Гастроэнтероколит
| Гастроэнтероколит | |
|---|---|
| Ихтисос | Пизишкии гувориш  |
| eMedicine | / |
|---|---|
Гастроэнтероколит (аз юн.-қад. γαστήρ — меъда, ἔντερον — рӯда, κόλον — рӯдаи ғафс) — дар як вақт газак гирифтани меъда ва рӯдаҳои борику ғафс.
Гастроэнтероколити шадид дар натиҷаи сирояти бактерияву вирусҳо, таъсири аллергия, ҳассос будан ба дору ё хӯрок, заҳролудӣ аз филиззоти вазнин, ишқор, кислота, спирт ва доруҳо ба вуҷуд меояд. Бактерияҳо сабабгори асосии гастроэнтероколит мебошанд. Кам шудани туршии шираи меъда, витаминкоҳиш, таҳмили ҷисмонӣ ва суистеъмоли нӯшокиҳои спиртдор ба инкишофи гастроэнтероколит мусоидат мекунанд. Гастроэнтероколит ногаҳон оғоз меёбад. Бемор қай ва сару шикамаш дард мекунад, ҳарорати баданаш баланд, дарунрав ва бемадор мешавад. Баъзан беҳуш гаштани ӯ низ мумкин аст. Дар натиҷаи саривақт табобат накардан Гастроэнтероколити шадид ба гастроэнтероколити музмин табдил ёфта, боиси илтиҳоби меъда (нигар Гастрит), рӯдаи борик (нигар Энтерит) ё рӯдаи ғафс (нигар Колит) мешавад. Ба одамони гирифтори Гастроэнтероколити шадид ёрии таъҷилии духтур ҳатмист.
Эзоҳ
[вироиш | вироиши манбаъ]Сарчашма
[вироиш | вироиши манбаъ]- Гастроэнтероколит // Вичлас — Гӯянда. — Д. : СИЭМТ, 2015. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 4). — ISBN 978-99947-33-77-4.