᱮᱱ ᱥᱟᱱᱛᱟᱲᱤ ᱢᱟᱪᱮᱫ ᱫᱚ ᱠᱷᱩᱫᱩ ᱧᱩᱛᱩᱢᱟᱱ ᱢᱤᱫ ᱥᱟᱱᱛᱟᱲ ᱦᱚᱲ ᱮ ᱛᱟᱦᱮ ᱠᱟᱱᱟ᱾ ᱠᱷᱩᱫᱩ ᱵᱚᱸᱜᱟ ᱛᱟᱞᱟ ᱛᱟᱭᱚᱢ ᱵᱤᱨᱟᱹᱢ ᱦᱟᱸᱥᱫᱟᱜ ᱱᱩᱭᱤᱡ ᱢᱟᱪᱮᱫ ᱞᱮᱠᱟᱛᱮᱭ ᱛᱟᱦᱮᱸ ᱠᱟᱱᱟ᱾ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱮᱬᱟ ᱛᱟᱭᱚᱢ ᱟᱠᱚᱨᱮᱱ ᱦᱚᱲ ᱠᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱮᱪᱮᱫ ᱞᱟᱹᱜᱤᱫ ᱮ ᱠᱩᱨᱩᱢᱩᱴᱩ ᱠᱮᱫᱟ᱾ ᱚᱱᱠᱟᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱟᱭᱢᱟ ᱥᱮᱪᱮᱫᱚᱜ ᱯᱚᱛᱚᱵ ᱮ ᱵᱮᱱᱟᱣ ᱠᱮᱫᱟ᱾[᱓]

ᱥᱠᱨᱮᱯᱥᱨᱩᱰ ᱫᱚ ᱯᱟᱹᱨᱥᱤ ᱜᱟᱹᱠᱷᱩᱲᱤᱭᱟᱹ ᱛᱟᱦᱮᱸ ᱠᱟᱱᱟᱭ᱾ ᱚᱱᱟᱛᱮ ᱥᱟᱱᱛᱟᱲᱤ ᱪᱮᱫᱚᱜ ᱞᱟᱹᱜᱤᱫ ᱑᱘᱗᱓ ᱥᱮᱨᱢᱟ ᱨᱮ ᱵᱟᱨᱟᱱᱚᱥᱤ ᱠᱷᱚᱱ ᱨᱳᱢᱟᱱ ᱪᱤᱠᱤ ᱛᱮ "A Grammar of the Santali Language" (ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱭᱟᱜ ᱢᱤᱫ ᱨᱚᱱᱚᱲ) ᱧᱩᱛᱩᱢ ᱢᱤᱫ ᱨᱚᱱᱚᱲ ᱯᱚᱛᱚᱵ ᱮ ᱚᱞ ᱠᱮᱫᱟ᱾[᱔]

ᱥᱟᱱᱛᱟᱲ ᱠᱚᱣᱟᱜ ᱡᱟᱱᱟᱢ, ᱜᱚᱡ, ᱟᱨ ᱵᱟᱯᱞᱟ ᱥᱟᱶ ᱟᱭᱢᱟ ᱟᱹᱨᱤᱼᱪᱟᱹᱞᱤ, ᱥᱤᱨᱡᱚᱱ ᱥᱟᱶ ᱡᱚᱯᱲᱟᱣ ᱠᱟᱹᱦᱱᱤ, ᱥᱟᱶᱛᱮ ᱞᱟᱠᱪᱟᱨ ᱠᱚ ᱡᱚᱜᱟᱲ ᱠᱟᱛᱮ ᱑᱘᱘᱗ ᱥᱮᱨᱢᱟ ᱨᱮ "ᱦᱚᱲ ᱠᱚᱨᱮᱱ ᱢᱟᱨᱮ ᱦᱟᱯᱲᱟᱢ ᱠᱚ ᱨᱮᱭᱟᱜ ᱠᱟᱛᱷᱟ" ᱧᱩᱛᱩᱢ ᱯᱚᱛᱚᱵ ᱮ ᱪᱷᱟᱯᱟ ᱞᱮᱫᱟ᱾ ᱱᱚᱣᱟ ᱯᱩᱛᱷᱤ ᱫᱚ ᱵᱮᱱᱟᱜᱟᱲᱤᱭᱟᱹ ᱢᱤᱥᱚᱱ ᱯᱨᱮᱥ ᱠᱷᱚᱱ ᱪᱷᱟᱯᱟ ᱞᱮᱱᱟ᱾ ᱵᱟᱰᱟᱭᱚᱜᱼᱟ, ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱟᱹᱨᱤᱼᱪᱟᱹᱞᱤ ᱞᱟᱠᱪᱟᱨ ᱥᱟᱛᱟᱢ ᱨᱮᱱ ᱯᱚᱸᱰᱮᱛ ᱠᱚᱞᱮᱭᱟᱱ ᱦᱟᱲᱟᱢ ᱴᱷᱮᱱ ᱠᱷᱚᱱ ᱱᱚᱣᱟ ᱠᱚ ᱛᱩᱢᱟᱹᱞ ᱡᱟᱣᱨᱟ ᱠᱟᱛᱮ ᱨᱳᱢᱟᱱ ᱪᱤᱠᱤ ᱛᱮ ᱱᱚᱣᱟ ᱯᱩᱛᱷᱤ ᱨᱮᱭ ᱚᱞ ᱫᱚᱦᱚ ᱟᱠᱟᱫᱟ᱾[᱕] ᱟᱨᱦᱚᱸ ᱠᱚ ᱞᱟᱹᱭᱟ ᱥᱠᱨᱮᱯᱥᱨᱩᱰ ᱫᱚ ᱟᱨᱢᱤᱫ ᱯᱚᱸᱰᱮᱛ ᱡᱩᱜᱤᱭᱟᱱ ᱦᱟᱲᱟᱢ ᱴᱷᱮᱱ ᱠᱷᱚᱱ ᱦᱚᱸᱭ ᱛᱩᱢᱟᱹᱞ ᱟᱠᱟᱫᱟ᱾ ᱱᱩᱭ ᱫᱚ ᱵᱟᱭᱵᱮᱞ ᱦᱚᱸ ᱥᱟᱱᱛᱟᱲᱤ ᱛᱮᱭ ᱛᱚᱨᱡᱚᱢᱟ ᱟᱠᱟᱫᱟ᱾[᱖]

