ᱠᱤᱥᱣᱚᱨ ᱱᱟᱦᱤᱫᱽ

ᱠᱤᱥᱣᱚᱨ ᱱᱟᱦᱤᱫᱽ (ᱩᱨᱫᱩ: کشور ناہید) (ᱡᱟᱱᱟᱢ: ᱑᱘ ᱡᱩᱱ ᱑᱙᱔᱐) ᱫᱚ ᱯᱟᱠᱤᱥᱛᱟᱱ ᱨᱤᱱᱤᱡ ᱢᱤᱫ ᱱᱟᱨᱤᱵᱟᱫᱤ ᱩᱨᱫᱩ ᱚᱱᱚᱬᱦᱮᱸ ᱚᱞᱤᱡ ᱟᱨ ᱚᱱᱚᱞᱤᱭᱟᱹ ᱠᱟᱱᱟᱭ᱾ ᱩᱱᱤ ᱫᱚ ᱟᱹᱰᱤᱜᱟᱱ ᱚᱱᱚᱬᱦᱮᱸ ᱯᱚᱛᱚᱵ ᱮ ᱚᱞ ᱟᱠᱟᱫᱟ᱾ ᱩᱱᱤ ᱫᱚ ᱩᱨᱫᱩ ᱥᱟᱶᱦᱮᱫ ᱨᱮ ᱟᱡᱟᱜ ᱮᱱᱮᱢ ᱞᱟᱹᱜᱤᱫ ᱥᱤᱛᱟᱨᱟ-ᱮ-ᱤᱢᱛᱤᱭᱟᱡᱽ ᱥᱟᱶᱛᱮ ᱟᱭᱢᱟ ᱥᱤᱨᱯᱷᱟᱹ ᱦᱚᱸᱭ ᱧᱟᱢ ᱟᱠᱟᱫᱟ᱾^[᱑]

ᱮᱛᱚᱦᱚᱵ ᱡᱤᱭᱚᱱ

ᱠᱤᱥᱣᱚᱨ ᱱᱟᱦᱤᱫᱽ ᱫᱚ ᱑᱙᱔᱐ ᱥᱟᱞᱮᱨᱮ ᱵᱩᱞᱚᱱᱫᱽᱥᱚᱦᱚᱨ, ᱵᱨᱤᱴᱤᱥ ᱤᱱᱰᱤᱭᱟ ᱨᱮ ᱢᱤᱫ ᱥᱟᱭᱮᱫ ᱜᱷᱟᱨᱚᱸᱡᱽ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱫᱤᱥᱚᱢ ᱦᱟᱹᱴᱤᱧ ᱛᱟᱭᱚᱢ ᱑᱙᱔᱙ ᱥᱟᱞᱮᱨᱮ ᱩᱱᱤ ᱫᱚ ᱟᱡᱟᱜ ᱜᱷᱟᱨᱚᱸᱡᱽ ᱥᱟᱶ ᱞᱟᱦᱚᱨ, ᱯᱟᱠᱤᱥᱛᱟᱱ ᱮ ᱪᱟᱞᱟᱣ ᱞᱮᱱᱟ᱾ ᱠᱤᱥᱣᱚᱨ ᱫᱚ ᱥᱤᱧᱚᱛ ᱦᱟᱹᱴᱤᱧ ᱚᱠᱛᱚ ᱨᱮ ᱦᱩᱭ ᱞᱮᱱ ᱦᱟᱛᱟᱭᱟ ᱠᱚ (ᱛᱤᱨᱞᱟᱹ ᱠᱚᱣᱟᱜ ᱨᱮᱯ ᱟᱨ ᱟᱹᱜᱤᱫᱽ ᱥᱟᱶᱛᱮ) ᱨᱮᱱᱟᱜ ᱥᱟᱹᱠᱷᱤ ᱮ ᱛᱟᱦᱮᱸ ᱠᱟᱱᱟ᱾ ᱩᱱ ᱚᱠᱛᱚ ᱨᱮᱱᱟᱜ ᱞᱚᱦᱩᱛᱟᱛᱮ ᱩᱱᱤᱭᱟᱜ ᱠᱚᱢ ᱩᱢᱮᱨ ᱨᱮ ᱜᱟᱹᱦᱤᱨ ᱪᱷᱟᱯᱟ ᱫᱚᱦᱚ ᱠᱮᱫᱟ᱾ ᱠᱤᱥᱣᱚᱨ ᱫᱚ ᱠᱟᱹᱴᱤᱡ ᱠᱩᱲᱤ ᱜᱤᱫᱽᱨᱟᱹ ᱞᱮᱠᱟᱛᱮ ᱩᱱ ᱚᱠᱛᱚ ᱨᱮ ᱟᱞᱤᱜᱚᱲ ᱢᱩᱥᱞᱤᱢ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱮᱛᱚᱦᱚᱵ ᱟᱠᱟᱫ ᱠᱩᱲᱤ ᱠᱚᱣᱟᱜ ᱠᱟᱹᱢᱤ ᱠᱷᱚᱱ ᱮ ᱩᱫᱜᱟᱹᱣ ᱞᱮᱱᱟ᱾ ᱩᱱᱠᱩ ᱫᱚ ᱡᱟᱦᱟᱸ ᱯᱩᱸᱰ ᱠᱩᱨᱛᱟ ᱟᱨ ᱯᱩᱸᱰ ᱜᱷᱚᱨᱟᱨᱟ ᱠᱚ ᱦᱚᱨᱚᱜ ᱠᱟᱱ ᱛᱟᱦᱮᱸ ᱠᱟᱱᱟ, ᱚᱱᱟ ᱫᱚ ᱩᱱᱤ ᱴᱷᱮᱱ ᱟᱹᱰᱤ ᱱᱟᱯᱟᱭ ᱧᱮᱞᱚᱜ ᱠᱟᱱ ᱛᱟᱦᱮᱸᱱ, ᱟᱨ ᱩᱱᱤ ᱫᱚ ᱠᱚᱞᱮᱡᱽ ᱪᱟᱞᱟᱣ ᱥᱟᱱᱟ ᱮᱫ ᱛᱟᱦᱮᱸᱱᱟ, ᱟᱡ ᱛᱮ ᱥᱮᱪᱮᱫᱚᱜ ᱞᱟᱹᱜᱤᱫ᱾^[᱒]

