ᱫᱤᱵᱽᱭᱟ ᱠᱟᱠᱨᱟᱱ (ᱡᱟᱱᱟᱢ ᱑᱙᱙᱘) ᱫᱚ ᱥᱤᱧᱚᱛ ᱨᱮᱱᱤᱡ ᱯᱷᱨᱤᱥᱴᱟᱭᱤᱞ ᱠᱩᱥᱛᱤ ᱠᱷᱮᱞᱚᱸᱰᱤᱭᱟᱹ ᱠᱟᱱᱟᱭ᱾ ᱫᱤᱵᱽᱭᱟ ᱫᱚ ᱖᱐ ᱜᱚᱴᱟᱝ ᱢᱮᱰᱮᱞ ᱮ ᱡᱤᱛᱠᱟᱹᱨ ᱟᱠᱟᱫᱟ, ᱚᱱᱟ ᱠᱚ ᱢᱩᱸᱫᱽ ᱨᱮ ᱑᱗ ᱜᱚᱴᱟᱝ ᱫᱚ ᱫᱤᱞᱞᱤ ᱯᱚᱱᱚᱛ ᱪᱟᱢᱯᱤᱭᱟᱱᱥᱤᱯ ᱨᱮᱱᱟᱜ ᱥᱚᱱᱟ ᱢᱮᱰᱮᱞ ᱠᱟᱱᱟ, ᱟᱨ ᱵᱷᱟᱨᱚᱛ ᱠᱮᱥᱟᱨᱤ ᱴᱟᱭᱴᱮᱞ ᱫᱚ ᱤᱨᱟᱹᱞ ᱫᱷᱟᱣ ᱮ ᱡᱤᱛᱠᱟᱹᱨ ᱟᱠᱟᱫᱟ᱾ ᱩᱱᱤ ᱫᱚ ᱒᱐᱑᱘ ᱨᱮ ᱮᱥᱤᱭᱟᱱ ᱜᱮᱢᱥ ᱨᱮ ᱢᱮᱰᱮᱞ ᱡᱤᱛᱠᱟᱹᱨᱚᱜ ᱨᱮ ᱫᱤᱞᱞᱤ ᱥᱚᱨᱠᱟᱨ ᱯᱟᱦᱴᱟ ᱠᱷᱚᱱ ᱜᱚᱲᱚ ᱵᱟᱝ ᱧᱟᱢ ᱠᱷᱟᱹᱛᱤᱨ ᱟᱹᱰᱤ ᱵᱟᱹᱲᱤᱡ ᱮ ᱵᱩᱡᱷᱟᱹᱣ ᱞᱮᱫ ᱛᱟᱦᱮᱸᱫ, ᱢᱮᱱᱠᱷᱟᱱ ᱩᱱᱤ ᱫᱚ ᱟᱡᱟᱜ ᱠᱷᱟᱨᱟᱯ ᱠᱟᱹᱣᱰᱤ ᱟᱹᱨᱤ ᱵᱟᱵᱚᱛ ᱛᱮ ᱥᱚᱨᱠᱟᱨ ᱴᱷᱮᱱ ᱮ ᱚᱞ ᱞᱮᱫ ᱛᱟᱦᱮᱸᱫ᱾ ᱫᱤᱵᱽᱭᱟ ᱫᱚ ᱱᱤᱛᱚᱜ ᱥᱤᱱᱤᱭᱚᱨ ᱴᱤᱠᱮᱴ ᱮᱠᱡᱟᱢᱤᱱᱟᱨ ᱞᱮᱠᱟᱛᱮ ᱥᱤᱧᱚᱛᱤᱭᱟᱹ ᱨᱮᱞᱣᱮ ᱨᱮ ᱠᱟᱹᱢᱤ ᱠᱟᱱᱟᱭ᱾
ᱫᱤᱵᱽᱭᱟ ᱠᱟᱠᱨᱟᱱ ᱫᱚ ᱩᱛᱛᱚᱨ ᱯᱨᱚᱫᱮᱥ ᱠᱷᱚᱱ ᱮ ᱦᱤᱡᱩᱜ ᱠᱟᱱᱟ ᱟᱨ ᱩᱱᱤ ᱫᱚ ᱯᱩᱨᱵᱟᱞᱤᱭᱟᱱ ᱟᱹᱛᱩ ᱨᱮᱱᱤᱡ ᱛᱟᱞᱟᱼᱠᱞᱟᱥ ᱜᱷᱟᱨᱚᱸᱡᱽ ᱨᱮᱱᱤᱡ ᱠᱟᱱᱟᱭ᱾ ᱟᱡ ᱵᱟᱵᱟ ᱥᱩᱨᱚᱡ ᱫᱚ ᱞᱟᱝᱜᱚᱴ ᱮ ᱟᱹᱠᱷᱨᱤᱧ ᱛᱟᱦᱮᱸᱫ, ᱡᱟᱦᱟᱸ ᱫᱚ ᱟᱡ ᱮᱸᱜᱟᱛ ᱚᱲᱟᱜ ᱨᱮ ᱮ ᱛᱚᱞᱮᱫ ᱛᱟᱦᱮᱸᱫ᱾ ᱠᱟᱠᱨᱟᱱ ᱫᱚ ᱫᱟᱫᱽᱨᱤ, ᱥᱤᱧᱚᱛ ᱨᱮᱭᱟᱜ ᱱᱚᱭᱰᱟ ᱠᱚᱞᱮᱡᱽ ᱚᱯᱷ ᱯᱷᱤᱡᱤᱠᱟᱞ ᱮᱰᱩᱠᱮᱥᱚᱱ ᱨᱮ ᱯᱷᱤᱡᱤᱠᱟᱞ ᱮᱰᱩᱠᱮᱥᱚᱱ ᱮᱱᱰ ᱥᱯᱳᱨᱴᱥ ᱥᱟᱭᱮᱱᱥ (ᱵᱤ.ᱯᱤ.ᱤ.ᱮᱥ.) ᱮ ᱯᱟᱲᱦᱟᱣ ᱟᱠᱟᱫᱟ᱾
- ᱒᱐᱑᱗ ᱠᱚᱢᱚᱱᱣᱮᱞᱛᱷ ᱠᱩᱥᱛᱤ ᱪᱟᱢᱯᱤᱭᱟᱱᱥᱤᱯ - ᱠᱟᱠᱨᱟᱱ ᱫᱚ ᱰᱤᱥᱮᱢᱵᱚᱨ ᱒᱐᱑᱗ ᱨᱮ ᱮᱛᱚᱢ ᱡᱳᱦᱟᱱᱥᱵᱟᱨᱜ, ᱟᱯᱷᱨᱤᱠᱟ ᱨᱮ ᱦᱩᱭ ᱞᱮᱱ ᱠᱚᱢᱚᱱᱣᱮᱞᱛᱷ ᱪᱟᱢᱯᱤᱭᱟᱱᱥᱤᱯ ᱨᱮ ᱥᱚᱱᱟ ᱢᱮᱰᱮᱞ ᱮ ᱡᱤᱛᱠᱟᱹᱨ ᱞᱮᱱᱟ᱾
- ᱒᱐᱑᱗ ᱮᱥᱤᱭᱟᱱ ᱠᱩᱥᱛᱤ ᱪᱟᱢᱯᱤᱭᱟᱱᱥᱤᱯ - ᱠᱟᱠᱨᱟᱱ ᱫᱚ ᱥᱤᱧᱚᱛ ᱨᱮ ᱦᱩᱭ ᱞᱮᱱ ᱒᱐᱑᱗ ᱮᱥᱤᱭᱟᱱ ᱠᱩᱥᱛᱤ ᱪᱟᱢᱯᱤᱭᱟᱱᱥᱤᱯ ᱨᱮ ᱛᱤᱨᱞᱟᱹ ᱯᱷᱨᱤᱥᱴᱟᱭᱤᱞ ᱖᱙ ᱠᱤᱞᱳᱜᱨᱟᱢ ᱤᱵᱷᱮᱱᱴ ᱨᱮ ᱨᱩᱯᱟᱹ ᱢᱮᱰᱮᱞ ᱮ ᱡᱤᱛᱠᱟᱹᱨ ᱞᱮᱱᱟ᱾
- ᱒᱐᱑᱘ ᱵᱷᱟᱨᱚᱛ ᱠᱮᱥᱟᱨᱤ ᱫᱟᱝᱜᱚᱞ ᱒᱓ ᱢᱟᱨᱪ ᱒᱐᱑᱘ - ᱠᱟᱠᱨᱟᱱ ᱫᱚ ᱵᱷᱟᱨᱚᱛ ᱠᱮᱥᱟᱨᱤ ᱴᱟᱭᱴᱮᱞ ᱮ ᱡᱤᱛᱠᱟᱹᱨ ᱞᱮᱱᱟ, ᱡᱟᱦᱟᱸ ᱫᱚ ᱵᱷᱤᱣᱟᱱᱤ, ᱦᱚᱨᱤᱭᱟᱬᱟ, ᱥᱤᱧᱚᱛ ᱨᱮ ᱦᱩᱭ ᱞᱮᱱᱟ᱾ ᱦᱮᱯᱨᱟᱣ ᱨᱮᱭᱟᱜ ᱢᱩᱪᱟᱹᱫ ᱢᱮᱪ ᱨᱮ, ᱠᱟᱠᱨᱟᱱ ᱫᱚ ᱨᱤᱛᱩ ᱢᱟᱞᱤᱠ ᱮ ᱦᱟᱨᱟᱣ ᱞᱮᱫᱮᱭᱟ᱾ ᱱᱚᱣᱟ ᱢᱩᱪᱟᱹᱫ ᱢᱮᱪ ᱢᱟᱬᱟᱝ ᱨᱮ, ᱠᱟᱠᱨᱟᱱ ᱫᱚ ᱡᱮᱜᱮᱛᱤᱭᱟᱹᱨᱤ ᱪᱟᱢᱯᱤᱭᱟᱱ ᱜᱤᱛᱟ ᱯᱷᱚᱜᱟᱴ ᱮ ᱦᱟᱨᱟᱣ ᱞᱮᱫᱮᱭᱟ, ᱡᱟᱦᱟᱸᱭ ᱫᱚ ᱫᱟᱝᱜᱚᱞ ᱯᱷᱤᱞᱤᱢ ᱨᱮ ᱪᱤᱛᱟᱹᱨ ᱞᱟᱹᱜᱤᱫ ᱮ ᱧᱩᱛᱩᱢ ᱮ ᱟᱢᱮᱴ ᱞᱮᱫ ᱛᱟᱦᱮᱸᱫ᱾
- ᱒᱐᱑᱘ ᱮᱥᱤᱭᱟᱱ ᱜᱮᱢᱥ ᱡᱟᱠᱟᱨᱛᱟ ᱯᱟᱞᱮᱢᱵᱟᱝ - ᱠᱟᱠᱨᱟᱱ ᱫᱚ ᱒᱐᱑᱘ ᱮᱥᱤᱭᱟᱱ ᱜᱮᱢᱥ ᱨᱮ ᱛᱤᱨᱞᱟᱹ ᱯᱷᱨᱤᱥᱴᱟᱭᱤᱞ ᱖᱘ ᱠᱤᱞᱳᱜᱨᱟᱢ ᱤᱵᱷᱮᱱᱴ ᱨᱮ ᱡᱟᱠᱟᱨᱛᱟ ᱟᱨ ᱯᱟᱞᱮᱢᱵᱟᱝ ᱨᱮ ᱴᱮᱠᱱᱤᱠᱟᱞ ᱥᱩᱯᱤᱨᱤᱭᱚᱨᱤᱴᱤ ᱠᱷᱟᱹᱛᱤᱨ ᱛᱟᱭᱯᱮᱭᱤ ᱨᱮᱱᱤᱡ ᱪᱮᱱ ᱣᱮᱱᱞᱤᱝ ᱮ ᱦᱟᱨᱟᱣ ᱠᱟᱛᱮ ᱵᱨᱳᱸᱡᱽ ᱢᱮᱰᱮᱞ ᱮ ᱡᱤᱛᱠᱟᱹᱨ ᱞᱮᱱᱟ᱾
- ᱒᱐᱒᱒ ᱵᱤᱨᱢᱤᱝᱜᱟᱢ ᱠᱚᱢᱚᱱᱣᱮᱞᱛᱷ ᱜᱮᱢᱥ ᱨᱮ, ᱩᱱᱤ ᱫᱚ ᱱᱟᱭᱡᱮᱨᱤᱭᱟ ᱨᱮᱱᱤᱡ ᱴᱳᱠᱤᱭᱳ ᱚᱞᱤᱢᱯᱤᱠ ᱨᱩᱯᱟᱹ ᱢᱮᱰᱮᱞ ᱡᱤᱛᱠᱟᱹᱨᱤᱡ ᱟᱨ ᱑᱑ ᱫᱷᱟᱣ ᱟᱯᱷᱨᱤᱠᱟᱱ ᱪᱟᱢᱯᱤᱭᱟᱱ ᱵᱞᱮᱥᱤᱝ ᱳᱵᱳᱨᱩᱰᱩᱰᱩ ᱴᱷᱮᱱ ᱮ ᱦᱟᱨᱟᱣ ᱮᱱ ᱛᱟᱭᱚᱢ ᱛᱤᱨᱞᱟᱹ ᱖᱘ ᱠᱤᱞᱳᱜᱨᱟᱢ ᱯᱷᱨᱤᱥᱴᱟᱭᱤᱞ ᱠᱩᱥᱛᱤ ᱨᱮ ᱵᱨᱳᱸᱡᱽ ᱮ ᱡᱤᱛᱠᱟᱹᱨ ᱞᱮᱱᱟ᱾