ᱯᱚᱛᱚᱵ ᱠᱚ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
  1. ᱥᱟᱱᱛᱟᱞᱤ ᱯᱟᱹᱦᱤᱞ ᱯᱩᱛᱷᱤ
  2. ᱥᱟᱱᱛᱟᱞᱤ ᱫᱚᱥᱟᱨ ᱯᱩᱛᱷᱤ
  3. ᱵᱩᱡᱽ ᱨᱟᱠᱟᱵ ᱯᱩᱛᱷᱤ
  4. ᱥᱮᱨᱮᱧ ᱯᱩᱛᱷᱤ
  5. ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱭᱟᱜ ᱢᱤᱫ ᱨᱚᱱᱚᱲ (᱑᱘᱗᱓)
  6. ᱦᱚᱲ ᱠᱚᱨᱮᱱ ᱢᱟᱨᱮ ᱦᱟᱯᱲᱟᱢ ᱠᱚ ᱨᱮᱭᱟᱜ ᱠᱟᱛᱷᱟ (᱑᱘᱘᱗)
  7. ᱵᱟᱭᱵᱮᱞ ᱱᱟᱣᱟ ᱱᱤᱭᱚᱢ
  8. ᱵᱟᱭᱵᱮᱞ ᱨᱮᱭᱟᱜ ᱤᱛᱤᱦᱟᱥ (ᱱᱟᱜᱟᱢ)

ᱵᱚᱸᱜᱟ ᱛᱟᱞᱟ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱙᱑᱐ ᱥᱮᱨᱢᱟ ᱨᱮᱭᱟᱜ ᱑᱑ ᱰᱤᱥᱮᱢᱵᱚᱨ ᱦᱤᱞᱳᱜ ᱞᱟᱨᱚᱥ ᱳᱞᱥᱮᱱ ᱥᱠᱨᱮᱯᱥᱨᱩᱰ ᱫᱚ ᱱᱤᱛᱚᱜᱟᱜ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱵᱮᱱᱟᱜᱟᱲᱤᱭᱟᱹ ᱟᱹᱛᱩ ᱨᱮ ᱵᱚᱸᱜᱟ ᱛᱟᱞᱟ ᱞᱮᱱᱟᱭ᱾

ᱵᱟᱨᱦᱮ ᱡᱚᱱᱚᱲ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱹᱠᱷᱹᱭᱟᱹᱛ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
  1. ↑ Dan Graves. "Lars Skrefsrud, Norway's Famous Missionary". Christianity.com. Retrieved February 1, 2018.
  2. ↑ "Lars Olsen Skrefsrud". Store norske leksikon. Retrieved February 1, 2018.
  3. ↑ ᱯᱚᱨᱤᱢᱚᱞ ᱦᱮᱢᱵᱽᱨᱚᱢ. সাঁওতালি সাহিত্যের ইতিহাস.
  4. ↑ ᱞᱚᱠᱷᱚᱱ ᱪᱚᱸᱫᱽᱨᱚ ᱢᱩᱨᱢᱩ. ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱭᱟᱜ ᱱᱟᱜᱟᱢ. Pashchima Publication. p. 95. ISBN 978-81-89098-73-5. {{cite book}}: |access-date= requires |url= (help)
  5. ↑ ᱞᱚᱠᱷᱚᱱ ᱪᱚᱸᱫᱽᱨᱚ ᱢᱩᱨᱢᱩ. ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱭᱟᱜ ᱱᱟᱜᱟᱢ. Pashchima Publication. p. 95. ISBN 978-81-89098-73-5. {{cite book}}: |access-date= requires |url= (help)
  6. ↑ ᱯᱚᱨᱤᱢᱚᱞ ᱦᱮᱢᱵᱽᱨᱚᱢ. সাঁওতালি সাহিত্যের ইতিহাস.