திருவோணம் (பஞ்சாங்கம்)

திருவோணம் என்பது இந்திய வானியலிலும் சோதிடத்திலும் இராசிச் சக்கரத்தில் சொல்லப்படுகின்ற இருபத்தேழு நட்சத்திரக் கோணப் பிரிவுகளுள் 22 ஆவது பிரிவு ஆகும். இந்தியப் பஞ்சாங்க முறையில் சந்திரன் புவியைச் சுற்றி வரும்போது திருவோண நட்சத்திரக் கோணப் பிரிவுக்குள் இருக்கும் காலம் திருவோண நட்சத்திரத்துக்கு உரிய காலம் ஆகும். இந்திய சோதிடத்தின்படி, இந்தக் காலப் பகுதியில் பிறக்கும் ஒருவருடைய "பிறந்த நட்சத்திரம்" அல்லது "ஜன்ம நட்சத்திரம்" திருவோணம் ஆகிறது.

ஒவ்வொரு நட்சத்திரப் பிரிவும் 13° 20' அளவு கொண்டதாக இருப்பதால், இருபத்திரண்டாவது நட்சத்திரமாகிய திருவோணம் 280° 00'க்கும் 293° 20'க்கும் இடையில் அமைந்துள்ளது.^[1] இந்தப் பிரிவு 3° 20' அளவு கொண்ட நான்கு சமமான பிரிவுகளாகப் பிரிக்கப்பட்டுள்ளது. இப்பிரிவுகள் திருவோண நட்சத்திரத்தின் முதலாம், இரண்டாம், மூன்றாம், நான்காம் பாதங்கள் அல்லது கால்கள் எனப்படுகின்றன. இந்த நட்சத்திரம் முழுவதும் மகர இராசிக்குள் அமைந்துள்ளது.

பெயரும் அடையாளக் குறியீடும்

அக்கிலா விண்மீன் கூட்டம்

இந்திய வானியலிலும் சோதிடத்திலும் நட்சத்திரப் பிரிவுகளுக்குரிய பெயர்கள் அவ்வப் பிரிவுகளில் காணும் முக்கியமான விண்மீன்கள் (நட்சத்திரம்) அல்லது விண்மீன் கூட்டங்களைத் தழுவி இடப்பட்டவை. இதன்படி திருவோண நட்சத்திரப் பிரிவின் பெயர் அப்பிரிவுக்குள் காணப்படும் அக்கிலா விண்மீன் கூட்டத்தில் காணப்படும் இரண்டு நட்சத்திரங்களைக் கொண்ட திருவோணத்தின் (α, β and γ அக்குயிலய்) பெயரைத் தழுவியது. திருவோணத்தின் சமசுக்கிருதப் பெயரான ஷ்ரவன (Shravana) என்பது "கேட்டல்" என்னும் பொருள் கொண்டது. இதன் அடையாளக் குறியீடு "காது" ஆகும்.

சோதிடத்தில் திருவோணம்

இயல்புகள்

இந்தியச் சோதிட நூல்கள் நட்சத்திரங்களோடு தொடர்புடையவையாகக் கருதப்படும் இயல்புகளைத் தேவதைகள், கோள்கள், விலங்குகள், பறவைகள், மரங்கள், இயற்கை மூலங்கள், சாதி, பால் போன்றவற்றின் மூலம் குறித்துக் காட்டுகின்றன. திருவோண நட்சத்திரத்துக்குரிய மேற்படி இயல்புகள் பின்வருமாறு:^[2][3]

கோள்	சந்திரன்
தேவதை	திருமால், சரசுவதி
தன்மை	அசையும்
சாதி	சூத்திர சாதி
கோத்திரம்	புலகர்
பால்	ஆண்
குணம்	தேவ குணம்
இயற்கை மூலம்	வாயு
விலங்கு	பெண் குரங்கு
பறவை	நாரை
மரம்	எருக்கு
நாடி	பிங்கலை

குறிப்புகள்

1. Raman, B. V., 1992. பக். 40.
2. வெங்கடேச ஐயர், இ., 2012. பக். 24.
3. Harness, Dennis M., Masco, Maire M., The Nakshatras of Vedic Astrology: Ancient & Contemporary Usage பரணிடப்பட்டது 2012-05-26 at the வந்தவழி இயந்திரம்.

உசாத்துணைகள்

• Raman, B. V., A Manual of Hindu Astrology, Raman Publications, Bangalore, 1992 (16th Edition).
• வெங்கடேச ஐயர், இ., இரகுநாத ஐயர், வெ., கரவருட வாக்கிய பஞ்சாங்கம், சோதிடப் பிரகாச யந்திரசாலை, 2012.
• Harness, Dennis M., Masco, Maire M., The Nakshatras of Vedic Astrology: Ancient & Contemporary Usage பரணிடப்பட்டது 2012-05-26 at the வந்தவழி இயந்திரம்.

இவற்றையும் பார்க்கவும்

• நட்சத்திரம்
• இராசி

வெளியிணைப்புக்கள்

• astrojyoti.com - Shravana Nakshatra