ᱢᱚᱱᱤᱡᱟ ᱟᱞᱵᱷᱤ FRSL (ᱡᱟᱱᱟᱢ ᱒ ᱯᱷᱮᱵᱽᱨᱩᱣᱟᱨᱤ ᱑᱙᱕᱔) ᱫᱚ ᱢᱤᱫ ᱵᱨᱤᱴᱤᱥ-ᱯᱟᱠᱤᱥᱛᱟᱱᱤ ᱚᱱᱚᱞᱤᱭᱟᱹ ᱟᱨ ᱚᱱᱚᱲᱦᱮᱸᱭᱟᱹ ᱠᱟᱱᱟᱭ ᱾ ᱩᱱᱤ ᱫᱚ ᱟᱡᱟᱜ ᱚᱱᱚᱲᱦᱮᱸ ᱞᱟᱹᱜᱤᱫ ᱟᱭᱢᱟ ᱧᱩᱛᱩᱢᱟᱱ ᱥᱤᱨᱯᱷᱟᱹ ᱠᱚᱭ ᱡᱤᱛᱠᱟᱹᱨ ᱟᱠᱟᱫᱟ ᱾ ᱩᱱᱤ ᱫᱚ ᱒᱐᱒᱓ ᱥᱟᱞᱮ ᱨᱮ ᱨᱚᱭᱟᱞ ᱥᱳᱥᱟᱭᱤᱴᱤ ᱚᱯᱷ ᱞᱤᱴᱟᱨᱮᱪᱟᱨ ᱨᱮᱱ ᱯᱷᱮᱞᱳ ᱞᱮᱠᱟᱛᱮ ᱵᱟᱪᱷᱚᱱ ᱦᱩᱭ ᱞᱮᱱᱟ ᱾
ᱢᱚᱱᱤᱡᱟ ᱟᱞᱵᱷᱤ ᱫᱚ ᱞᱟᱦᱳᱨ, ᱯᱟᱠᱤᱥᱛᱟᱱ ᱨᱮ ᱢᱤᱫ ᱯᱟᱠᱤᱥᱛᱟᱱᱤ ᱟᱯᱟᱛ ᱟᱨ ᱵᱨᱤᱴᱤᱥ ᱮᱸᱜᱟᱛ ᱴᱷᱮᱱ ᱮ ᱡᱟᱱᱟᱢ ᱞᱮᱱᱟ ᱾ ᱟᱞᱵᱷᱤ ᱫᱚ ᱠᱤᱪᱷᱩ ᱪᱟᱸᱫᱚ ᱩᱢᱮᱨ ᱨᱮ ᱟᱡ ᱨᱮᱱ ᱟᱯᱟᱛ ᱫᱚ ᱤᱝᱞᱮᱱᱰ ᱨᱮᱱᱟᱜ ᱦᱟᱴᱯᱷᱤᱞᱰ, ᱦᱟᱨᱴᱯᱷᱳᱨᱰᱥᱟᱭᱟᱨ ᱛᱮᱭ ᱩᱪᱟᱹᱲ ᱞᱮᱱᱟ ᱾ ᱟᱡᱟᱜ ᱯᱩᱭᱞᱩ ᱯᱩᱛᱷᱤ ᱠᱚᱨᱮᱱᱟᱜ ᱢᱤᱫᱴᱟᱹᱝ – ᱫᱟ ᱠᱚᱱᱴᱨᱤ ᱮᱴ ᱢᱟᱭ ᱥᱳᱞᱰᱟᱨ ᱪᱷᱟᱯᱟ ᱠᱟᱛᱮ ᱛᱟᱭᱚᱢ ᱫᱷᱟᱹᱵᱤᱡ ᱩᱱᱤ ᱯᱟᱠᱤᱥᱛᱟᱱ ᱫᱚ ᱵᱟᱭ ᱫᱟᱬᱟ ᱞᱮᱫ ᱛᱟᱦᱮᱸᱫ ᱾ ᱩᱱᱤ ᱫᱚ ᱟᱭᱢᱟ ᱥᱮᱨᱢᱟ ᱦᱟᱭ-ᱤᱥᱠᱩᱞ ᱢᱟᱪᱮᱫ ᱞᱮᱠᱟᱛᱮ ᱠᱟᱹᱢᱤ ᱠᱮᱫᱟ ᱢᱮᱱᱠᱷᱟᱱ ᱱᱤᱛᱚᱜ ᱫᱚ ᱢᱤᱫ ᱯᱷᱨᱤᱞᱟᱸᱥ ᱚᱱᱚᱞᱤᱭᱟᱹ ᱟᱨ ᱴᱭᱩᱴᱟᱨ ᱠᱟᱱᱟᱭ, ᱱᱳᱨᱯᱷᱳᱠ ᱨᱮᱭ ᱛᱟᱦᱮᱸᱱ ᱠᱟᱱᱟ ᱾[᱑]