ᱩᱱᱤ ᱫᱚ ᱩᱨᱫᱩ ᱛᱮ ᱟᱫᱤᱵᱽ ᱯᱷᱟᱡᱤᱞ ᱰᱤᱜᱽᱨᱤ ᱮ ᱯᱩᱨᱟᱹᱣ ᱠᱮᱫᱟ ᱟᱨ ᱯᱟᱨᱥᱤᱭᱟᱱ ᱯᱟᱹᱨᱥᱤ ᱦᱚᱸᱭ ᱪᱮᱫ ᱠᱮᱫᱟ᱾ ᱩᱱᱤ ᱫᱚ ᱟᱡᱟᱜ ᱪᱟᱹᱨᱜᱟᱹ ᱩᱢᱮᱨ ᱨᱮ ᱜᱮ ᱟᱹᱰᱤ ᱠᱩᱥᱤ ᱥᱟᱶ ᱮ ᱯᱟᱲᱦᱟᱣᱜ ᱠᱟᱱ ᱛᱟᱦᱮᱸᱱᱟ ᱟᱨ ᱡᱟᱦᱟᱸ ᱜᱮ ᱧᱟᱢ ᱮᱫ ᱛᱟᱦᱮᱸᱱᱟᱭ ᱚᱱᱟ ᱜᱮ ᱯᱟᱲᱦᱟᱣ ᱮᱫ ᱛᱟᱦᱮᱸᱱᱟ - ᱰᱳᱥᱴᱚᱭᱵᱷᱥᱠᱤ ᱟᱜ ᱠᱟᱹᱢᱤ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱱᱮᱵᱟᱞ ᱠᱤᱥᱚᱨ ᱯᱨᱮᱥ ᱦᱚᱛᱮᱛᱮ ᱩᱪᱷᱟᱹᱱ ᱟᱠᱟᱱ ᱤᱝᱞᱤᱥ ᱰᱤᱠᱥᱮᱱᱟᱨᱤ ᱦᱟᱹᱵᱤᱡ᱾

