ಉಬಾರ್

ಉಬಾರ್ ಉಪ್ಪಿನಂಗಡಿ
ಪೇಂಟೆ
ಉಬಾರ್‌ದ ಸಂಕ
ಉಬಾರ್ Location in Karnataka, India
Coordinates: 12°50′24″N 75°14′56″E / 12.839972°N 75.248982°E / 12.839972; 75.248982Coordinates: 12°50′24″N 75°14′56″E / 12.839972°N 75.248982°E / 12.839972; 75.248982
ದೆಸೊ	ಭಾರತ
ರಾಜ್ಯೊ	ಕರ್ನಾಟಕ
ಜಿಲ್ಲೆ	ದಕ್ಷಿಣ ಕನ್ನಡ
ತಾಲೂಕು	ಪುತ್ತೂರು
Government
• Type	Panchayati raj (India)
• Body	ಗ್ರಾಮ ಪಂಚಾಯತ್
ಬಾಸೆ
• Official	ತುಳು, ಕನ್ನಡ
Time zone	UTC+5:30 (IST)
Vehicle registration	ಕೆಎ 21, ಕೆಎ 70
ಮುಟ್ಟದ ಪೇಂಟೆಲು	ಬೊಲ್ತೆರ್

ಉಬಾರ್ ಪನ್ಪುನ ಊರು ಪುತ್ತೂರು ತಾಲೂಕುಡು ಉಪ್ಪುನ ಒಂಜಿ ಎಲ್ಯ ಪೇಂಟೆ. ನೇತ್ರಾವತಿ ಬೊಕ್ಕ ಕುಮಾರಧಾರಾ ಸುದೆಕುಲು ಒಟ್ಟು ಸೇರುನ ಜಾಗೆ ಉಂದು. ಕನ್ನಡೊಡು ಇಡೆಗ್ ಉಪ್ಪಿನಂಗಡಿ ಪನ್ಪೆರ್. ಈ ರಡ್ಡ್ ಸುದೆಕುಲು ಸೇರ್‌ದ್ ನೀರ್‌ದ ಮಟ್ಟ ದೇವರೆನ ಪಾದ ಮುಟ್ಟುನಗ ಉಂದೆನ್ "ಸಂಗಮ" ಪಂಡ್‍ದ್ ಲೆಪ್ಪುವೆರ್. ಉಂದು ಒಂಜಿ ವಿಶೇಷ ಸಂದರ್ಭ ಆದ್ ಉಂಡು. ಸುತ್ತು ಮುತ್ತಲ್‍ದ ಜನಕುಲು ಉಂದೆನ್ ತೂಯೆರೆ ಬೋಡಾದೇ ಬತ್ತ್‌ದ್ ಸೇರುವೆರ್. ಈ ಜಾಗೆಡ್ ಸಹಸ್ರಲಿಂಗೇಶ್ವರ ದೇವೆರೆ ದೇವಸ್ಥಾನ, ಕೈತಲ್‍ಡೇ ಮಾಲಿಕುದ್ದೀನಾರ್ ಪಳ್ಳಿ (ಮಸೀದಿ) ಬೊಕ್ಕ ಸಂತ ಬಾಲ ಯೇಸುನ ಚರ್ಚ್ (ಮಂದಿರ) ಮೂಲು ಉಂಡು.^[೧]

ಇತಿಹಾಸೊ