ᱯᱤᱠᱚᱠ ᱞᱚᱜᱮᱡᱽ, ᱢᱚᱱᱤᱡᱟ ᱟᱞᱵᱷᱤ ᱟᱨ ᱯᱤᱴᱟᱨ ᱰᱮᱱᱤᱭᱮᱞᱥ ᱟᱜ ᱚᱱᱚᱲᱦᱮᱸ ᱨᱮᱱᱟᱜ ᱢᱤᱫ ᱯᱩᱛᱷᱤ, ᱵᱟᱱᱟᱨ ᱚᱱᱚᱲᱦᱮᱸᱭᱟᱹ ᱑᱙᱙᱑ ᱥᱟᱞᱮ ᱨᱮ ᱡᱩᱢᱤᱫᱽ ᱠᱟᱛᱮ ᱯᱚᱭᱮᱴᱨᱤ ᱵᱤᱡᱱᱮᱥ ᱥᱤᱨᱯᱷᱟᱹ ᱡᱤᱛᱠᱟᱹᱨ ᱠᱟᱛᱮ ᱪᱷᱟᱯᱟ ᱞᱮᱱ ᱛᱟᱦᱮᱸᱫ, ᱟᱞᱵᱷᱤᱭᱟᱜ ᱠᱮᱥ ᱨᱮ "ᱯᱨᱮᱡᱮᱱᱴᱥ ᱯᱷᱨᱚᱢ ᱢᱟᱭ ᱟᱣᱩᱱᱴᱥ ᱤᱱ ᱯᱟᱠᱤᱥᱛᱟᱱ" ᱞᱟᱹᱜᱤᱫ ᱾ ᱚᱱᱟ ᱚᱱᱚᱲᱦᱮᱸ ᱟᱨ "ᱮᱱ ᱚᱱᱱᱚᱣᱱ ᱜᱟᱨᱞ" ᱫᱚ ᱤᱝᱞᱮᱱᱰ ᱨᱮᱱᱟᱜ ᱦᱩᱰᱤᱧ ᱴᱤᱱᱮᱡᱟᱨ ᱠᱚ ᱞᱟᱹᱜᱤᱫ ᱡᱤᱥᱤᱮᱥᱤ ᱵᱤᱱᱤᱰ ᱥᱤᱞᱮᱵᱚᱥ ᱨᱮ ᱯᱷᱤᱪᱟᱨ ᱟᱠᱟᱱᱟ ᱾
ᱩᱱ ᱚᱠᱛᱚ ᱠᱷᱚᱱ, ᱢᱚᱱᱤᱡᱟ ᱟᱞᱵᱷᱤ ᱫᱚ ᱯᱩᱱᱭᱟᱹ ᱚᱱᱚᱲᱦᱮᱸ ᱥᱟᱠᱟᱢ ᱮ ᱚᱞ ᱟᱠᱟᱫᱟ ᱾ ᱫᱟ ᱠᱚᱱᱴᱨᱤ ᱮᱴ ᱢᱟᱭ ᱥᱳᱞᱰᱟᱨ (᱑᱙᱙᱓) ᱫᱚ ᱩᱱᱤ ᱑᱙᱙᱔ ᱥᱟᱞᱮ ᱨᱮ ᱯᱚᱭᱮᱴᱨᱤ ᱥᱳᱥᱟᱭᱤᱴᱤ ᱨᱮᱱᱟᱜ ᱱᱟᱣᱟ ᱡᱮᱱᱮᱨᱮᱥᱚᱱ ᱯᱚᱭᱮᱴᱥ ᱯᱨᱳᱢᱳᱥᱚᱱ ᱞᱟᱹᱜᱤᱫ ᱵᱟᱪᱷᱚᱱ ᱦᱩᱭ ᱞᱮᱱᱟ ᱾ ᱩᱱᱤ ᱫᱚ ᱠᱤᱯᱞᱤᱝ ᱟᱜ ᱡᱟᱥᱴ ᱥᱳ ᱥᱴᱚᱨᱤᱡᱽ ᱠᱷᱚᱱ ᱩᱫᱽᱜᱟᱹᱣ ᱠᱟᱛᱮ ᱠᱟᱹᱴᱤᱡ ᱠᱟᱹᱦᱱᱤ ᱨᱮᱱᱟᱜ ᱢᱤᱫ ᱥᱤᱨᱤᱡᱽ ᱦᱚᱸᱭ ᱪᱷᱟᱯᱟ ᱞᱮᱫ ᱛᱟᱦᱮᱸᱫ, ᱦᱟᱣ ᱫᱟ ᱥᱴᱚᱱ ᱯᱷᱟᱣᱩᱱᱰ ᱤᱴᱥ ᱵᱷᱚᱭᱮᱥ (᱒᱐᱐᱕) ᱾
᱒᱐᱐᱒ ᱥᱟᱞᱮ ᱨᱮ ᱩᱱᱤ ᱟᱡᱟᱜ ᱚᱱᱚᱲᱦᱮᱸ ᱞᱟᱹᱜᱤᱫ ᱢᱤᱫ ᱪᱳᱞᱢᱳᱱᱰᱮᱞᱮ ᱥᱤᱨᱯᱷᱟᱹ ᱦᱚᱸᱭ ᱧᱟᱢ ᱠᱮᱫᱟ ᱾ ᱒᱐᱐᱓ ᱥᱟᱞᱮ ᱨᱮ ᱟᱡᱟᱜ ᱚᱱᱚᱲᱦᱮᱸ ᱠᱷᱚᱱ ᱵᱟᱪᱷᱟᱣ ᱟᱠᱟᱱ ᱟᱹᱰᱤ ᱜᱟᱱ ᱰᱟᱪ ᱟᱨ ᱤᱝᱞᱤᱥ ᱮᱰᱤᱥᱚᱱ ᱨᱮ ᱪᱷᱟᱯᱟ ᱞᱮᱱ ᱛᱟᱦᱮᱸᱫ ᱾ ᱟᱡᱟᱜ ᱢᱟᱬᱟᱝ ᱯᱩᱛᱷᱤ, ᱥᱯᱞᱤᱴ ᱣᱟᱨᱞᱰ: ᱯᱳᱭᱮᱢᱥ ᱑᱙᱙᱐-᱒᱐᱐᱕ ᱠᱷᱚᱱ ᱵᱟᱪᱷᱟᱣ ᱠᱟᱛᱮ ᱒᱐᱐᱘ ᱥᱟᱞᱮ ᱨᱮ ᱪᱷᱟᱯᱟ ᱞᱮᱱ ᱛᱟᱦᱮᱸᱫ ᱾
᱑᱖ ᱡᱟᱱᱩᱣᱟᱨᱤ ᱒᱐᱑᱔ ᱥᱟᱞᱮ ᱨᱮ ᱟᱞᱵᱷᱤ ᱫᱚ ᱵᱤᱵᱤᱥᱤ ᱨᱮᱰᱤᱭᱳ ᱓ ᱥᱤᱨᱤᱡᱽ ᱫᱟ ᱮᱥᱥᱮ-ᱞᱮᱴᱟᱨᱥ ᱴᱩ ᱮ ᱭᱚᱝ ᱯᱚᱭᱮᱴ ᱨᱮᱭ ᱥᱮᱞᱮᱫ ᱞᱮᱱ ᱛᱟᱦᱮᱸᱫ ᱾ ᱨᱮᱭᱱᱟᱨ ᱢᱟᱨᱤᱭᱟ ᱨᱤᱞᱠᱮ ᱟᱜ ᱠᱞᱟᱥᱤᱠ ᱴᱮᱠᱥᱴ ᱞᱮᱴᱟᱨᱥ ᱴᱩ ᱮ ᱭᱚᱝ ᱯᱚᱭᱮᱴ ᱫᱚ ᱩᱱᱠᱩᱣᱟᱜ ᱤᱱᱥᱯᱤᱨᱮᱥᱚᱱ ᱞᱮᱠᱟᱛᱮ ᱦᱟᱛᱟᱣ ᱠᱟᱛᱮ ᱟᱭᱩᱨᱤᱭᱟᱹ ᱚᱱᱚᱲᱦᱮᱸᱭᱟᱹ ᱠᱚ ᱢᱤᱫ ᱯᱨᱳᱴᱮᱡ ᱴᱷᱮᱱ ᱪᱤᱴᱷᱤ ᱠᱚ ᱚᱞ ᱠᱮᱫ ᱛᱟᱦᱮᱸᱫ ᱾[᱒]