ᱩᱱᱤ ᱫᱚ ᱥᱮᱪᱮᱫ ᱮ ᱧᱟᱢ ᱞᱟᱹᱜᱤᱫ ᱮ ᱞᱟᱹᱲᱦᱟᱹᱭ ᱠᱮᱫᱟ ᱟᱨ ᱮ ᱠᱩᱨᱩᱢᱩᱴᱩ ᱠᱮᱫᱟ, ᱡᱚᱠᱷᱚᱱ ᱛᱤᱨᱞᱟᱹ ᱠᱚᱫᱚ ᱟᱥᱲᱟ ᱪᱟᱞᱟᱣ ᱨᱮᱱᱟᱜ ᱫᱟᱣ ᱵᱟᱝ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱫᱚ ᱚᱲᱟᱜ ᱨᱮᱜᱮᱭ ᱯᱟᱲᱦᱟᱣ ᱮᱱᱟ ᱟᱨ ᱠᱚᱨᱮᱥᱯᱚᱱᱰᱮᱱᱥ ᱠᱳᱨᱥ ᱦᱚᱛᱮᱛᱮ ᱦᱟᱭ ᱥᱠᱩᱞ ᱰᱤᱯᱞᱳᱢᱟ ᱮ ᱧᱟᱢ ᱠᱮᱫᱟ᱾ ᱢᱮᱴᱨᱤᱠ ᱛᱟᱭᱚᱢ ᱠᱚᱞᱮᱡᱽ ᱨᱮ ᱵᱷᱩᱨᱛᱤ ᱦᱟᱛᱟᱣ ᱨᱮ ᱜᱷᱟᱨᱚᱸᱡᱽ ᱯᱟᱦᱴᱟ ᱠᱷᱚᱱ ᱟᱹᱰᱤ ᱵᱟᱹᱲᱛᱤ ᱵᱤᱨᱳᱫᱽ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱩᱱᱤ ᱨᱤᱱ ᱵᱚᱭᱦᱟ ᱥᱟᱭᱮᱫ ᱤᱯᱷᱛᱤᱠᱷᱟᱨ ᱡᱟᱭᱮᱫᱤ ᱩᱱᱤᱭᱟᱜ ᱴᱤᱭᱩᱥᱚᱱ ᱮ ᱮᱢ ᱠᱮᱫᱟ ᱟᱨ ᱩᱱᱤ ᱫᱚ ᱟᱡᱟᱜ ᱯᱷᱚᱨᱢᱟᱞ ᱥᱮᱪᱮᱫ ᱮ ᱪᱟᱞᱟᱣ ᱫᱚᱦᱚ ᱨᱮ ᱜᱚᱲᱚ ᱮᱢᱟᱫᱮᱭᱟ᱾ ᱯᱟᱠᱤᱥᱛᱟᱱ ᱨᱮ ᱩᱱᱤ ᱫᱚ ᱑᱙᱕᱘ ᱥᱟᱞᱮᱨᱮ ᱟᱨᱴᱥ ᱨᱮ ᱵᱮᱪᱮᱞᱚᱨ ᱟᱨ ᱑᱙᱖᱐ ᱥᱟᱞᱮᱨᱮ ᱯᱟᱧᱡᱟᱵᱽ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱞᱟᱦᱚᱨ ᱠᱷᱚᱱ ᱠᱟᱹᱣᱰᱤ ᱟᱹᱨᱤ ᱨᱮ ᱢᱟᱥᱴᱚᱨ ᱮ ᱥᱟᱹᱛ ᱠᱮᱫᱟ᱾ ᱑᱙᱖᱐ ᱥᱟᱞᱮᱨᱮ ᱠᱤᱥᱣᱚᱨ ᱫᱚ ᱟᱡᱤᱡ ᱜᱟᱛᱮ ᱟᱨ ᱚᱱᱚᱬᱦᱮᱸ ᱚᱞᱤᱡ ᱭᱩᱥᱩᱯᱷ ᱠᱟᱢᱨᱟᱱ ᱥᱟᱶ ᱮ ᱵᱟᱯᱞᱟ ᱮᱱᱟ ᱟᱨ ᱱᱩᱠᱤᱱ ᱠᱤᱱ ᱨᱤᱱ ᱵᱟᱨᱭᱟ ᱠᱚᱲᱟ ᱜᱤᱫᱽᱨᱟᱹ ᱢᱮᱱᱟᱜ ᱠᱤᱱᱟ᱾ ᱑᱙᱘᱔ ᱥᱟᱞᱮᱨᱮ ᱟᱡᱤᱡ ᱡᱟᱶᱟᱭ ᱜᱩᱨ ᱛᱟᱭᱚᱢ ᱩᱱᱤ ᱫᱚ ᱟᱡᱤᱡ ᱜᱤᱫᱽᱨᱟᱹ ᱠᱚ ᱦᱟᱨᱟ ᱵᱩᱨᱩ ᱠᱚ ᱞᱟᱹᱜᱤᱫ ᱟᱨ ᱜᱷᱟᱨᱚᱸᱡᱽ ᱜᱚᱲᱚ ᱞᱟᱹᱜᱤᱫ ᱮ ᱠᱟᱹᱢᱤ ᱠᱮᱫᱟ᱾

ᱠᱟᱹᱢᱤ ᱡᱤᱭᱚᱱ

ᱠᱤᱥᱣᱚᱨ ᱱᱟᱦᱤᱫᱽ ᱟᱜ ᱚᱱᱚᱬᱦᱮᱸ ᱨᱮᱱᱟᱜ ᱑᱒ ᱜᱚᱴᱟᱝ ᱵᱷᱚᱞᱭᱩᱢ ᱫᱚ ᱯᱟᱠᱤᱥᱛᱟᱱ ᱟᱨ ᱥᱤᱧᱚᱛ ᱵᱟᱱᱟᱨ ᱨᱮᱜᱮ ᱩᱪᱷᱟᱹᱱ ᱟᱠᱟᱱᱟ᱾ ᱩᱱᱤᱭᱟᱜ ᱩᱨᱫᱩ ᱚᱱᱚᱬᱦᱮᱸ ᱫᱚ ᱡᱮᱜᱮᱛ ᱡᱟᱠᱟᱛ ᱨᱮ ᱵᱟᱦᱨᱮ ᱯᱟᱹᱨᱥᱤ ᱛᱮ ᱦᱚᱸ ᱩᱪᱷᱟᱹᱱ ᱟᱠᱟᱱᱟ᱾ ᱩᱱᱤᱭᱟᱜ ᱧᱩᱛᱩᱢᱟᱱ ᱚᱱᱚᱬᱦᱮᱸ 'ᱟᱞᱮ ᱫᱳᱥᱤ ᱛᱤᱨᱞᱟᱹ ᱠᱚ' (ᱩᱨᱫᱩ: ہم گنہگار عورتیں), ᱡᱟᱦᱟᱸ ᱫᱚ ᱯᱟᱠᱤᱥᱛᱟᱱᱤ ᱱᱟᱨᱤᱵᱟᱫᱤ ᱠᱚ ᱛᱟᱞᱟ ᱨᱮ ᱢᱤᱫ ᱛᱤᱨᱞᱟᱹ ᱥᱮᱨᱮᱧ ᱞᱮᱠᱟᱛᱮ ᱠᱩᱥᱤ ᱥᱟᱞᱟᱜ ᱠᱚ ᱢᱮᱛᱟᱜᱼᱟ, ᱩᱱᱤ ᱫᱚ ᱟᱨ ᱨᱩᱠᱷᱥᱟᱱᱟ ᱟᱦᱢᱚᱫᱽ ᱦᱚᱛᱮᱛᱮ ᱛᱚᱨᱡᱚᱢᱟ ᱟᱨ ᱥᱟᱯᱲᱟᱣ ᱟᱠᱟᱱ ᱟᱨ ᱑᱙᱙᱑ ᱥᱟᱞᱮᱨᱮ ᱫᱟ ᱣᱩᱢᱮᱱᱥ ᱯᱨᱮᱥ ᱦᱚᱛᱮᱛᱮ ᱞᱚᱱᱰᱚᱱ ᱨᱮ ᱩᱪᱷᱟᱹᱱ ᱟᱠᱟᱱ ᱱᱮᱛᱟᱨᱟᱜ ᱩᱨᱫᱩ ᱱᱟᱨᱤᱵᱟᱫᱤ ᱚᱱᱚᱬᱦᱮᱸ ᱨᱮᱱᱟᱜ ᱢᱤᱫ ᱜᱨᱟᱣᱩᱱᱰᱵᱨᱮᱠᱤᱝ ᱮᱱᱛᱷᱳᱞᱳᱡᱤ ᱨᱮ ᱟᱡᱟᱜ ᱧᱩᱛᱩᱢ ᱮ ᱮᱢᱟᱫᱟ᱾