ಮುಲ್ಪದ ಇತಿಹಾಸೊದ ಪ್ರಕಾರ ೧೮೦೦ ಟ್ ಶ್ರೀರಂಗಪಟ್ಟಣದ ನಿರ್ನಾಮದ ಬೊಕ್ಕ ಸುಬ್ಬಾರಾವ್ ಬೊಕ್ಕ ವಿಟ್ಟಲ ಹೆಗ್ಗಡೆ ಪನ್ಪುನ ರಡ್ಡ್ ಜನ ಶಸ್ತ್ರಸಜ್ಜಿತರಾದ್ ಈ ಪೇಂಟೆನ್ ತನುಕುಲೆನ ವಸೊಕ್ಕು ದೆತೊನೆರೆ ಪ್ರಯತ್ನ ಮಲ್ತೆರ್. ಆ ಪೊರ್ತುಡು ಉಂದು ತಾಲೂಕು ಕೇಂದ್ರವಾದ್ ಇತ್ತ್ಂಡ್. ೧೮೮೨ಟ್ ತಾಲೂಕು ಕೇಂದ್ರನ್ ಪುತ್ತೂರಿಗೆ ಸ್ಥಳಾಂತರ ಮಲ್ತೆರ್. ಕುಡ್ಲ ಬಂದರ್ ಬೊಕ್ಕ ಉಲಯಿದ ಜಾಗೆಲಾಯಿನ ಹಾಸನ, ಸಕಲೇಶಪುರಲೆಗ್ ಸರಕು ಸಾಗಣೆದ ಪ್ರಮುಖ ಜಾಗೆ ಉಂದುವೆ ಆದ್ ಇತ್ತ್ಂಡ್. ಪ್ರಾಕೃತಿಕವಾದ್ ಬಾರಿ ಪೊರ್ಲು ತೋಜುನ ಉಬಾರ್‌ ಒಂಜಿ ಕಾಲೊಡು ಭಾರಿ ಪ್ರಸಿದ್ಧಿ ಪಡೆಯಿನ ಊರು. ವ್ಯಾಪಾರ ಕೇಂದ್ರಲಾ ಅದ್ ಇತ್ತ್ಂಡ್. ಘಟ್ಟದ ಮಿತ್ತ್‌ರ್ದ್ ಬಾರ್ ಬತ್ತ್‌ದ್, ಘಟ್ಟದ ಮಿತ್ತ್‌ದ ಪ್ರದೇಸೊಗು ಮುಲ್ಪರ್ದ್ ಉಪ್ಪು ವಿನಿಮಯ ಆವೊಂದು ಇತ್ತ್ಂಡ್‌ಗೆ. ಅಂಚಾದ್ ಉಬಾರ್‌ನ್ ಉಪ್ಪಿನಂಗಡಿ ಪಂದ್ ಲೆತ್ತೊಂದು ಇತ್ತೆರ್. ಅಯಿಕ್ಕ್ ಪೂರಕವಾದ್ ಬ್ರಿಟಿಷ್ ಕಾಲದ ಹಳೆಗೇಟು ಪನ್ಪುನಲಾ ಮೂಲು ಇತ್ತ್ಂಡ್‌ಗೆ. ಇತ್ತೆಲಾ ಆ ಜಾಗೆಗ್ ಹಳೆಗೇಟು ಪಂದೇ ಪುದರ್. ಅವು ಅತ್ತಂದೆ ಉಂದೆಕ್ಕ್ ದುಂಬು ತಾಲೂಕು ಕೇಂದ್ರಲಾ ಉಂದುವೇ ಆದ್ ಇತ್ತ್ಂಡ್. ಆಂಡ ಬರ್ಸದ ಸಮಯೊಡು ಬುಡಂದೆ ಬರ್ಸ ಬತ್ತ್‌ದ್ ಈ ರಡ್ಡ್ ಸುದೆಕುಲುಲಾ ನೆರೆತ್ತ ಹಾವಳಿರ್ದ್ ಬೊಕ್ಕ ತಾಲೂಕುನು ಪುತ್ತೂರುಗು ಬದಲ್ ಮಲ್ಪೊಡಾದ್ ಬತ್ತ್ಂಡ್. ವ್ಯಾಪಾರ ಕೇಂದ್ರವಾದ್ ಪುದರ್ ಮಲ್ತ್‌‍ದ್ ಇತ್ತ್‌‍ನ ಉಬಾರ್ ಕ್ಷೇತ್ರ ಆದಿಡ್ ಅರಸುಲೆನ ಕಾಲೊಡು ಬಂಗಾಡಿದ ಬಂಗರಸುಲೆನ ಆಳ್ವಿಕೆಗ್ ಒಳಗಾದ್ ಇತ್ತ್ಂಡ್. ಗಯಾಪದ ಕ್ಷೇತ್ರ, ದಕ್ಷಿಣ ಕಾಶಿ ಪಂದ್ ಪುದರ್ ಪಡೆಯಿನ ಉಬಾರ್ ಕ್ಷೇತ್ರ ಸೈತ್‌ನಕುಲೆನ, ಹಿರಿಯೆರೆ ಪಿತೃ ಪಿಂಡ ಪ್ರಧಾನ ಮಲ್ಪುನ ಬೊಕ್ಕ ಉತ್ತರಕ್ರೀಯೆ ಮಲ್ಪುನ, ಸದ್ಗತಿ ನಡಪವುನ ಬೊಕ್ಕ ಮಲ್ತ್‌ನ ಪಾಪಕರ್ಮೊಲೆನ್‌ ದೆಕ್ಕುನ ಪುಣ್ಯಕ್ಷೇತ್ರ. ಈ ಉಬಾರ್ ಕ್ಷೇತ್ರೊಗು ಅ ಕಾಲೊಡು ವಾ ಭಾಗೊರ್ದುಲಾ ಬರೊಡುಂದು ಆಂಡ (ಗಂಗೆನ್) ಸುದೆನ್ (ಬೇತೆ ಬೇತೆ ಎಲ್ಯ ಎಲ್ಯ ಸುದೆಕುಲುಲಾ ಉಂಡು) ಕಡತೊಂದೇ ಬರೊಡು. ಈ ಎಲ್ಯ ಎಲ್ಯ ಸುದೆಕುಲು ಕಡೆಕ್ಕ್ ಒಟ್ಟಪುನೆ ಉಬಾರ್‌ಡೇ ರಡ್ಡ್ ಸುದೆಕುಲುಲಾ ಸಮಾಗಮ ಆಯಿ ಬೊಕ್ಕನೇ.

ಪುರಾಣದ ಕತೆ

ಈ ಜಾಗೆ ಬೊಕ್ಕ ದೇವಸ್ಥಾನದ ಪೌರಾಣಿಕ ಹಿನ್ನೆಲೆದ ಕತೆ ಇಂಚ ಉಂಡು.ದ್ವಾಪರ ಯುಗೊಟ್ಟು ಪಾಂಡವೆರ್ ಬೊಕ್ಕ ಕೌರವೆರೆನ ನಡುಟ್ಟು ಕುರುಕ್ಷೇತ್ರ ಯುದ್ಧ ಮುಗಿನೆರ್ದ್ ಬೊಕ್ಕ, ಪಾಂಡವೆರ್ ಕುರುಕ್ಷೇತ್ರ ಲಡಾಯಿಡ್ ಗೆಂದಿ ಬೊಕ್ಕ ಅಕುಲೆಗ್ ಯುದ್ಧಭೂಮಿಡ್ ನಡತ್ತಿ ಅಸಂಖ್ಯಾತ ಜೀವೊಲೆನ ನೆತ್ತೆರ್ ಬೂರ್‌ನವು ಪಾಪಪ್ರಜ್ಞೆಗ್ ಇಡೆ ಆಪುಂಡು. ಈ ಪ್ರಾಪಪ್ರಜ್ಞೆನ್ ಕಳೆಯೆರೆ ದೇವ ಸ್ವರೂಪಿ ಆಯಿನ ಕೃಷ್ಣಡ ಪರಿಹಾರ ಕೇನ್ನಗ, ಕೃಷ್ಣೆ ಅಕುಲೆಗ್ ರಾಜಸುರದ್ವರ ಯಾಗ ಮಲ್ಪೆರೆ ಪನ್ಪೆ. ಅಂಚನೆ ಪಾಂಡವೆರ್ ರಾಜಸುರದ್ವರ ಯಾಗ ಮಲ್ಪೆರೆ ಸಂಕಲ್ಪ ಮಲ್ಪುವೆರ್. ಆಂಡ ಈ ಯಾಗ ಪ್ರಮುಖವಾದ್ ಬಾರಿ ಸುದ್ದೊಡು ನಡಪುನ ಕ್ರಮವಾದ್ ಉಪ್ಪುನೆರ್ದ್, ಅಯಿಕ್ಕಾದ್ ಶುದ್ದತೆಗ್ ಪುದರಾಯಿನ ದೇವಮೃಗ ಪಂದ್ ಲೆಪ್ಪುನ ಪುರುಷಮೃಗನ್ ಮಹೀಂದ್ರಗಿರಿರ್ದ್ ಕನಪುನ ಅನಿವಾರ್ಯತೆ ಬರ್ಪುಂಡು. ಅಪಗ ಉಂದೆಕ್ಕ್ ಈ ಐನ್ ಜನ ಪಾಂಡವೆರೆಡ್ ಏರ್ ಸಮರ್ಥವಾದ್ ಲೆತ್ತೊಂದು ಬರ್ಪೆರ್ ಪಂದ್ ಕೃಷ್ಣೆ ವಿಮರ್ಶೆ ಮಲ್ತ್‌ದ್ ಕಡೆಕ್ಕ್ ಭೀಮನ್ ಆಯ್ಕೆ ಮಲ್ತ್‌ದ್ ಕಡಪುಡುವೆ. ಅಂಚನೇ ಭೀಮಸೇನೆ ವಾಯುಮಾರ್ಗೊಡೆ ಮಹೀಂದ್ರಗಿರಿಕ್ಕ್ ಪಿದಡುವೆ. ಅಂಚನೇ ವಾಯುಮಾರ್ಗೊಡು ಪೋವೊಂದು ಉಪ್ಪುನಗ ರಾಮನ ಕಾಲೊ ತ್ರೇತಯುಗೊಟ್ಟು ಇತ್ತ್‌ನಂಚಿನ ಆಂಜನೇಯೆ ವೃದ್ಧಾಪ್ಯೊಡು ಉಪ್ಪುನ ಪೊರ್ತುಡು ಉದ್ದದ ಮಲ್ಲ ಬೀಲೊನು ಭೀಮೆ ಪೋಪುನ ಸಾದಿಗ್ ಅಡ್ಡ ಆದ್ ಬುಡ್ಪದ್ ದೀದ್ ಉಪ್ಪುವೆ. ಅಪಗ ಭೀಮಸೇನೆ ಅಯನ ಬೀಲೊನು ತಾನ್ ಪೋಪುನ ಸಾದಿರ್ದ್ ಅಂಚಿ ದೀಲಾ ಪಂದ್ ಪನ್ಪೆ. ಅಪಗ ಆಂಜನೇಯೆ ಎಂಕ್ ಪ್ರಾಯ ಆತ್ಂಡ್. ಈಯೇ ಆ ಬೀಲನ್ ಬರಿಕ್ಕ್ ಮಲ್ತ್‌ದ್ ದುಂಬು ಪೋಲ ಪಂದ್ ಪನ್ಪೆ. ಭೀಮಸೇನೆ ಆಯನ ಭೀಮಬಲೊನು ಬಳಸ್‌ದ್ ಬೀಲೊನು ದೆರ್ತ್ ದೀಯೆರೆ ಏತ್ ಪ್ರಯತ್ನ ಮಲ್ತ್ಂಡಲಾ ಆವಂದೆ ಆಂಜನೇಯನ ಎದುರುಡು ಸೋಲ್ಪುವೆ. ಅಂಚನೇ ಭೀಮಸೇನೆ ತಾನ್ ಪಿದಡ್‌ನ ಕೆಲಸೊದ ಬಗೆಟ್ಟ್ ವಾಯುಪುತ್ರೆ ಆಯಿನಂಚಿನ ಆಂಜನೇಯಗ್ ತೆರಿಪಾವೆ. ಅಪಗ ಭೀಮಗ್ ಪುರುಷಮೃಗತ್ತ ಕತೆನ್ ಸಂಪೂರ್ಣವಾದ್ ವಿವರಿಸಾದ್ ಪನ್ಪೆ. ಅಯಿನ್ ಮಣಿಸಾದ್ ಲೆತೊಂದು ಬರ್ಪುನವು ಆತ್ ಸುಲಭದ ಬೇಲೆ ಅತ್ತ್. ಅಯಿನ್ ಲೆತೊಂದು ಬರಿಯೆರೆ ಭೀಮಗ್ ಆಂಜನೇಯೆ ತನ್ನ ಬೀಲೊದ ರೋಮನ್ ರಕ್ಷೆಯಾದ್ ದೆತ್ತ್‌ದ್ ಕೊರ್ಪೆ. ಅಂಚನೇ ಭೀಮಸೇನೆ ಪುರುಷಮೃಗೊಕ್ಕು ತಿಕ್ಕ್‌ದ್ ಎನ್ನ ಒಟ್ಟುಗೆ ಬರ್ಪುನಂಚ ಕೇನೊನ್ನಗ ಅವು ಷರತ್ತ್ ಪಾಡ್‌ದ್ ಆಯನ ಒಟ್ಟುಗು ಬರಿಯೆರೆ ಒತ್ತೊನುಂಡು. ಅ ಷರತ್ತ್‌ಗ್ ಉಪಾಯವಾದ್ ಆಂಜನೇಯೆ ಕೊರ್‌ನ ಬೀಲದ ಒಂಜೊಂಜೆ ರೋಮನ್ ದಕ್ಕೊಂದು ಬರ್ಪೆ. ರೋಮ ದಕ್ಕ್‌ದಾನಗ ಅವು ಶಿವಲಿಂಗ ಆವೊಂದು ಇತ್ತ್ಂಡ್. ಈ ಪುರುಷಮೃಗೊ ಬಾರಿ ಮಲ್ಲ ಶಿವಭಕ್ತೆ ಆದ್ ಉಪ್ಪುನೆರ್ದಾವರ ಭೀಮಸೇನೆ ದಕ್ಕೊಂದು ಬರೊಂದು ಇತ್ತ್‌ನ ಪ್ರತಿಯೊಂದು ರೋಮ ಶಿವಲಿಂಗ ಆಯಿನಪಗ ಅಯಿಕ್ಕ್ ಶಿವಾರ್ಚನೆನ್ ಮಲ್ತೊಂದು, ಭೀಮಸೇನನ್ ಬೇರಿ ಪತ್ತೊಂದು ಬರೊಂದು ಇತ್ತ್ಂಡ್. ತನ್ನ ಮನೊ ವೇಗೊರ್ದು ಬರೊಂದು ಉಪ್ಪುನ ಪುರುಷ ಮೃಗೊನು ರೋಮದ ರಕ್ಷೆರ್ದ್ ನಿಯಂತ್ರನ ಮಲ್ತೊಂದು ಬರೊಂದು ಇತ್ತ್‌ನ ಭೀಮಸೇನೆ ಉಬಾರ್‌ದ ಕೈತಡೆ ಬನ್ನಗ ಅಯಿತ್ತ ಕಬಂಧಬಾಹುಗು ತಿಕ್ಕುನ ಪ್ರಮೇಯ ಬನ್ನಗ ಆಯನ ಕೈಯಿಟ್ಟ್ ಇತ್ತ್‌ನ ಮಾತ ರೋಮೊನು ದಕ್ಕುವೆ. ಕೈಯಿಟ್ಟ್ ಇತ್ತ್‌ನ ಮಾತ ರೋಮೊಲು ಅಲ್ಪ ಸಾವಿರ ಸಾವಿರ ಲಿಂಗೊಲು ಆದ್ ಉದ್ಬವ ಆಂಡ್ ಪಂದ್ ಪುರಾಣ ಕತೆ ಪನ್ಪುಂಡು. ಅವ್ವೇ ದುಂಬುಗು ಸಹಸ್ರ ಲಿಂಗೊಲೆನ ಸನ್ನಿಧಿ ಸಹಸ್ರಲಿಂಗೇಶ್ವರ ದೇವೆರೆನ ಸನ್ನಿಧಿ ಅಂಡ್ ಪನ್ಪುನವು ಹಿರಿಯಕುಲೆನ ಪೌರಾಣಿಕ ಕತೆತ್ತ ಪಾತೆರ. ಮೂಡಾಯಿಟ್ ಕುಕ್ಕೆ ಸುಬ್ರಾಯ ದೇವೆರೆನ್ ಜಕ್ಕೆಲ್‌ಡ್ ದೀವೊಂದು ಉಪ್ಪುನ ಕುಮಾರ ಬೆಟ್ಟೊರ್ದು ಜತ್ತ್‌‍ದ್ ಬರ್ಪುನ ಕುಮಾರದಾರ, ಬಡಗ್‌ದ ಕುದುರೆಮುಖ ಬೆಟ್ಟೊದ ಗಂಗಮೂಲ ಪನ್ಪುನಲ್ಪರ್ದ್ ಪುಟ್ಟ್‌ದ್ ಬಂಗಾಡಿರ್ದ್ ಜತ್ತ್‌ದ್ ಕುಡುಮ(ಧರ್ಮಸ್ಥಳ) ಮಂಜುನಾಥನ ಕ್ಷೇತ್ರದ ಸನಿಹವಾದ್ ಪರತೊಂದು ಬರ್ಪುನ ನೇತ್ರಾವತಿ ಸುದೆ ಕೂಡುನ ಸಂಗಮ ಜಾಗೆನೇ ಈ ಉಬಾರ್. ಉಂದೆತ್ತ ನಡುಟ್ಟು ಸುದೆಟ್ಟ್ ಸಹಸ್ರಲಿಂಗ ದೇವೆರ್ ಬೊಕ್ಕ ಬೊಟ್ಟಲ್ಲಿ ಕೇಪಾಡೀಶ್ವರ ದೇವೆರ್, ಗುಂಡೊಡು ಮಕಲಬ್ಬೆ (ಮಹಾಂಕಾಳಿ) ದೇವಿನ ಸಾನಿಧ್ಯ ಉಂಡು. ಒಟ್ಟಾರೆಯಾದ್ ಸಾವಿರ ಲಿಂಗೊಲು ಉಪ್ಪುನ ಸಹಸ್ರಲೀಂಗೇಶ್ವರ ದೇವೆರೆ ಸನ್ನಿಧಿ ಉಂದು. ಅಂಚಾದ್ ಈ ಸುದೆರ್ದ್ ಕಲ್ಲ್‌ಲೆನ್ ಪೆಜ್ಜುನಂಚ ಇಜ್ಜಿ ಪನ್ಪುನ ಪಾತೆರೆ ಒಂಜಿ ಉಂಡು. ಉಂದೆನ್ ಪಾಡ್ದನೊಡು ನೀರ್‌ಡ್ ಸಹಸ್ರಲಿಂಗ ದೇವೆರ್, ಬೊಟ್ಟುಡು ಕೇಪಾಡಿ ದೇವೆರ್, ಗುಂಡೊಡು ಒರ್ತಿ ದಂಡ ಮಕಲಬ್ಬೆ ಉಲ್ಲಾಲ್ತಿ, ಸಾರಮಾನ್ಯ ಬೂತೊಲೆ ನಡೆ ಪಂಡ್‌ದ್ ಸಂಭೋದನೆ ಮಲ್ಪುನವು ಉಂಡು. ಮುಲ್ಪದ ಸುದೆಟ್ಟ್ ಉಪ್ಪುನ ಮಾತ ಲಿಂಗೊಲು ಸಹಸ್ರ ಲಿಂಗೊಲು ಪನ್ಪುನ ಕಲ್ಪನೆ ಉಂಡು. ಆಂಡ ಸುದೆಟ್ಟ್ ಒಂಜಿ ಉದ್ಬವ ಲಿಂಗೊಗು ಮಾತ್ರ ಮಖೆ ಜಾತ್ರೆಡ್ ಪೂಜೆ ಮಲ್ಪುನೆ. ಒರಿನಂಚ ಈ ಲಿಂಗ ಬರ್ಸದಪಗ ನೀರ್‌ಡ್ ಮುರ್ಂಗ್‌ದ್ ಉಪ್ಪುಂಡು. ಅರೆಗಲೊಡು ಪೊಯ್ಯೆಡ್ ಮುರ್ಂಗ್‌ದ್ ಉಪ್ಪುಂಡು. ಮಖೆ ಜಾತ್ರೆದ ಸಮಯೊಡು ಉಂದೆನ್ ಮುಚ್ಚೊಂದು ಇತ್ತ್‌ನ ಪೊಯ್ಯೆನ್ ದೆತ್ತ್‌ದ್ ಸುದ್ದ ಮಲ್ತ್‌ದ್ ಮಖೆಜಾತ್ರೆದ ಪೂಜೆ ಸುರು ಅಪುಂಡು. ಅಂಚನೇ ಮುಲ್ಪ ಮಕಾಲಬ್ಬೆಲಾ ಮಕಲಬ್ಬೆಕಯೊರ್ದು ಪುಟ್ಟುದು ಬತ್ತ್‌ನ ಸತ್ಯ ಪಂದ್ ಪನ್ಪೆರ್. ಇತ್ತೆಲಾ ರಡ್ಡ್ ಸುದೆಕುಲೆನ ಸಂಗಮದ ಜಾಗೆಗ್ ಮಕಲಬ್ಬೆ ಕಯ ಪಂದ್ ಲೆಪ್ಪುವೆರ್. ಉಂದೆತ್ತ ಗುಂಡಿನ್ ಲೆಕ್ಕ ಮಲ್ತ್‌ನಕುಲು ಇಜ್ಜಿ ಪನ್ಪುನ ಪಾತೆರ ಇತ್ತೆಲಾ ಉಂಡು.