ᱠᱤᱥᱣᱚᱨ ᱱᱟᱦᱤᱫᱽ ᱫᱚ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱤᱨᱟᱹᱞ ᱜᱚᱴᱟᱝ ᱯᱚᱛᱚᱵ ᱮ ᱚᱞ ᱟᱠᱟᱫᱟ ᱟᱨ ᱜᱤᱫᱽᱨᱟᱹ ᱥᱟᱶᱦᱮᱫ ᱞᱟᱹᱜᱤᱫ ᱢᱟᱹᱱᱟᱱ ᱭᱩᱱᱮᱥᱠᱳ ᱥᱤᱨᱯᱷᱟᱹ ᱦᱚᱸᱭ ᱡᱤᱛᱠᱟᱹᱨ ᱟᱠᱟᱱᱟ᱾ ᱩᱱᱤᱭᱟᱜ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱫᱩᱞᱟᱹᱲ ᱫᱚ ᱛᱤᱨᱞᱟᱹ ᱠᱚ ᱞᱟᱹᱜᱤᱫ ᱩᱱᱟᱹᱜ ᱜᱮ ᱢᱮᱱᱟᱜᱼᱟ᱾ ᱩᱱᱤ ᱫᱚ ᱟᱡᱟᱜ ᱚᱱᱚᱬᱦᱮᱸ ᱟᱥᱤᱱ ᱵᱩᱨᱤᱭᱟᱱ ᱣᱤ ᱞᱳᱠᱳ ᱨᱮ ᱱᱚᱣᱟ ᱮ ᱩᱫᱩᱜ ᱥᱚᱫᱚᱨ ᱟᱠᱟᱫᱟ, ᱡᱟᱦᱟᱸ ᱫᱚ ᱱᱮᱛᱟᱨᱟᱜ ᱠᱚᱲᱟ ᱢᱟᱹᱱᱢᱤ ᱥᱟᱶᱛᱟ ᱨᱮ ᱛᱤᱨᱞᱟᱹ ᱠᱚᱣᱟᱜ ᱫᱩᱠᱷ ᱪᱮᱛᱟᱱ ᱨᱮ ᱢᱤᱫ ᱪᱷᱩᱭ ᱟᱠᱟᱱ ᱠᱟᱛᱷᱟ ᱠᱟᱱᱟ᱾ ᱱᱟᱦᱤᱫᱽ ᱫᱚ ᱟᱭᱢᱟ ᱡᱟᱹᱛᱤᱭᱟᱹᱨᱤ ᱤᱱᱥᱴᱤᱴᱤᱭᱩᱴ ᱨᱮ ᱢᱩᱬᱩᱛ ᱴᱷᱟᱶ ᱨᱮᱭ ᱠᱟᱹᱢᱤ ᱟᱠᱟᱫᱟ᱾ ᱩᱱᱤ ᱫᱚ ᱡᱤᱨᱟᱹᱣ ᱮᱱ ᱢᱟᱬᱟᱝ ᱯᱟᱠᱤᱥᱛᱟᱱ ᱡᱟᱹᱛᱤᱭᱟᱹᱨᱤ ᱠᱟᱣᱩᱱᱥᱤᱞ ᱚᱯᱷ ᱫᱟ ᱟᱨᱴᱥ ᱨᱤᱱᱤᱡ ᱰᱟᱭᱨᱮᱠᱴᱚᱨ ᱡᱮᱱᱮᱨᱟᱞ ᱮ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱫᱚ ᱢᱤᱫ ᱢᱟᱹᱱᱟᱱ ᱥᱟᱶᱦᱮᱫ ᱢᱮᱜᱟᱡᱤᱱ ᱢᱟᱦᱮ ᱱᱟᱣ ᱦᱚᱸᱭ ᱥᱟᱯᱲᱟᱣ ᱞᱮᱫᱟ ᱟᱨ ᱦᱟᱣᱣᱟ (ᱤᱵᱽ) ᱧᱩᱛᱩᱢ ᱛᱮ ᱢᱤᱫ ᱜᱟᱶᱛᱟ ᱮ ᱵᱮᱱᱟᱣ ᱞᱮᱫᱟ ᱡᱟᱦᱟᱸ ᱨᱮᱱᱟᱜ ᱡᱚᱥ ᱫᱚ ᱵᱮᱜᱚᱨ ᱯᱷᱩᱨᱜᱟᱹᱞ ᱤᱱᱠᱚᱢ ᱛᱮ ᱛᱤᱨᱞᱟᱹ ᱠᱚ ᱠᱩᱴᱤᱨ ᱤᱱᱰᱚᱥᱴᱨᱤ ᱟᱨ ᱦᱟᱛ ᱛᱮ ᱵᱮᱱᱟᱣ ᱡᱤᱱᱤᱥ ᱠᱚ ᱟᱹᱠᱷᱨᱤᱧ ᱠᱟᱛᱮ ᱠᱟᱹᱣᱰᱤ ᱞᱮᱠᱟᱛᱮ ᱯᱷᱩᱨᱜᱟᱹᱞ ᱵᱮᱱᱟᱣ ᱠᱟᱱᱟ᱾

ᱥᱟᱹᱠᱷᱭᱟᱹᱛ

1. "Profile of Kishwar Naheed". PoetryTranslation.Org website. Archived from the original on 27 July 2014. Retrieved 1 June 2019.
2. Khalique, Harris (2015-06-18). "An interview with feminist poet Kishwar Naheed". Herald Magazine (in ᱟᱝᱜᱽᱨᱮᱡᱤ). Retrieved 2 June 2019.

ᱵᱟᱦᱨᱮ ᱡᱚᱱᱚᱲ

• The South Asian Literary Recordings Project, Library of Congress