ಮಖೆಜಾತ್ರೆ

ತುಳುನಾಡ್‌ದ ಹೆಚ್ಚಿನ ಪಾಡ್ದನೊಲೆಡ್ ಉಬಾರ್ ಕ್ಷೇತ್ರದ ಪುದರ್ ಬರುಪುಂಡು. ಉಂದೆಕ್ಕ್ ಮುಖ್ಯ ಕಾರಣ ಆಣ್ ಸುದೆ ಬೊಕ್ಕ ಪೊಣ್ಣು ಸುದೆಕುಲು ಸಂಗಮ ಆಯಿನ ಜಾಗೆ ಬೊಕ್ಕ ತೀರ್ಥ ಮೀಪುನ ಜಾಗೆ ಪನ್ಪುನ ಕಾರಣೊರ್ದ್. ಇತ್ತೆ ಉಬಾರ್ ಮಖೆ ಜಾತ್ರೆ ಪನ್ಪುನವು ಉಬಾರ್‌ದ ಸುತ್ತುಮುತ್ತು ಉಪ್ಪುನ ಗ್ರಾಮೊಲೆಗ್‍ ಮಾತ್ರ ಸೀಮಿತ ಪಂದ್ ಪನ್ಪುನಂಚ ಆತ್ಂಡ್. ಉಂದೆಕ್ಕ್ ಕಾರಣ ದಾದ ಪಂಡ ಇನಿ ತುಳುನಾಡ್‌ದ ಮಾತ ದಿಕ್ಕ್‌ಡ್‌ಲಾ ಜನಕುಲು ಅನುಕೂಲಸ್ಥೆರಾದ್, ದೈವಸ್ಥಾನೊಲು ಅಭಿವೃದ್ಧಿಯಾದ್ ಜಾತ್ರೆ, ನೇಮ, ಕೋಲ, ನೆರಿ, ಅಂಕ, ಅಯನ ಎಗ್ಗ್ಂಜಂದೆ ಸಿರಿಮಂತಿಕೆಡ್ ನಡತೊಂದು ಉಂಡು. ಆಂಡ ಆ ಕಾಲೊಡು ತುಳುನಾಡ್‌ದ ಕೆಲವೇ ಕೆಲವು ಮಲ್ಲ ಮಲ್ಲ ಜಾತ್ರೆಲೆಡ್ ಉಬಾರ್‌ದ ಮಖೆ ಜಾತ್ರೆ ಭಾರಿ ಮಲ್ಲ ಜಾತ್ರೆ ಆದ್ ಇತ್ತ್ಂಡ್. ಕೊಡಿ ಮಖೆ, ನಡು ಮಖೆ, ಕಡೆ ಮಖೆ ಪಂದ್ ಮುಲ್ಪದ ಜನಕುಲೆನ ಬಾಯಿಡ್ ಬರ್ಪುನ ಪಾತೆರ. ಮಾಗಣೆದ ವಿಚಾರೊಡು ಉಬಾರ್ ಮೂಜಿ ಮಾಗಣೆ ಪಂದ್ ಪ್ರಚಲಿತ ಆಯಿನವು. ಮಾಯಿಡ್ ಸುರುತ ಮಖೆ ಜಾತ್ರೆ ಸುರು ಆಪುಂಡು. ನನೊಂಜಿ ಮಖೆಲಾ ಮಾಯಿಡೇ, ಬುಕೊಂಜಿ ಮಾಯಿಡ್ ಬರ್ಪುನ ಮಹಾಶಿವರಾತ್ರಿಗ್ ಕಡೆ ಆಪುಂಡು. ಒಟ್ಟಾರೆಯಾದ್ ಏಳೆಣ್ಮ ದಿನೊಕುಲೆನ ಅಂತರೊಡು ಈ ಮಖೆಜಾತ್ರೆ ನಡಪುಂಡು. ಅಯಿರ್ದ್ ಬೊಕ್ಕ ಮಂಕಾಳಿನ ನೇಮ, ಅಯಿರ್ದ್ ಬೊಕ್ಕ ಒಂತೆ ದಿನ ಕರಿ ಬೊಕ್ಕ ಕಲ್ಕುಡ ಕಲ್ಲುರ್ಟಿನ ನೇಮ, ಗ್ರಾಮದ ದೊಂಪದಬಲಿ ನೇಮ ನಡಪುಂಡು. ಈ ಮೂಜಿ ಮಖೆಕ್ಕ್ ದೇವೆರೆ ಮಖೆ, ನರಮಾನಿನ ಮಖೆ, ದೈವೊಲೆನ ಮಖೆ ಪಂಡ್‌ದ್ ದುಂಬು ಹಿರಿಯಕುಲು ಪಂಡೊಂದು ಇತ್ತೆರ್. ಪ್ರತಿ ಸರ್ತಿಲಾ ರಾತ್ರೆ ಮಖೆ ಕೂಡುನೆ, ಆಣಿದ ರಾತ್ರೆ ಸುದೆತ್ತ ಪುಡೆತ್ತ ಪೊಯ್ಯೆದ ಮಿತ್ತ್ ಆಟೊ,ನಾಟಕೊ, ರಸಸಂಜೆ, ಸರ್ಕಸ್, ತೊಟ್ಟಿಲು, ಇಂಚಿತ್ತ್‌ನ ಮನರಂಜನೆ ಕೊರ್ಪುನ ಕಾರ್ಯಕ್ರಮೊಕುಲು ಬೊಲ್ಪು ಮುಟ್ಟ ನಡಪುಂಡು. ಬೊಲ್ಪು ಆನಗ ಪ್ರಾತಃಕಾಲದ ಪೊರ್ತುಡು ಮಖೆ ಮಿಯ್ಯೊಂದು ಬರೊಡು ಪನ್ಪುನವು ಮುಲ್ಪದ ಕ್ರಮೊ. ಆಯಿರ್ದ್‌ ಬೊಕ್ಕನೇ ದೇವೆರೆನ ಬಲಿಜಾತ್ರೆ. ಮಧ್ಯಾಹ್ನ ದೇವೆರೆನ ಪ್ರಸಾಧದ ಅನ್ನಸಂತರ್ಪಣೆ ಆಯಿ ಬೊಕ್ಕ ಜನಕುಲು ಅಕುಲು ಅಕುಲೆನ ಇಲ್ಲದಂಚಿ ಪಿದಡ್‌ದ್ ಪೋಪೆರ್.

ಸಾರಿಗೆ

ಈ ಪೇಂಟೆ ಕುಡ್ಲ ಬೊಕ್ಕ ಬೆಂಗಳೂರುನು ಸಂಪರ್ಕ ಮಲ್ಪುನ ರಾಷ್ಟೀಯ ಹೆದ್ದಾರಿ ೪೮ ಟ್ ಉಂಡು. ಪ್ರಸಿದ್ಧ ಕ್ಷೇತ್ರೊಲಾಯಿನ ಕುಕ್ಕೆ ಸುಬ್ರಹ್ಮಣ್ಯ, ಕಾಜೂರು ದರ್ಗಾ ಷರೀಫ್ ಉಂದಕ್ಕ್ ಪೂರ ಮುಲ್ಪರ್ದ್ ಸಂಪರ್ಕ ಆಪುಂಡು.

ಉಬಾರ್‌ದ ಸಂಕ

ಉಲ್ಲೇಕೊ

1. "Uppinangady Population Census 2011". www.census2011.co.in. Retrieved 7 December 2017.